អ្នកកំពង់ឆ្នាំង កំពង់ចាម និងព្រៃវែងជាង៨០០០គ្រួសារ ទទួលបានស្រូវពូជពីរដ្ឋាភិបាល

ជាតិ

អ្នកកំពង់ឆ្នាំង កំពង់ចាម និងព្រៃវែងជាង៨០០០គ្រួសារ ទទួលបានស្រូវពូជពីរដ្ឋាភិបាល

13, Nov 2020 , 9:29 pm

រូបភាព

ដោយ:

ប្រជាកសិករចំនួន ៨ ៤១០ គ្រួសារ ក្នុងខេត្តកំពង់ឆ្នាំង កំពង់ចាម និងព្រៃវែង ទទួលបានពូជស្រូវចំនួន ៨៤១តោន ពីរាជរដ្ឋាភិបាល កាលពីថ្ងៃទី១២ ខែវិច្ឆិកា ដើម្បីស្ដារដំណាំស្រូវដែលខូចខាតដោយទឹកជំនន់កន្លងមក។ មានន័យថា កសិករមួយគ្រួសារ ទទួលបានពូជស្រូវ ១០០គីឡូក្រាម។ នេះបើតាមទំព័រហ្វេសប៊ុករដ្ឋបាលខេត្តទាំង៣នេះ។

ទំព័រហ្វេសប៊ុករដ្ឋបាលខេត្តនីមួយៗឲ្យដឹងថា ពូជស្រូវ ៣៥០តោន ត្រូវបានចែកទៅកសិករ ៣ ៥០០គ្រួសារនៅខេត្តព្រៃវែង។ រីឯខេត្តកំពង់ឆ្នាំង មានពលរដ្ឋចំនួន ១ ៧១០គ្រួសារ ទទួលបានពូជស្រូវចំនួន ១៧១តោន និងខេត្តកំពង់ចាមមានពលរដ្ឋចំនួន ៣ ២០០គ្រួសារ ទទួលបានពូជស្រូវចំនួន ៣២០តោន។ ក្រៅពីពូជស្រូវ កសិករក៏ទទួលបានពូជបន្លែ និងស្បៀងមួយចំនួនទៀតដែរ។

កន្លងមកក្រសួងកសិកម្មធ្លាប់អះអាងប្រាប់ Thmeythmey25 ថា រដ្ឋាភិបាលបានត្រៀម ពូជស្រូវប្រមាណ ៤.៦ពាន់តោន និងពូជដំណាំរួមផ្សំ ប្រមាណ១៦តោន ដើម្បីស្តារដំណាំកសិកម្មដែលខូចខាតដោយទឹកជំនន់ឡើងវិញនៅទូទាំងប្រទេស។

បើតាមលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់Thmeythmey25ថា កន្លងមកមានកសិករជាង ៤ម៉ឺនគ្រួសារហើយនៅក្នុងខេត្តពោធិ៍សាត់ បាត់ដំបង និងបន្ទាយមានជ័យ បានទទួលពូជស្រូវពីរាជរដ្ឋាភិបាល។ សម្រាប់ថ្ងៃទី១២ ខែវិច្ឆិកានេះ រាជរដ្ឋាភិបាល បានបន្តចែកពូជស្រូវជូនកសិករនៅខេត្តកំពង់ចាម និងកំពង់ឆ្នាំង និងព្រៃវែង។ ដោយឡែកបណ្ដាខេត្តនានា ដែលបានរងគ្រោះដោយជំនន់ទឹកភ្លៀង ក៏នឹងទទួលបានពូជស្រូវជាបន្តបន្ទាប់ដែរ។

គួររំឭកថា រាជធានី-ខេត្តចំនួន២០ បានរងផលប៉ះពាល់ ដោយសារគ្រោះទឹកជំនន់ មានដូចជា ភ្នំពេញ ពោធិ៍សាត់ បាត់ដំបង ប៉ៃលិន បន្ទាយមានជ័យ កណ្ដាល ព្រះសីហនុ កំពង់ធំ ស្ទឹងត្រែង កំពង់ស្ពឺ តាកែវ ព្រះវិហារ សៀមរាប ឧត្តរមានជ័យ ស្វាយរៀង មណ្ឌលគិរី កំពង់ឆ្នាំង កោះកុង ត្បូងឃ្មុំ និងខេត្តកំពង់ចាម៕