Smith និង Alvarez នឹងជួបគ្នាលើសង្វៀននៅចុងខែធ្នូនេះ

កីឡាជាតិ

ជាតិ

Smith និង Alvarez នឹងជួបគ្នាលើសង្វៀននៅចុងខែធ្នូនេះ

13, Nov 2020 , 10:59 pm

រូបភាព

ដោយ: ទេព ពិទូរ្យ

ម្ចាស់ខ្សែក្រវាត់ WBA ពិភពលោកប្រភេទទម្ងន់មធ្យម Callum Smith ឈានដល់ការយល់ព្រមឡើងសង្វៀនដើម្បីប្រកួតជាមួយកំពូលអ្នកប្រដាល់ម៉ិកស៊ិក Saul Canelo Alvarez។ នេះបើតាមការអះអាងរបស់អ្នកផ្គូផ្គងកីឡាប្រដាល់សញ្ជាតិអង់គ្លេស Eddie Hearn នៅថ្ងៃទី១២ ខែវិច្ឆិកា។

Smith កំពូលអ្នកប្រដាល់មិនស្គាល់ចាញ់សញ្ជាតិអង់គ្លេស បានស្វែងរកការប្រកួតទល់ Alvarez ដែលត្រូវបានគេចាត់ទុកថាជាកីឡាករដ៏ឆ្នើមម្នាក់ក្នុងវិស័យប្រដាល់សកលពិភពលោកនាពេលបច្ចុប្បន្ន។ Smith ដែលមានវ័យ៣០ឆ្នាំ មានប្រវត្តិប្រកួត២៧លើកឈ្នះទាំង២៧ ដោយផ្តួលដៃគូឲ្យសន្លប់ចំនួន១៩លើក។

ដោយឡែក Alvarez ដែលគ្រងខ្សែក្រវាត់ពិភពលោក៤ប្រភេទទម្ងន់ផ្សេងគ្នា ធ្លាប់ចាញ់តែម្តងប៉ុណ្ណោះក្រោមថ្វីដៃអ្នកប្រដាល់មិនដែលចាញ់អាមេរិក Floyd Mayweather ចំណោមការប្រកួតទាំង៥៦លើក ដោយក្នុងនោះឈ្នះ៥៣ និងស្មើ២ ផ្តួលដៃគូឲ្យសន្លប់៣៦ដង។ អ្នកប្រដាល់ដ៏មានប្រជាប្រិយរបស់ម៉ិកស៊ិកវ័យ៣០ឆ្នាំរូបនេះ ប្រកួតលើកចុងក្រោយឈ្នះកីឡាករកាហ្សាស្ថាន Gennady Golovkin ដោយពិន្ទុកាលពីឆ្នាំ ២០១៨។

លោក Hearn អ្នកផ្គូផ្គងកីឡាប្រដាល់សញ្ជាតិអង់គ្លេសដ៏ល្បីល្បាញ បានបង្ហាញការពេញចិត្តក្នុងការឲ្យអ្នកទាំងពីរប៉ះគ្នាក្នុងពេលឆាប់ៗនេះផងដែរ។ «យើងកំពុងព្យាយាម ហើយយើងកំពុងខិតជិតកិច្ចសន្យាការប្រកួតរវាងអ្នកប្រដាល់ដ៏អស្ចារ្យទាំងពីរនេះ»។ នេះជាការលើកឡើងរបស់លោក Hearn ទៅកាន់ សារព័ត៌មាន BBC Newsbeat។

ប្រសិនបើកិច្ចព្រមព្រៀងឡើងទទួលបានជោគជ័យ គេរំពឹងថា ការឡើងសង្វៀនរវាង Smith និង Alvarez នឹងប្រព្រឹត្តទៅនៅចុងខែធ្នូចុងឆ្នាំនេះ បើទោះរោគរាតត្បាត COVID-19 នៅតែមាននៅឡើយ៕