COVID-19
អន្តរជាតិ
ការសិក្សា អ្នកសះស្បើយពី COVID-19 ចំនួន២០ភាគរយ ប្រឈមមុខជំងឺផ្លូវចិត្ត អ្នកជំងឺCOVID-19។ រូបភាព៖ AFP
× អ្នកដែលជាសះស្បើយពីជំងឺ COVID-19 អាចនឹងប្រឈមជំងឺផ្លូវចិត្ត។ នេះជាការលើកឡើងរបស់គ្រូពេទ្យផ្នែកជំងឺផ្លូវចិត្ត បន្ទាប់ពីលទ្ធផលនៃការសិក្សាមួយបង្ហាញថាមនុស្សចំនួន២០ភាគរយ ដែលឆ្លងជំងឺ COVID-19 ត្រូវបានរកឃើញថា មានរោគសញ្ញាផ្លូវចិត្តមិនប្រក្រតីក្នុងរយៈពេល៩០ថ្ងៃនៃការឆ្លងជំងឺនេះ។
រោគសញ្ញាផ្លូវចិត្តមិនប្រក្រតីដូចជាការថប់អារម្មណ៍ បាក់ទឹកចិត្ត និងគេងមិនលក់ ត្រូវបានអ្នកស្រាវជ្រាវរកឃើញថា ជាបញ្ហាផ្លូវចិត្តយ៉ាងចម្បងក្នុងចំណោមអ្នកដែលជាសះស្បើយពីជំងឺCOVID-19។ ក្រៅតែពីភាពមិនប្រក្រតីទាំង៣ខាងលើនេះ អ្នកវិទ្យាសាស្ត្រក៏រកឃើញថា អ្នកដែលសះស្បើយក៏ប្រឈមនឹងហានិភ័យខ្ពស់ចំពោះជំងឺបាត់បង់ការចងចាំផងដែរ។ នេះបើតាមការស្រាវជ្រាវដែលធ្វើឡើងដោយសាកលវិទ្យាល័យ Oxford ។
«មនុស្សទាំងឡាយនាំគ្នាបារម្ភពីការប្រឈមសុខភាពផ្លូវចិត្តរបស់អ្នកជាសះស្បើយជំងឺ COVID-19 ហើយលទ្ធផលនៃការសិក្សារបស់យើងបង្ហាញថា វាអាចទំនងនឹងមានមែន»។នេះជាការបញ្ជាក់ លោកPaul Harrison សាស្ត្រាចារ្យសាកលវិទ្យាល័យ Oxford។ លោកបញ្ជាក់ថា វេជ្ជបណ្ឌិត និងអ្នកវិទ្យាសាស្ត្រ ត្រូវតែប្រញាប់ប្រញាល់ស៊ើបអង្កេតពីមូលហេតុ និងព្យាបាលភាពមិនប្រក្រតីផ្លូវចិត្តដែលកើតឡើងក្រោយ COVID-19 បែបនេះ។
ការស្រាវជ្រាវដែលចុះផ្សាយនៅក្នុងទស្សនាវដ្តី The Lancet បង្ហាញថា ការស្រាវជ្រាវនេះ វិភាគទៅលើទិន្ន័យសុខភាពរបស់មនុស្ស៦៩លាននាក់ នៅអាមេរិក ដែលក្នុងនោះមាន៦ម៉ឺន២ពាន់នាក់ដែលផ្ទុកជំងឺ COVID-19 ។
ការស្រាវជ្រាវបង្ហាញថា ក្នុងរយៈពេល៣ខែក្រោយពេលរកឃើញថាផ្ទុក COVID-19 មនុស្សម្នាក់ក្នុងចំណោម៥នាក់ត មានអាការៈថប់អារម្មណ៍ បាក់ទឹកចិត្ត ឬគេងមិនលក់។ ចំនួននេះ ជាចំនួនទ្វេដងធៀបទៅនឹងក្រុមមនុស្សដែលមិនឆ្លងជំងឺ COVID-19 ។ ស្របពេលជាមួយគ្នានេះ ការសិក្សាបង្ហាញទៀតថា អ្នកដែលមានជំងឺផ្លូវចិត្តស្រាប់ ប្រឈមទៅនឹងការឆ្លងជំងឺ COVID-19 ៦៥ ភាគរយលើសអ្នកដែលមានអាការៈធម្មតា។
បន្ថែមពីនេះ មានភស្តុតាងកាន់តែច្រើនដែលបង្ហាញថា COVID-19 ប៉ះពាល់ដល់ខួរក្បាលនិងស្មារតី ដែលបង្កើនការប្រឈមនូវជំងឺផ្លូវចិត្តជាច្រើន។ នេះអាចបណ្តាលមកពីការរួមផ្សំសម្ពាធផ្លូវចិត្តដែលទាក់ទងនឹងជំងឺឆ្លង ក៏ដូចជាការប៉ះពាល់ដល់រាងកាយដោយសារជំងឺ។ នេះជាការអះអាងរបស់លោក Michael Bloomfield អ្នកប្រឹក្សាផ្នែកសុខភាពផ្លូវចិត្តនៅសាកលវិទ្យាល័យ College London។
ស្របគ្នានេះដែរ លោកសាស្ត្រាចារ្យ Simon Wessely នៃសាកលវិទ្យាល័យ College London បន្តថា COVID-19 ប៉ះពាល់ដល់ប្រព័ន្ធប្រសាទកណ្តាល ដែលនឹងអាចបង្កើនហានិភ័យនៃភាពមិនប្រក្រតីផ្លូវចិត្ត។ លោកបន្តថា ការស្រាវជ្រាវនេះបញ្ជាក់ថា ការបង្កើនហានិភ័យនៃភាពមិនប្រក្រតីផ្លូវចិត្តកើនឡើងដោយសុខភាពមិនល្អ៕
© រក្សាសិទ្ធិដោយ thmeythmey.com