ជាតិ
ក្រោយចាកសិក្ខាបទ ព្រះអង្គ ប៊ុន សាលួត មិនចោលព្រៃរុក្ខវ័ន្តឡើយ តែប្រគេនតួនាទីឲ្យសង្ឃផ្សេងគ្រប់គ្រង
ព្រះអង្គ ប៊ុន សាលួត (រូបផ្ដល់ឱ្យ)
×![]()
ដោយ: ប៉ូ សាគុន
ឧត្តរមានជ័យ៖ ព្រះអង្គ ប៊ុន សាលួត ដែលបានផ្ដួចផ្ដើមបង្កើតដែនអភិរក្សព្រៃសង្ឃរុក្ខវ័ន្ត នឹងលាចាកសិក្ខាបទ នៅថ្ងៃទី២៦ខែវិច្ឆិកាខាងមុខ ដោយតួនាទីកំពូលនៃការគ្រប់គ្រងព្រៃធម្មជាតិនេះ ព្រះអង្គនឹងប្រគេនទៅឱ្យព្រះសង្ឃអង្គថ្មី។ ទោះជាយ៉ាងណា ព្រះអង្គបានអះអាងថា ក្រោយក្លាយជាគ្រហស្ថ ព្រះអង្គនៅតែជួយការងារក្នុងព្រៃអភិរក្សនេះដដែល។
ព្រះអង្គ ប៊ុន សាលួត បានមានថេរដីកាប្រាប់សារព័ត៌មានថ្មីៗ តាមទូរសព្ទថា ព្រះអង្គសម្រេចលាចាកសិក្ខាបទ ព្រោះតែការអស់ឧបនិស្ស័យក្នុងភេទជាបព្វជិត។ កិច្ចការពារព្រៃសង្ឃរុក្ខវ័ន្ត បានដំណើរការតាំងពីឆ្នាំ២០០១ ហើយទើបតែប្រមាណ២ឆ្នាំចុងក្រោយនេះប៉ុណ្ណោះ ដែលព្រះអង្គ ប៊ុន សាលួត បណ្ដុះបានព្រះសង្ឃមួយចំនួន ដើម្បីធ្វើកិច្ចការងារអភិរក្សបន្តពីព្រះអង្គ។
ព្រះសង្ឃដែលនឹងត្រូវទទួលភារៈបន្តពីព្រះអង្គ ប៊ុន សាលួត មានព្រះនាមថា ថូ ធូរស់។ ព្រះអង្គ ប៊ុន សាលួត មានថេរដីកាអះអាងថា ព្រះអង្គមានទំនុកចិត្តខ្ពស់ លើព្រះសង្ឃអង្គថ្មី ក្នុងការគ្រប់គ្រងព្រៃអភិរក្សទៅថ្ងៃអនាគត។ បើទោះបីជាតួនាទីកំពូលនៃការគ្រប់គ្រងដែនអភិរក្សព្រៃសង្ឃរុក្ខវ័ន្ត ត្រូវបានប្រគេនទៅព្រះសង្ឃអង្គថ្មីក៏ដោយចុះ ក៏ព្រះអង្គ ប៊ុន សាលួត នៅតែបន្តជួយកិច្ចការងារនេះក្នុងភេទជាគ្រហស្ថដែរ។
ព្រះអង្គ ប៊ុន សាលួត ក៏បានមានថេរដីកាបន្ថែមទៀតថា ព្រះអង្គមិនមានការព្រួយព្រះទ័យឡើយ ចំពោះការគ្រប់គ្រងព្រៃសង្ឃរុក្ខវ័ន្តទៅថ្ងៃខាងមុខ ដោយព្រះអង្គពន្យល់ដូច្នេះ៖«អាត្មាមិនមានការព្រួយបារម្ភទេ ព្រោះព្រៃនេះគឺតំណាងមុខមាត់ប្រទេស តំណាងព្រៃពិភពលោក ហើយអាត្មាជឿជាក់លើសម្ដេចតេជោ ហ៊ុន សែន និងអាជ្ញាធរខេត្តនិងស្រុក ព្រោះកន្លងមកគាត់យកចិត្តទុកដាក់ និងជួយជ្រោមជ្រែង ការពារព្រៃនេះណាស់។ អាត្មាជឿលើព្រះសង្ឃអង្គក្រោយ លោកមានសមត្ថភាពខ្ពស់ លោករៀនបានច្រើន ហើយបើតាមការដែលអាត្មាបណ្ដុះលោក កន្លងមកឃើញថា លោកមានសមត្ថភាពគ្រប់គ្រាន់ក្នុងការធ្វើរឿងនេះ»៕
សូមស្ដាប់កិច្ចសម្ភាសន៍លម្អិត រវាងកញ្ញា ប៉ូ សាគុន នៃសារព័ត៌មានថ្មី ជាមួយព្រះអង្គ ប៊ុន សាលួត ព្រះសង្ឃដែលផ្ដួចផ្ដើមបង្កើតដែនអភិរក្សព្រៃសង្ឃរុក្ខវ័ន្ត ដូចតទៅ៖
Tag:
ព្រៃសង្ឃរុក្ខវ័ន្ត
ព្រៃឈើ
© រក្សាសិទ្ធិដោយ thmeythmey.com
