កីឡាអន្តរជាតិ
អន្តរជាតិ
មេ IOC ទៅពិនិត្យការរៀបចំអូឡាំពិក និងជឿជប៉ុនផ្ដល់សុវត្ថិភាពដល់អ្នកចូលរួម
× លោក Thomas Bach ប្រធានគណៈកម្មាធិការអូឡាំពិកអន្តរជាតិ (IOC) នឹងធ្វើដំណើរទៅកាន់ក្រុងតូក្យូរយៈពេល៣ថ្ងៃនៅសប្តាហ៍ក្រោយ ដើម្បីពិនិត្យមើលការត្រៀមរៀបចំព្រឹត្តិការណ៍កីឡាអូឡាំពិកឆ្នាំ ២០២០ ដែលត្រូវបានពន្យារទៅឆ្នាំ២០២១។ លោក Bach នៅតែគាំទ្រឲ្យបន្តដឹកនាំកីឡានេះបើទោះនៅមាន COVID-19 ក្តី និងថែមទាំងជឿជាក់លើជប៉ុនក្នុងការផ្តល់សុវត្ថិភាពដល់អ្នកចូលរួមទាំងអស់។
ប្រធាន IOC បានប្រាប់សន្និសីទសារព័ត៌មាននៅថ្ងៃទី១១ ខែវិច្ឆិកាថា លោកនឹងស្នាក់នៅទីក្រុងតូក្យូចន្លោះថ្ងៃទី ១៥-១៨ ខែវិច្ឆិកា។ ប៉ុន្តែមិនបានផ្តល់ព័ត៌មានលម្អិត ស្តីពីកិច្ចប្រជុំជាមួយនាយករដ្ឋមន្ត្រីជប៉ុនថ្មី លោក Yoshihide Suga ជុំវិញកីឡាអូឡាំពិកនេះ ឬក៏អត់នោះទេ។
«ដំណើរទៅកាន់ប្រទេសជប៉ុននេះ មានសារសំខាន់ណាស់ ពីព្រោះយើងកំពុងឈានដល់ដំណាក់កាលដ៏សំខាន់មួយ ជាមួយវិធានការប្រឆាំង COVID-19 ដើម្បីធានាលើដំណើរការអូឡាំពិក ដែលត្រូវធ្វើនៅឆ្នាំក្រោយ។ ខ្ញុំសង្ឃឹមថា បន្ទាប់ពីដំណើរទស្សនកិច្ចនេះ យើងអាចផ្តល់ទំនុកចិត្តថែមទៀត ដល់អ្នកចូលរួមទាំងអស់ អំពីបរិស្ថានដែលមានសុវត្ថិភាព ដែលពួកគេនឹងបានឃើញក្នុងរយៈពេលប្រហែល ៩ ខែ ចាប់ពីពេលនេះតទៅ»។ លោក Bach អះអាងដូច្នេះ តាមរយៈការចុះផ្សាយ របស់ទីភ្នាក់ងារព័ត៌មាន Reuters។
IOC និងម្ចាស់ផ្ទះជប៉ុន បានសម្រេចចិត្តជាប្រវត្តិសាស្ត្រ ក្នុងការពន្យារពេលធ្វើអូឡាំពិក រយៈពេលមួយឆ្នាំកាលពីខែមីនា ដោយសារការរាតត្បាតនៃជំងឺ COVID-19 ដែលបានសម្លាប់មនុស្សជាងមួយលាននាក់ ជុំវិញពិភពលោក។ ព្រឹត្តិការណ៍កីឡាធំជាងគេលើលោកនេះ នឹងត្រូវប្តូរទៅធ្វើនៅថ្ងៃទី២៣ ខែកក្កដា ដល់ថ្ងៃទី៨ ខែសីហា ឆ្នាំ២០២១។
ប្រធាន IOC សញ្ជាតិអាល្លឺម៉ង់ បន្ថែមថាអ្នកចូលរួមទស្សនា ឬភ្ញៀវអន្តរជាតិ នឹងចូលរួមក្នុងព្រឹត្តិការណ៍អូឡាំពិកនៅខែកក្កដា និងសីហា ដោយទំនុកចិត្ត ខណៈជប៉ុននឹងរៀបចំឲ្យមានសុវត្ថិភាព នៅគ្រប់ទីតាំងប្រកួតទាំងអស់៕
Tag:
IOC
Olympic
Thomas Bach
© រក្សាសិទ្ធិដោយ thmeythmey.com