អន្តរជាតិ
វៀតណាម ចោទក្រុមហ៊ុន Nexflix និងApple ថាគេចមិនបានបង់ពន្ធ សេវាកម្សាន្ត Netflix។ រូបភាព៖ AFP
× រដ្ឋមន្ត្រីព័ត៌មានវៀតណាម លោក Nguyen Manh Hung នៅថ្ងៃទី១០ ខែវិច្ឆិកា បានចោទក្រុមហ៊ុនធំៗដូចជា Nexflix និង Apple ថា មិនបានអនុវត្តកាតព្វកិច្ចក្នុងការបង់ពន្ធរបស់ខ្លួន។ បើតាមលោករដ្ឋមន្ត្រី រៀងនេះ បង្កឲ្យមានការប្រកួតប្រជែងមិនស្មើភាពជាមួយនឹងក្រុមហ៊ុនក្នុងស្រុកដែលបានបង់ពន្ធ។
តាមការគណនារបស់ក្រសួងទំនាក់ទំនង និងព័ត៌មានវៀតណាម ក្រុមហ៊ុនសេវាកម្សាន្តដូចជា Netflix និងApple បានរកចំណូលបានប្រមាណ ៤៣លានដុល្លារ ពីអតិថិជនរបស់ខ្លួនប្រហែល ១លាននាក់។ ចំណូលទាំងនោះ មិនត្រូវបានបង់ពន្ធចូលមកឲ្យរដ្ឋទេ។
«ក្រុមហ៊ុនក្នុងស្រុក ត្រូវតែបង់ពន្ធ និងគោរពតាមបទបញ្ញត្តិផ្សេងផ្សេងៗ ខណៈក្រុមហ៊ុនបរទេសមិនបានបង់ពន្ធទេ»។ លោក Nguyen Manh Hung រដ្ឋមន្ត្រីព័ត៌មាន និងគមនាគមន៍វៀតណាម បានលើកឡើងបែបនេះ ដោយបន្ថែមថា ការធ្វើបែបនេះ គឺជាការប្រកួតប្រជែងមិនស្មើភាពរវាងក្រុមហ៊ុនក្នុងស្រុក និងក្រុមហ៊ុនបរទេស។
ថ្លែងនៅក្នុងកិច្ចប្រជុំរដ្ឋាភិបាលមួយ រដ្ឋមន្ត្រីវៀតណាមរូបនេះ បានបន្ថែមទៀតថា ក្រៅពីមិនបានបង់ពន្ធ ក្រុមហ៊ុនសេវាកម្សាន្តទាំងនោះ បានបំពានបទបញ្ញត្តិរបស់វៀតណាម ដែលទាក់ទិននឹងប្រវត្តិសាស្ត្រ អធិបតេយ្យភាព អំពើហិង្សា ការប្រើប្រាស់គ្រឿងញៀន និងបញ្ហាផ្សេងទៀតជាដើម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ក្រុមហ៊ុន Netflix មិនបានឆ្លើយតបអ្វីទេ ទាក់ទិននឹងការលើកឡើងរបស់វៀតណាមបែបនេះ។ ក្រុមហ៊ុននេះក៏មិនទាន់មានគម្រោងដាក់ទិន្នន័យ ឬបើកការិយាល័យរបស់ខ្លួននៅក្នុងវៀតណាមដែរ។ កន្លងមកក្រុមហ៊ុន Netflix ធ្លាប់បានអះអាងថា ខ្លួនកំពុងសហការជាមួយអាជ្ញាធរវៀតណាម ដើម្បីបង្កើតវិធានការនៃការប្រមូលពន្ធ។
សូមបញ្ជាក់ថា វៀតណាម បានដាក់ឲ្យប្រើប្រាស់ច្បាប់សន្តិសុខអ៊ីនធឺណិតក្នុងរយៈពេល២ឆ្នាំមកហើយ ដែលស្នើក្រុមហ៊ុនរកចំណូលតាមប្រព័ន្ធអនឡាញនៅវៀតណាមទុកទិន្នន័យរបស់ខ្លួននៅក្នុងប្រទេស ។
មួយរយៈចុងក្រោយនេះ តំបន់អាស៊ីអាគ្នេយ៍ បានចាប់ផ្តើមរឹតបន្តឹងយ៉ាងខ្លាំងលើសេវាកម្សាន្តដូចជាNetflix។ ហ្វីលីពីន ថៃ និងឥណ្ឌូណេស៊ីជាដើម បានអនុម័តលើច្បាប់ និងសេចក្តីស្នើច្បាប់ ដែលយកពន្ធលើក្រុមហ៊ុនទាំងនេះ។ ចំណែកកម្ពុជា ក៏កំពុងសិក្សាលើការយកពន្ធលើក្រុមហ៊ុន Netflix, Amazon, Alibaba, Facebook និងក្រុមហ៊ុនផ្សេងទៀតផងដែរ៕
© រក្សាសិទ្ធិដោយ thmeythmey.com