អន្តរជាតិ
លោក បៃឌិន ជ្រើសរើសទីប្រឹក្សាជើងចាស់ Ron Klain ជាអនាគតប្រធានបុគ្គលិកសេតវិមាន
លោក Klain កាលពីឆ្នាំ២០១៤ អំឡុងពេលធ្វើជាអ្នកសម្របសម្រួលឆ្លើយតបជំងឺអេប៉ូឡាក្នុងរដ្ឋបាលអូបាម៉ា ដោយលោកអនុប្រធានាធិបតី ចូ បៃឌិន អង្គុយក្បែរ។រូបភាព៖ AFP
×![]()
ប្រធានាធិបតីទើបជាប់ឆ្នោត ចូ បៃឌិន សម្រេចជ្រើសរើសលោក Ron Klain ដែលធ្លាប់ធ្វើជាទីប្រឹក្សាលោកយូរឆ្នាំមកហើយ ដើម្បីឡើងជាប្រធានបុគ្គលិកសេតវិមានក្នុងអាណត្តិលោកនាពេលខាងមុខ។ លោក Klain ជាទីប្រឹក្សាដែលមានបទពិសោធចាស់វស្សាម្នាក់របស់លោក បៃឌិន ដែលស័ក្ដិសមនឹងតំណែងកំពូលនេះ។
ក្នុងសេចក្តីថ្លែងការណ៍នៅថ្ងៃទី ១១ ខែវិច្ឆិកា លោក បៃឌិន លើកឡើងថា លោកបានសម្រេចរើសយកលោក Klain សម្រាប់តំណែងជានាយខុទ្ទកាល័យសេតវិមាន ដ្បិតបទពិសោធយូរឆ្នាំរបស់លោកក្នុងសេតវិមាន ធ្វើឲ្យលោកស័ក្តិសមបំផុតសម្រាប់តំណែងនេះ។
«បទពិសោធចម្រុះនិងជ្រាលជ្រៅរបស់លោក [Klain] និងសមត្ថភាពអាចធ្វើការជាមួយមនុស្សទាំងអស់គ្រប់និន្នាការនយោបាយ ជាក់ច្បាស់ណាស់ គឺជាអ្វីដែលខ្ញុំត្រូវការសម្រាប់តួនាទីជាប្រធានបុគ្គលិកសេតវិមាន ព្រោះថា យើងប្រឈមមុខវិបត្តិនាពេលបច្ចុប្បន្ន ហើយត្រូវរួបរួមប្រទេសយើងឡើងវិញ»។ អនាគតប្រធានាធិបតីទី៤៦អាមេរិក រៀបរាប់បែបនេះ។
ក្នុងសេចក្តីថ្លែងការណ៍ដដែលនេះ លោក Klain បាននិយាយថា លោកមានកិត្តិយសក្រៃលែងដែលប្រធានាធិបតីទើបជាប់ឆ្នោត បៃឌិន មានទំនុកចិត្តលើរូបលោក ហើយលោកក៏ទន្ទឹងរង់ចាំធ្វើការជាមួយលោកបៃឌិន និងអនុប្រធានាធិបតីទើបជាប់ឆ្នោត កាម៉ាឡា ហារីស ដោះស្រាយបញ្ហារបស់ប្រទេសផងដែរ។
លោក Klain ធ្លាប់កាន់តំណែងជាអ្នកសម្របសម្រួលក្នុងប្រតិបត្តិការឆ្លើយតបប្រឆាំងជំងឺអេបូឡា (Ebola) របស់រដ្ឋបាលលោកប្រធានាធិបតី បារ៉ាក់ អូបាម៉ា អំឡុងការផ្ទុះរាលដាលឆ្នាំ២០១៤ ហើយលោកក៏បានដើរតួយ៉ាងសំខាន់ក្នុងរៀបរៀងនិងអនុវត្តផែនការស្តារសេដ្ឋកិច្ចរបស់រដ្ឋបាលលោកអូបាម៉ាក្នុងឆ្នាំ២០០៩ផងដែរ។
ការរើសយកបុគ្គលមានពិសោធន៍ក្រាស់ក្រែលក្នុងបញ្ហាជំងឺរាតត្បាតនិងស្តារសេដ្ឋកិច្ចឡើងបែបនេះ ស្ដែងឲ្យឃើញនូវឆន្ទៈរបស់អនាគតរដ្ឋបាលលោក បៃឌិន ក្នុងការដាក់ប្រយុទ្ធជំងឺកូវីដ-១៩ ជាអាទិភាពចម្បង និងស្រោចស្រង់សេដ្ឋកិច្ចក្រោយកូវីដ-១៩។
សូមបញ្ជាក់ថា លោក Klain ធ្លាប់ធ្វើជាទីប្រឹក្សាផ្នែកច្បាប់របស់លោក ចូ បៃឌិន ចាប់ពីឆ្នាំ១៩៨៨-៩២ នៅពេលលោក បៃឌិន ធ្វើជាប្រធានគណៈកម្មាធិការនីតិកម្មរបស់ព្រឹទ្ធសភាអាមេរិក។ លោកក៏ជាទីប្រឹក្សាម្នាក់និងជាអ្នកសរសេរសុន្ទរកថាឲ្យលោកបៃឌិនក្នុងពេលឃោសនាបោះឆ្នោតឆ្នាំ ២០០៨ផងដែរ។
ចុងក្រោយ លោក Klain បានឡើងធ្វើជាប្រធានបុគ្គលិករបស់លោកបៃឌិន ចាប់ពីឆ្នាំ២០០៩-១១ អំឡុងអាណត្តិលោកជាអនុប្រធានាធិបតីក្នុងរដ្ឋបាលលោកអូបាម៉ា។ ហើយមុនលោកបៃឌិន លោកKlain ក៏ធ្លាប់ជាប្រធានបុគ្គលិកឲ្យអនុប្រធានាធិបតីអាមេរិក Al Gore នៅពាក់កណ្ដាលទសវត្សរ៍ឆ្នាំ១៩៩០ផងដែរ៕
Tag:
Ron Klain
បោះឆ្នោតអាមេរិក
ចូ បៃឌិន
© រក្សាសិទ្ធិដោយ thmeythmey.com
