ការតេស្តរកកូវីដ-១៩ លើកទី៣ របស់នាយករដ្ឋមន្ត្រី រដ្ឋមន្ត្រី និងអ្នកទាក់ទងប្រមុខការទូតហុងគ្រី ១៧៣០នាក់

COVID-19

ជាតិ

សង្គមជាតិ

ការតេស្តរកកូវីដ-១៩ លើកទី៣ របស់នាយករដ្ឋមន្ត្រី រដ្ឋមន្ត្រី និងអ្នកទាក់ទងប្រមុខការទូតហុងគ្រី ១៧៣០នាក់

14, Nov 2020 , 7:59 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្តេចនាយកមន្ត្រីហ៊ុន សែន និងរដ្ឋមន្ត្រីនានា រួមទាំងអ្នកដែលបានប្រាស្រ័យទំនាក់ទំនងនឹងលោក Peter Szijjarto រដ្ឋមន្ត្រីការបរទេស និងពាណិជ្ជកម្មហុងគ្រី ត្រូវធ្វើតេស្តរកកូវីដ-១៩ ជាលើកទី៣ នៅថ្ងៃទី១៤ វិច្ឆិកានេះ។ លោក Peter Szijjarto ត្រូវបានរកឃើញមានកូវីដ-១៩ នៅប្រទេសថៃ ក្រោយបញ្ជប់ដំណើរទស្សនកិច្ចនៅកម្ពុជា កាលពីថ្ងៃទី៣ វិច្ឆិកា។

រដ្ឋមន្ត្រីតាមក្រសួងស្ថាប័នផ្សេងទៀត ដែលត្រូវធ្វើតេស្តរកកូវីដ-១៩ រួមមានលោកប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ , លោក ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក លឹម គានហោ រដ្ឋមន្ត្រីក្រសួងធនធានទឹក, ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល, លោកស្រីជា សិរី អគ្គនាយកបច្ចេកទេស ធនាគារជាតិនៃកម្ពុជា រួមទាំងមន្រី្តជាន់ខ្ពស់តាមស្ថាប័ននានា, ក្រុមអង្គរក្ស និងក្រុមអ្នកសារព័ត៌មានជាតិ-អន្តរជាតិជាដើម។ មិនតែប៉ុណ្ណោះបុគ្គលិកតាមគ្រឹះស្ថានសិក្សា មាតាបិតាសិស្ស ក៏ត្រូវតាមដានពិនិត្យសុខភាពរកជំងឺកាចសាហាវនេះដែរ។

បើតាមតួលេខរបស់ក្រសួងសុខាភិបាល មនុស្ស១៧៣០នាក់ រួមទាំងនាយករដ្ឋមន្ត្រី ហ៊ុន សែន ត្រូវធ្វើតេស្តរកកូវីដ-១៩ ជាលើកទី៣ នៅថ្ងៃនេះ។

កន្លងមកក្រសួងសុខាភិបាល បានធ្វើតេស្តចំនួន២លើកមកហើយ លើអ្នកពាក់ព័ន្ធរដ្ឋមន្ត្រីការបរទេសហុងគ្រី Peter Szijjarto។ ការធ្វើតេស្តទាំងពីរលើកនេះ គឺរកឃើញមនុស្ស៤នាក់ មានកូវីដ-១៩ ក្នុងនោះរួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។

ចំណែកអ្នកទាំង១៧៣០នាក់ ដែលអវិជ្ជមានកូវីដ-១៩នេះ គឺត្រូវធ្វើតេស្តជាលើកទី៣ មុននឹងបន្តធ្វើតេស្តលើកទី៤ នៅថ្ងៃទី១៨ វិច្ឆិកា។

ជុំវិញព្រឹត្តិការណ៍ ៣ វិច្ឆិកា នេះដែរ សម្ដេចនាយករដ្ឋមន្ត្រី ហ៊ុន សែន បានអំពាវនាវឱ្យមន្ត្រី ក៏ដូចជាអ្នកពាក់ព័ន្ធបន្តការធ្វើចត្តាឡីស័ក និងអនុវត្តតាមសេចក្តីណែនាំរបស់ក្រសួងសុខាភិបាលឱ្យត្រឹមត្រូវដើម្បីបង្ការហានិភ័យ និងឆ្លងចូលសហគមន៍។

បច្ចុប្បន្នកម្ពុជាមានអ្នកជំងឺកូវីដ-១៩ចំនួន៣០២នាក់ ក្នុងនោះជាសះស្បើយចំនួន២៨៩៕