សង្គមអន្តរជាតិ
អន្តរជាតិ
លោក ត្រាំ ហាមក្រុមហ៊ុនអាមេរិកបោះទុនក្នុងក្រុមហ៊ុនចិនដែលពាក់ព័ន្ធនឹងយោធា
ប្រធានាធិបតី ដូណាល់ ត្រាំ ថ្លែងនាពេលកន្លងទៅ ។ រូបភាព៖ AFP
×![]()
ប្រធានាធិបតីអាមេរិក ដូណាល់ ត្រាំ បានចុះហត្ថលេខាលើបញ្ជាប្រតិបត្តិមួយនៅថ្ងៃទី ១២ ខែវិច្ឆិកា ដោយហាមឃាត់វិនិយោគិនអាមេរិកបោះទុនក្នុងក្រុមហ៊ុនចិន ដែលក្រុងវ៉ាស៊ីនតោនអះអាងថា ពាក់ព័ន្ធនឹងយោធាចិន។ នេះជាការដាក់សម្ពាធបន្ថែមទៀតលើក្រុងប៉េកាំង ខណៈទំនាក់ទំនងមហាអំណាចទាំងពីរ កំពុងតែតានតឹងខ្លាំងស្រាប់ផងនោះ។ 
បើគ្មានអ្វីប្រែប្រួល ចាប់ពីថ្ងៃទី ១១ ខែមករាតទៅ បញ្ជាប្រតិបត្តិ នឹងហាមឃាត់វិនិយោគិនអាមេរិកពីការបញ្ជាទិញភាគហ៊ុនរបស់ក្រុមហ៊ុនចិនចំនួន៣១ក្រុមហ៊ុន ដែលជាប់ឈ្មោះក្នុងបញ្ជីរបស់ក្រសួងការពារអាមេរិកថា ពាក់ព័ន្ធនឹងយោធាចិន នៅដើមឆ្នាំ២០២០នេះ។ ក្រុមវិនិយោគិនអាមេរិក មានពេលរហូតដល់ថ្ងៃទី ១១ ខែវិច្ឆិកា ឆ្នាំ២០២១ ដើម្បីដកភាគហ៊ុនដែលពួកគេមានចេញពីក្រុមហ៊ុនចិនហាមឃាត់ទាំងនេះ។
តាមការចុះផ្សាយរបស់ទីភ្នាក់ងារព័ត៌មាន Reuters បម្រាមនេះ អាចប៉ះពាល់ដល់ក្រុមហ៊ុនធំៗរបស់ចិនមួយចំនួនដូចជាក្រុមហ៊ុនទូរគមនាគមន៍ China Telecom, China Mobile និងក្រុមហ៊ុនផលិតសម្ភារឃ្លាំមើល Hikvision ជាដើម។ ក្នុងបញ្ជាប្រតិបត្តិ ដែលចុះផ្សាយដោយសេតវិមាន លោក ដូណាល់ ត្រាំ អះអាងថា ចិនបង្កើនការកេងចំណេញពីមូលធនអាមេរិក ដើម្បីយកទៅផ្គត់ផ្គង់ និងអភិវឌ្ឍក៏ដូចជាធ្វើទំនើបកម្មយោធារបស់ខ្លួន។
លោកប្រធានាធិបតីសង្កត់ធ្ងន់ថា វិនិយោគិនអាមេរិក កំពុងជួយចិនគំរាមកំហែងដោយផ្ទាល់មកលើសហរដ្ឋអាមេរិក និងកងកម្លាំងអាមេរិកនៅបរទេស ក្រោមរូបភាពដូចជា ការអភិវឌ្ឍនិងដាក់ពង្រាយអាវុធប្រល័យលោក (WMD) សព្វាវុធទំនើបៗ ក៏ដូចជា ការវាយប្រហារតាមអនឡាញប្រឆាំងសហរដ្ឋអាមេរិក និងប្រជាជនអាមេរិក។
ការប្រកាសដាក់បម្រាមនេះ ជាគោលនយោបាយសំខាន់ដំបូងពីសំណាក់ប្រធានាធិបតីត្រាំ ចាប់តាំងពីចាញ់ឆ្នោតនាថ្ងៃទី ៣ ខែវិច្ឆិកា ជាមួយលោក ចូ បៃឌិន បេក្ខជនបក្សប្រជាធិបតេយ្យមក។ កាលពីសប្ដាហ៍មុន លោក បៃឌិន ត្រូវបានប្រកាសថា អ្នកឈ្នះការបោះឆ្នោតឆ្នាំ២០២០នេះ ក្រោយទទួលសំឡេងប្រតិភូលើស២៧០ ដែលគ្រប់គ្រាន់សម្រាប់ក្លាយជាម្ចាស់សេតវិមាន។ ក៏ប៉ុន្តែលោកត្រាំ មិនសុខចិត្តចុះចាញ់ ហើយប្ដឹងតវ៉ាប្រឆាំងលទ្ធផលឆ្នោត។
ម្យ៉ាងទង្វើរបស់រដ្ឋបាលលោកត្រាំចុងក្រោយនេះ ទំនងជាបញ្ឆេះភាពតានតឹងកាន់តែខ្លាំងទៀតក្នុងទំនាក់ទំនងមហាអំណាចពិភពលោកទាំងពីរនេះ ដែលមើលមុខគ្នាមិនចំស្រាប់ហើយពាក់ព័ន្ធបញ្ហាជាច្រើន រាប់ចាប់ពី សង្គ្រាមពាណិជ្ជកម្ម ជំងឺរាតត្បាតសកលកូវីដ-១៩ សមុទ្រចិនខាងត្បូង និងបញ្ហានៅហុងកុង ជាដើម៕
Tag:
អាមេរិក
ចិន
ដូណាល់ ត្រាំ
យោធា
© រក្សាសិទ្ធិដោយ thmeythmey.com
