អន្តរជាតិ
រដ្ឋាភិបាលចិន សាទរលោក បៃឌិន ដែលឈ្នះឆ្នោត លោក បៃឌិន ថ្លែងអំឡុងសន្និសីទព័ត៌មាន នៅរដ្ឋ Delaware កាលពីថ្ងៃទី ៩ ខែវិច្ឆិកា ។ រូប៖ AFP
× ជិតមួយសប្ដាហ៍ក្រោយប្រកាសលទ្ធផលឆ្នោត រដ្ឋាភិបាលចិន តាមរយៈក្រសួងការបរទេស បានប្រកាសអបអរសាទរលោក ចូ បៃឌិន និងអ្នកស្រី កាម៉ាឡា ហារីស ចំពោះជ័យជម្នះក្នុងការបោះឆ្នោតអាមេរិក។ បន្ទាប់ពីចិន គេនៅទន្ទឹងចាំមើលរុស្ស៊ីវិញ ខណៈលោកត្រាំនៅតតាំងលទ្ធផលបោះឆ្នោត។
«យើងបានតាមដានការប្រតិកម្មលើការបោះឆ្នោតប្រធានាធិបតីអាមេរិកឆ្នាំនេះទាំងពីក្នុងសហរដ្ឋអាមេរិក និងពីសហគមន៍អន្តរជាតិ»។ អ្នកនាំពាក្យក្រសួងការបរទេសចិន លោក Wang Wenbin ប្រាប់សន្និសីទព័ត៌មានមួយនៅថ្ងៃទី ១៣ ខែវិច្ឆិកា។
«យើងគោរពជម្រើសរបស់ពលរដ្ឋអាមេរិក និងផ្ញើសារអបអរដល់លោក បៃឌិន និងអ្នកស្រី ហារីស»។ លោក Wang បញ្ជាក់បន្ថែមបែបនេះ ដែលដកស្រង់ចុះផ្សាយដោយទូរទស្សន៍ Bloomberg ។
ក្រោយឈ្នះរដ្ឋ Pennsylvania កាលពីថ្ងៃសៅរ៍សប្ដាហ៍មុន លោក បៃឌិន ត្រូវបានប្រព័ន្ធផ្សព្វផ្សាយអាមេរិកធំៗប្រកាសថាឈ្នះការបោះឆ្នោត ដ្បិតលោកទទួលបានសំឡេងប្រតិភូ ២៨៤ គ្រប់គ្រាន់ក្លាយជាប្រធានាធិបតីអាមេរិកទី៤៦។ ក៏ប៉ុន្តែមកទល់ពេលនេះ លោកត្រាំ មិនទាន់ព្រមចុះចាញ់ហើយប្ដឹងតវ៉ាប្រឆាំងលទ្ធផលឆ្នោត។
ទោះប្រកាសអបអរលោក បៃឌិន ក៏ដោយក្ដី លោកអ្នកនាំពាក្យ Wang បានអះអាងថា រដ្ឋាភិបាលចិនយល់ដឹងថា លទ្ធផលឆ្នោតអាមេរិក នឹងត្រូវសម្រេចតាមរយៈនីតិវិធីនិងច្បាប់របស់សហរដ្ឋអាមេរិក។
បណ្ដាប្រទេសជាច្រើន ជាពិសេស ពួកលោកខាងលិច និងសម្ព័ន្ធមិត្តសំខាន់ៗរបស់មហាអំណាចពិភពលោកមួយនេះ នាំគ្នាផ្ញើសារអបអរជោគជ័យលោកបៃឌិនលើលោក ដូណាល់ ត្រាំ
ប្រធានាធិបតិជិតផុតអាណត្តិ។ បន្ទាប់ពីចិន គេនៅរង់ចាំមើលប្រទេសដែលជាគូប្រជែងអាមេរិកផ្សេងទៀត ជាពិសេស រុស្ស៊ី តែម្ដង៕
Tag:
ចិន
បោះឆ្នោតអាមេរិក
© រក្សាសិទ្ធិដោយ thmeythmey.com