សម្ដេច ហ៊ុន សែន ចាត់ទុកសារសំឡេង ដែលចែកចាយតាមបណ្ដាញសង្គមនោះ គឺគ្រាន់តែចង់ធ្វើឱ្យប្រទេសជាតិមានចលាចល ហើយទំនិញឡើងថ្លៃ ជាពិសេសធ្វើឱ្យប្រជាជនរស់នៅមិនបានស្ងប់ចិត្តតែប៉ុណ្ណោះ។ សម្ដេច ហៅការឃោសនាព័ត៌មានមិនពិតនេះ ជាការគេងចំណេញខាងនយោបាយ របស់ក្រុមប្រឆាំងរដ្ឋាភិបាល។
លោកនាយករដ្ឋមន្ត្រី បានសរសេរលើហ្វេសប៊ុក នៅថ្ងៃទី១២ វិច្ឆិកានេះ យ៉ាងដូច្នេះថា៖«ថ្មីៗនេះមានមនុស្សអាក្រក់មួយចំនួនបានបំផុសពាក្យចចាមអារ៉ាមថារាជរដ្ឋាភិបាល នឹងបិទរាជធានីភ្នំពេញ និងហាមឃាត់ការធ្វើដំណើរពីខេត្តមួយទៅកាន់ខេត្តមួយ។ក្នុងឋានៈជាប្រមុខរាជរដ្ឋាភិបាលខ្ញុំសូមបញ្ជាក់ថានឹងមិនមានការបិទប្រទេស ឬរាជធានីខេត្ត ឬតំបន់ណាមួយនោះទេ»។
អះអាងបែបនេះហើយ ប្រមុខរដ្ឋាភិបាល បានសង្កត់ធ្ងន់ថា បញ្ហាដែលត្រូវដោះស្រាយពេលនេះ គឺការប្រយុទ្ធប្រឆាំងជាមួយជំងឺកូវីដ-១៩ ដែលទាមទារឱ្យពលរដ្ឋចូលរួមដោះស្រាយ។ ត្រង់ចំណុចនេះ សម្ដេច ហ៊ុន សែន បានអំពាវនាវជាថ្មីឱ្យពលរដ្ឋ ការពារខ្លួនតាមការណែនាំរបស់ក្រសួងសុខាភិបាល ពិសេសការពាក់ម៉ាស់ ការលាងដៃ ការមិនជួបជុំប្រមូលផ្តុំ និងការរក្សាគម្លាតសុវត្ថិភាពជាដើម។
សម្ដេច ក៏ប្រាប់ឱ្យពលរដ្ឋដែលកំពុងធ្វើចត្តាឡីស័កនៅតាមផ្ទះ ដោយសារពាក់ព័ន្ធនឹងព្រឹត្តិការណ៍ ៣ វិច្ឆិកា ត្រូវបន្តអនុវត្តឱ្យបានហ្មត់ចត់។ ព្រឹត្តិការណ៍ ៣ វិច្ឆិកា គឺសំដៅលើដំណើរទស្សនកិច្ចនៅកម្ពុជារបស់ប្រមុខការទូតហុងគ្រី លោក Peter Szijjarto ដែលត្រូវបានគេរកឃើញថា មានវិជ្ជមានកូវីដ-១៩ នៅគ្រាដែលប្រមុខការទូតរូបនេះ ទៅដល់ប្រទេសថៃ។
មិនតែប៉ុណ្ណោះលោកនាយករដ្ឋមន្ត្រី ក៏បញ្ជាឱ្យអាជ្ញាធរយកចិត្តទុកដោះស្រាយេជីវភាពពលរដ្ឋក្រីក្រ ដែលត្រូវជាប់កាតព្វកិច្ចធ្វើចត្តាឡីស័កខ្លួនឯងផងដែរ។«សូមអាជ្ញាធរមូលដ្ឋានតាមដានត្រួតពិនិត្យនឹងជួយដោះស្រាយជីវភាពសម្រាប់គ្រួសារក្រីក្រដែលពួកគាត់មិនអាចចេញប្រកបរបររកស៊ីបានក្នុងពេលធ្វើចត្តាឡីស័ក។ ត្រូវផ្តល់ស្បៀងអាហារជូនពួកគាត់កុំឱ្យពួកគាត់ខ្វះស្បៀងអាហារក្នុងពេលធ្វើចត្តាឡីស័ក»។ នេះជាការលើកឡើងរបស់ប្រមុខរដ្ឋាភិបាល។
កាលពីថ្ងៃទី១១ វិច្ឆិកា សម្តេច ហ៊ុន សែន បានប្រាប់ឲ្យក្រសួងសុខាភិបាលប្រគល់ម៉ាសក្រណាត់ចំនួន២លានម៉ាស ឲ្យទៅអភិបាលរាជធានីភ្នំពេញ សម្រាប់ចែកជូនដល់ពលរដ្ឋដែលខ្វះខាត។
ការចែកម៉ាសរបស់រដ្ឋាភិបាលនេះ ដើម្បីទប់ស្កាត់ជំងឺកូវីដ-១៩ កុំឲ្យជ្រៀតចូលទៅសហគមន៍។ ជាពិសេសទប់ស្កាត់ហានិភ័យ ដែលអាចកើតចេញពីព្រឹត្តិការណ៍ ៣ វិច្ឆិកា។ គិតមកដល់ពេលនេះ ក្រសួងសុខាភិបាលបានធ្វើតេស្តលើមនុស្សជាង១៤០០នាក់ ដែលបានប្រាស្រ័យទាក់ទងផ្ទាល់ និងប្រយោលជាមួយលោក Peter Szijjarto រដ្ឋមន្ត្រីការបរទេសហុងគ្រីកាលពីថ្ងៃទី៣ ខែវិច្ឆិកា។ ក្នុងចំណោមអ្នកទាំងនោះ មានមនុស្ស៤នាក់ មានវិជ្ជមានកូវីដ-១៩។
គិតត្រឹមថ្ងៃទី១២ ខែវិច្ឆិកា កម្ពុជាមានអ្នកឆ្លងជំងឺកូវីដ-១៩ ចំនួន៣០១នាក់ ក្នុងនោះមាន ២៨៨នាក់ បានជាសះស្បើយ និង១៣នាក់ទៀត កំពុងព្យាបាលនៅមន្ទីរពេទ្យមិត្តភាពខ្មែរ-សូវៀត៕