អង់គ្លេស ពិចារណាដាក់ទណ្ឌកម្មមន្ត្រីចិននិងហុងកុង ក្រោយការដកតំណែងសមាជិកសភាបួននាក់

សង្គមអន្តរជាតិ

អន្តរជាតិ

អង់គ្លេស ពិចារណាដាក់ទណ្ឌកម្មមន្ត្រីចិននិងហុងកុង ក្រោយការដកតំណែងសមាជិកសភាបួននាក់

13, Nov 2020 , 11:51 am

រូបភាព

លោកDominic Raab រដ្ឋមន្ត្រីការបរទេសអង់គ្លេស។ រូបភាព៖AFP

ដោយ:

រដ្ឋមន្ត្រីការបរទេសអង់គ្លេស Dominic Raab បានរិះគន់បញ្ញត្តិថ្មីដែលសភាចិនទើបអនុម័ត ដែលអនុញ្ញាតឲ្យហុងកុងដកតំណែងតំណាងរាស្ត្រហុងកុង។ លោក Raab ចាត់ទុកវិធានថ្មី ជាការបំពានទៅលើសេចក្តីថ្លែងការណ៍រួមអង់គ្លេស-ចិន ស្តីពីការប្រគល់កោះហុងកុងទៅចិនវិញ ជាមួយការរក្សាស្វ័យភាពកម្រិតខ្ពស់។ អង់គ្លេស អាមេរិក និងសហភាពអឺរ៉ុបកំពុងពិចារណាវិធានការតបទៅនឹងការចេញច្បាប់ថ្មីនេះ។

ក្នុងសេចក្ដីថ្លែងការណ៍ថ្ងៃទី១២ ខែវិច្ឆិកា លោក Dominic Raab រដ្ឋមន្ត្រីការបរទេសអង់គ្លេស អះអាងថា ដំណោះស្រាយរបស់សភាចិនក្នុងការកំណត់លក្ខន្តិកៈសមាជិកសភាហុងកុង ជាការបំពានកិច្ចព្រមព្រៀងទ្វេភាគីពាក់ព័ន្ធការផ្ទេរហុងកុង។ លោកអះអាង ថា អង់គ្លេស និងសម្ព័ន្ធមិត្តនឹងធ្វើគ្រប់បែបយ៉ាងដើម្បីឲ្យចិនគោរពតាមកាតព្វកិច្ចនៃកិច្ចព្រមព្រៀងខាងលើ។ នេះបើតាមសារព័ត៌មាន The Guardian។

«ជាថ្មីម្តងទៀត ចិនមិនគោរពកិច្ចសន្យា និងធ្វើឲ្យប៉ះពាល់ដល់ស្វ័យភាពកម្រិតខ្ពស់របស់ហុងកុង»។ លោក Raab បញ្ជាក់បែបនេះ រួចបន្តថា អង់គ្លេស នឹងនៅជាមួយពលរដ្ឋហុងកុង ក៏ដូចជាលើកឡើងពីការបំពានសិទ្ធិ និងសេរីភាព។

ដំណោះស្រាយថ្មីដែលអនុម័តដោយសភាចិនកាលពីថ្ងៃទី១១ វិច្ឆិកា បើកផ្លូវឲ្យសភាហុងកុងដកហូតតំណាងរាស្ត្ររូបណាដែលមិនស្នេហាជាតិ គាំទ្រឯករាជ្យ ឬការផ្ដាច់ខ្លួន។ ភ្លាមៗ សមាជិកសភាហុងកុងបួននាក់ ត្រូវបានដកតំណែង។ ក្រោយមក សមាជិកសភាដែលមាននិន្នាការរកប្រជាធិបតេយ្យ១៥នាក់ទៀត ក៏លាលែងពីតំណែងទាំងអស់គ្នា។

អង់គ្លេស លើកឡើងថា ការចេញលក្ខខណ្ឌខាងលើ ជាទម្រង់នៃការបៀតបៀន និងបំបិទសិទ្ធិអ្នកដែលរិះគន់គោលនយោបាយរបស់ចិន ត្រូវបានតាក់តែងដោយមិនមានលក្ខណៈមិនច្បាស់លាស់ ដែលអាចបកស្រាយបានយ៉ាងទូលំទូលាយ។ ក្រសួងការបរទេសអង់គ្លេស ត្រូវបានរំពឹងថា នឹងដាក់ទណ្ឌកម្មលើមន្ត្រីហុងកុងចំនួន៤រូប ប៉ុន្តែមិនពុំបានលម្អិតពីអត្តសញ្ញាណបុគ្គលទាំងនោះឡើយ។ អង់គ្លេស ក៏កំពុងធ្វើការជាមួយអាមេរិកដើម្បីដាក់ទណ្ឌកម្មតបទៅលើមន្ត្រីចិន និងហុងកុងផងដែរ។

រាប់បញ្ចូលទាំងលើកនេះ អង់គ្លេសអះអាងថា ចិនបានបំពានកិច្ចព្រមព្រៀងឆ្នាំ១៩៩៧ ៣ដងហើយ ពោលលើកទី១ ក្នុងឆ្នាំ២០០៦ លើកទី២ក្នុងឆ្នាំ២០២០ ក្រោយអនុម័តច្បាប់សន្តិសុខជាតិ និងលើកទី៣គឺច្បាប់ដកហូតតំណែងតំណាងរាស្ត្រនេះ។

ក្រោយពេលច្បាប់នេះចេញជាមកភ្លាម ក្រសួងការបរទេសអង់គ្លេស ក៏បានកោះហៅឯកអគ្គរដ្ឋទូតចិនមកសួរនាំផងដែរ។ លោក Nigel Adams មន្ត្រីទទួលបន្ទុកកិច្ចការអាស៊ីអះអាងថា អង់គ្លេសកំពុងពិចារណាច្បាប់ទណ្ឌកម្មដែលស្រដៀងនឹងច្បាប់ Magnitsky របស់អាមេរិក។ លោក ក៏បង្ហើបផងដែរថា តំណាងរាស្ត្រអង់គ្លេសក៏បានសួរនាំពីលទ្ធភាពក្នុងការដាក់ទណ្ឌកម្មលើលោកស្រី Carrie Lam ប្រមុខដឹកនាំទឹកដីហុងកុង។

ក្រៅអង់គ្លេស អាមេរិក និងសហភាពអឺរ៉ុប ក៏ព្រមានចាត់វិធានការលើហុងកុងដែរ។ លោក Robert O’Brien ទីប្រឹក្សាសន្តិសុខប្រធានាធិបីអាមេរិក និយាយថា អាមេរិកនឹងបន្តកំណត់អត្តសញ្ញាណ និងដាក់ទណ្ឌកម្មអ្នកដែលទទួលខុសត្រូវចំពោះការបំបិទសិទ្ធិពលរដ្ឋហុងកុង។ សហភាពអឺរ៉ុប វិញអះអាងថា នឹងពិនិត្យលើវិធានការដែលខ្លួនមាននៅចុងឆ្នាំ ដើម្បីតបទៅនឹងសកម្មភាពរបស់ចិន ដែលជាការប៉ះពាល់យ៉ាងធ្ងន់ធ្ងរលើនយោបាយពហុនិយម និងសេរីភាពបញ្ចេញមតិនៅហុងកុង៕