សម្ដេច ស ខេង ប្រាប់ឱ្យពលរដ្ឋរាយការណ៍ទៅសម្ដេចផ្ទាល់តាមហ្វេសប៊ុក បើសិនអាជ្ញាធរមូលដ្ឋាន មិនអើពើដោះស្រាយ

ជាតិ

នយោបាយជាតិ

សម្ដេច ស ខេង ប្រាប់ឱ្យពលរដ្ឋរាយការណ៍ទៅសម្ដេចផ្ទាល់តាមហ្វេសប៊ុក បើសិនអាជ្ញាធរមូលដ្ឋាន មិនអើពើដោះស្រាយ

12, Nov 2020 , 4:04 pm

រូបភាព

សម្ដេច ស ខេង រដ្ឋមន្រ្តីក្រសួងមហាផ្ទៃ ថ្លែងនៅក្នុងពិធីចុះសួរសុខទុក្ខ និងចែកស្រូវពូជ ជូនប្រជាពលរដ្ឋខ្វះខាត នៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង នាព្រឹកថ្ងៃទី១២ វិច្ឆិកា ២០២០

ដោយ: រំដួល ចិត្រា (Romdoul Chetra)

ភ្នំពេញ៖ ពលរដ្ឋអាចរាយការណ៍ទៅសម្ដេចផ្ទាល់ តាមរយៈហ្វេសប៊ុក បើសិនជាមានបញ្ហានៅមូលដ្ឋានហើយ អាជ្ញាធរមិនព្រមដោះស្រាយ។ សម្ដេច ស ខេង ថ្លែងបែបនេះ នៅក្នុងពិធីចុះសួរសុខទុក្ខ និងចែកស្រូវពូជ ជូនប្រជាពលរដ្ឋនៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង នាព្រឹកថ្ងៃទី១២ វិច្ឆិកា។

សម្ដេច ស ខេង បានបញ្ជាក់ថា បើពលរដ្ឋរាយការណ៍ទៅសមត្ថកិច្ច និងអាជ្ញាធរមូលដ្ឋានហើយ ប៉ុន្តែពួកគេមិនព្រមដោះស្រាយបញ្ហាជូននោះ ពលរដ្ឋអាចប្រើប្រាស់បណ្ដេញសង្គម ដូចជាហ្វេសប៊ុកជាដើម បង្ហោះ ឬរាយការណ៍ព័ត៌មានចូលផេកហ្វេសប៊ុកសម្ដេចផ្ទាល់ ដើម្បីទទួលបានដំណោះស្រាយ។

ថ្លែងចំពោះមុខប្រជាពលរដ្ឋនៅស្រុកបាភ្នំ ខេត្តព្រៃវែង រដ្ឋមន្ត្រីក្រសួងមហាផ្ទៃរូបនេះ បាននិយាយដូច្នេះថា៖«ឥឡូវនេះស្រួលណាស់ បើថារាយការណ៍ទៅប៉ូលិសប៉ុស្តិ៍ហើយ ប៉ូលិសប៉ុស្តិ៍ព្រងើយកន្តើយ មិនចាប់អារម្មណ៍ មិនចាត់វិធានការ យើងមានបណ្ដាញហ្វេសប៊ុក មាន(បណ្ដាញ)ព័ត៌មានសង្គមច្រើនណាស់ ហើយខ្ញុំក៏មានហ្វេសប៊ុក (ពលរដ្ឋបញ្ចូន)ដាក់មក(ហ្វេសប៊ុកសម្ដេច)តាមហ្នឹងទៅ។ អាហ្នឹងគឺវា(អាចមានដំណោះស្រាយ)លឿនទាំងអស់គ្នា»។

សូមស្ដាប់ប្រសាសន៍សម្ដេច ស ខេ រដ្ឋមន្រ្តីក្រសួងមហាផ្ទៃ៖

សម្ដេច ស ខេង បានរៀបចំក្រុមការងារមួយ តាមដានរាល់ការស្នើសុំអន្តរាគមន៍ និងប្ដឹងផ្ដល់នានា របស់ពលរដ្ឋ នៅលើហ្វេសប៊ុកសម្ដេចផ្ទាល់។ «ព្រោះខ្ញុំចាត់ឱ្យប្រមូលព័ត៌មានហ្នឹង គឺមិនរើសអើង គេហៅថាមិនបែងចែក(និន្នាការនយោបាយ)ទេ ។ ព័ត៌មានតាមហ្វេសប៊ុក ក៏ចាត់ទុកថាជាព័ត៌មាន, ព័ត៌មានដោយបណ្ដឹងជាលាយលក្ខអក្សរក៏ជាព័ត៌មាន , ព័ត៌មានតាមទូរទស្សន៍ តាមវិទ្យុ និយាយរួមគឺថាយើងប្រមូលយកមកទាំងអស់ ដើម្បីយកទៅ កាលណា អា(បញ្ហា)ណាពាក់ព័ន្ធយើង គឺត្រូវដោះស្រាយ។ យើងចុះមើល ឆែកមើលថា តើរឿងហ្នឹង វាពិតឬមិនពិត»។ នេះជាការបញ្ជាក់របស់សម្ដេច ស ខេង ដែលបន្ថែមថា ព័ត៌មានតាមបណ្ដាញសង្គមហ្វេសប៊ុក និងតាមប្រព័ន្ធផ្សេងៗ ដែលសម្ដេចទទួលបាននោះ ភាគច្រើនជាព័ត៌មានពិត ចន្លោះពី៨០ទៅ៩០ភាគរយ។

ដោយសារមើលឃើញថា ព័ត៌មានដែលខ្លួនទទួលបានពីបណ្ដាញព័ត៌មានផ្សេងៗ ភាគច្រើនជារឿងពិតនេះ ទើបសម្ដេច ស ខេង ជំរុញឱ្យពលរដ្ឋរាយការណ៍ទៅសម្ដេច ឬសម្ដេចនាយករដ្ឋមន្ត្រី ហ៊ុន សែន ផ្ទាល់ តាមរយៈបណ្ដាញហ្វេសប៊ុកនេះ។

ប្រមុខក្រសួងមហាផ្ទៃរូបនេះ បាននិយាយសង្កត់ធ្ងន់ដូច្នេះថា៖«បើប្ដឹង(អាជ្ញាធរ)ផ្ទាល់ហើយ មិនយកចិត្តទុកដាក់ យើងមានលទ្ធភាព ហើយអត់ខុសច្បាប់ទេ។ តិចថា ប្ដឹងទៅនាយករដ្ឋមន្ត្រីខុស (គឺអត់ខុសទេ)ឱ្យតែយើងបានប្ដឹងអ្នកនៅហ្នឹងកន្លែងហើយ តែអ្នកនៅហ្នឹងកន្លែងមិនព្រមដោះស្រាយ។ ហើយប្ដឹងទៅឧបនាយករដ្ឋមន្ត្រី ថាខុស ប្ដឹងទៅរដ្ឋមន្ត្រីថាខុស គឺអត់ខុសទេ»។

អះអាងបែបនេះហើយ សម្ដេច ស ខេង ក៏ជំរុញឱ្យមន្ត្រី និងអាជ្ញាធរមូលដ្ឋាន ចុះដោះស្រាយបញ្ហាប្រជាពលរដ្ឋភ្លាមៗ នៅពេលដែលឃើញពួកគេបង្ហោះព័ត៌មាន ឬបញ្ហាអ្វីមួយនៅលើបណ្ដាញបច្ចេកវិទ្យាសង្គម ដោយមិនចាំបាច់ទាល់តែពលរដ្ឋមកប្ដឹងផ្ទាល់ ដូចមុននោះទេ។

កន្លងមកសម្ដេចនាយករដ្ឋមន្ត្រី ហ៊ុន សែន ក៏ធ្លាប់ប្រាប់ឱ្យពលរដ្ឋដែលជួបប្រទះនូវបញ្ហាអ្វីមួយនោះ ផ្ញើសារសុំអន្តរាគមន៍នៅលើបណ្ដាញហ្វេសប៊ុកសម្ដេចផ្ទាល់ផងដែរ៕