ហ្វាំងឡង់បានយកឈ្នះម្ចាស់ជើងឯក World Cup បារាំង ២-០ ក្នុងការប្រកួតមិត្តភាពអន្តរជាតិ។ Cristiano Ronaldo នៅតែអាចបន្តរកគ្រាប់បាល់ក្នុងជ័យជម្នះរបស់ព័រទុយហ្គាល់លើអង់ដូរ៉ាក្នុងលទ្ធផល ៧-០។
ខ្សែប្រយុទ្ធវ័យក្មេង Marcus Forss និង Onni Valakari ស៊ុតម្នាក់មួយគ្រាប់ដើម្បីជួយក្រុមភ្ញៀវហ្វាំងឡង់ទទួលបានជ័យជម្នះលើម្ចាស់ផ្ទះបារាំងនៅកីឡដ្ឋាន Stade de France ក្នុងក្រុងប៉ារីសនៅយប់ថ្ងៃទី១១ ខែវិច្ឆិកា។
ក្រុមមាន់គកបារាំងដែលសម្បូរទៅដោយ SuperStar ជាច្រើនដូចជា Paul Pogba របស់ Manchester United, Lucas Digne របស់ Everton និង Antoine Griezmann របស់ Barcelona ជាដើមនោះមិនអាចរកគ្រាប់បាល់ឲ្យក្រុមឡើយ និងថែមទាំងធ្វើឲ្យក្រុមលោក Didier Deschamps រងបរាជ័យជាលើកដំបូងក្រោមថ្វីជើងក្រុមដែលស្ថិតនៅចំណាត់ថ្នាក់ទី ៦០ ពិភពលោកនេះ។
ដោយឡែកព័រទុយហ្គាល់ឯណោះវិញ បានយកជ័យជម្នះលើក្រុមអង់ដូរ៉ាដល់ទៅ ៧-០ ខណៈខ្សែប្រយុទ្ធឆ្នើម Ronaldo ដែលអវត្តមានឲ្យក្រុមប៉ុន្មានប្រកួតចុងក្រោយដោយសារឆ្លង COVID-19 ក៏រកបានគ្រាប់ផងដែរ។
Ronaldo ប្រធានក្រុមជម្រើសជាតិព័រទុយហ្គាល់នឹងត្រូវដឹកនាំក្រុមទទួលភ្ញៀវបារាំងក្នុងការប្រកួតពានរង្វាន់ Nations League ក្នុងលីគ A ពូល២ នៅរាត្រីថ្ងៃទី១៤ ខែវិច្ឆិកានេះ។ ក្នុងពូលនេះព័រទុយហ្គាល់ឈរកំពូលតារាងមាន១០ពិន្ទុស្មើគ្នាជាមួយបារាំងដែលនៅនៅលេខ២។ ក្រូអាស៊ីនៅលេខ៣មាន៣ពិន្ទុ ខណៈស៊ុយអែតគ្មានពិន្ទុរាប់នៅឡើយក្រោយឆ្លងកាត់៤ប្រកួតកន្លងមក៕
លទ្ធផលការប្រកួតមិត្តភាពអន្តរជាតិគូដទៃទៀត៖
រូម៉ានី ៥ – ៣ បេឡារុស
សាំងម៉ារ៉ាំង ០ – ៣ ឡេតូនី
តួកគី ៣ - ៣ ក្រូអាស៊ី
ដាណឺម៉ាក ២ - ០ ស៊ុយអែត
លុចសំបួ ០ - ៣ អូទ្រីស
បែលហ្ស៊ិក ២ - ១ ស្វ៊ីស
អាល្លឺម៉ង់ ១ - ០ ឆែក
អ៊ីតាលី ៤ – ០ អ៊ីស្តូនី
ហូឡង់ ១ - ១ អេស្ប៉ាញ
ប៉ូឡូញ ២ - ០ អ៊ុយក្រែន
ស្លូវ៉ានី ០ - ០ អាហ្សែបៃហ្សង់