អន្តរជាតិ
ប្រធានាធិបតី បារ៉ាក់ អូបាម៉ា និងប្រធានាធិបតីទើបជាប់ឆ្នោត (កាលនោះ) ដូណាល់ ត្រាំ ចាប់ដៃគ្នា អំឡុងជំនួបពិភាក្សារឿងផ្ទេរអំណាចនៅសេតវិមានអាមេរិក កាលពីខែវិច្ឆិកា ឆ្នាំ២០១៦ ។ រូបភាព៖ AFP
×![]()
អតីតប្រធានាធិបតី២អាណត្តិ លោក បារ៉ាក់ អូបាម៉ា បានរិះគន់មន្ត្រីបក្សសាធារណរដ្ឋដែលយល់ស្របទាំងងងឹតងងល់នឹងការអះអាងរបស់លោក ដូណាល់ ត្រាំ ថា មានការលួចបន្លំការបោះឆ្នោត ទោះលទ្ធផលបង្ហាញច្បាស់ថា លោក បៃឌិន ឈ្នះក៏ដោយក្ដី។ លោក អូបាម៉ា ចាត់ទុកទង្វើលោកត្រាំបែបនេះថា បង្កផលប៉ះពាល់ដល់ប្រជាធិបតេយ្យ។ 
ក្នុងកិច្ចសម្ភាសជាមួយទូរទស្សន៍ CBS នៅថ្ងៃទី ១២ ខែវិច្ឆិកា លោក បារ៉ាក់ អូបាម៉ា បញ្ជាក់ថា ការចោទប្រកាន់គ្មានភស្តុតាងរបស់លោក ដូណាល់ ត្រាំ ក៏ព្រោះតែលោកប្រធានាធិបតីមិនចូលចិត្តចាញ់ ហើយមិនធ្លាប់សារភាពថាចាញ់។
សម្រាប់លោក អូបាម៉ា ទង្វើនេះមិនត្រឹមតែបង្កអន្តរាយដល់អនាគតរដ្ឋបាលលោក បៃឌិន ប៉ុណ្ណោះទេ តែក៏បំផ្លាញប្រព័ន្ធលទ្ធិប្រជាធិបតេយ្យរបស់សហរដ្ឋអាមេរិកទៀតផង។ ត្រង់ចំណុចនេះ លោកសង្កត់ធ្ងន់ថា៖«នេះជាមាគ៌ាដ៏គ្រោះថ្នាក់មួយ»។
ប្រធានាធិបតីស្បែកខ្មៅដំបូងរបស់អាមេរិករូបនេះ លើកឡើងទៀតថា លោក បៃឌិន ច្បាស់ណាស់គឺជាអ្នកឈ្នះការបោះឆ្នោតប្រធានាធិបតីអាណត្តិថ្មីនេះ។ ជាក់ស្តែង បើមើលតាមលទ្ធផលឆ្នោតដែលត្រូវបានប្រកាសដោយប្រព័ន្ធផ្សព្វផ្សាយអាមេរិកធំៗកាលពីសប្ដាហ៍មុន លោកបៃឌិនទទួលសំឡេងប្រតិភូ២៩០គ្រប់គ្រាន់សម្រាប់តំណែងប្រធានាធិបតី ហើយបច្ចុប្បន្នលោកនាំមុខលោកលោកត្រាំ ៥,២លានសំឡេងឆ្នោត ឬស្មើ ៣,៦ភាគរយ។
ការធ្វើអត្ថាធិប្បាយរបស់លោកអូបាម៉ា កើតឡើងខណៈលោក ត្រាំ បន្តចោទជាសំណួរជុំវិញភាពស្របច្បាប់នៃការរាប់សន្លឹកឆ្នោតក្នុងរដ្ឋប្រទាញប្រទង់មួយចំនួន ដូចជា Michigan, Wisconsin និង Georgia ដែលជួយឲ្យលោក បៃឌិន ឈ្នះ។
ទន្ទឹមនេះ បណ្ដាមេដឹកនាំបក្សសាធារណរដ្ឋក្នុងសភា បានទទូចឲ្យលោក ត្រាំ កុំព្រមចិត្តចុះចាញ់ ឬបន្តរក្សាភាពស្ងៀមស្ងាត់ ទោះជាគ្មានភស្តុតាងបញ្ជាក់ការលួចបន្លំការបោះឆ្នោតក៏ដោយក្តី។ ក្នុងកិច្ចសម្ភាសដដែល លោក អូបាម៉ា អះអាងថា លោកមិនអស់ចិត្តត្រង់មន្ត្រីបក្សសាធារណរដ្ឋ ដែលដឹងលទ្ធផលច្បាស់ បែរជាចាក់បណ្ដោយតាមលោក ត្រាំ ទៅវិញ។
ដោយឡែក មន្ត្រីជាន់ខ្ពស់អាមេរិកមួយក្រុមដែលទទួលខុសត្រូវចំពោះការរៀបចំការបោះឆ្នោតអាមេរិក បានបញ្ជាក់នៅថ្ងៃទី ១៣ ខែវិច្ឆិកាថា គ្មានភស្តុតាងណាមួយបង្ហាញថា សន្លឹកឆ្នោតត្រូវបាត់ ឬផ្លាស់ប្តូរ ឬក៏ប្រព័ន្ធបោះឆ្នោតកើតរឿងមិនប្រក្រតីណាមួយឡើយ។
«ការបោះឆ្នោតថ្ងៃទី ៣ វិច្ឆិកា គឺជាការបោះឆ្នោតដែលមានសុវត្ថិភាពបំផុតក្នុងប្រវត្តិសាស្ត្រអាមេរិក»។ ក្រុមប្រឹក្សាសម្របសម្រួលរដ្ឋាភិបាលលើហេដ្ឋរចនាសម្ព័ន្ធបោះឆ្នោត (Election Infrastructure Government Coordinating Council) សរសេរបែបនេះក្នុងសេចក្តីថ្លែងការណ៍របស់ខ្លួន។
ការបញ្ចេញសេចក្តីថ្លែងការណ៍នេះ គឺឆ្លើយតបនឹងការអះអាងគ្មានភស្តុតាងរបស់លោក ត្រាំ ដោយចោទថា សន្លឹកឆ្នោតគាំទ្រជាង ២,៧ លាននៅទូទាំងប្រទេស ត្រូវបានមោឃៈ ហើយរាប់ម៉ឺនសន្លឹកទៀត ដែលលោក ត្រាំ អះអាងថា ជាសន្លឹកឆ្នោតបោះឲ្យលោក បែរត្រូវផ្លាស់ប្តូរទៅជាសំឡេងរបស់លោក បៃឌិន វិញ ជាពិសេសក្នុងរដ្ឋ Pennsylvania ៕
Tag:
សហរដ្ឋអាមេរិក
បារ៉ាក់ អូបាម៉ា
ដូណាល់ ត្រាំ
ការបោះឆ្នោតអាមេរិក
© រក្សាសិទ្ធិដោយ thmeythmey.com
