កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ក្តីសង្ឃឹមរបស់ក្រុមជម្រើសជាតិអង់គ្លេសក្នុងការឈានទៅវគ្គផ្តាច់ព្រ័ត្រពានរង្វាន់ Nations League ឆ្នាំ ២០២០ ត្រូវបានបញ្ចប់ហើយ ក្រោយចាញ់បែលហ្ស៊ិកក្នុងលទ្ធផល ២-០ ក្នុងការប្រកួតជម្រុះពូលA2 នៅរាត្រីថ្ងៃទី១៥ ខែវិច្ឆិកា។
ពីរគ្រាប់ដែលធ្វើបានដោយ Youri Tielemans និង Dries Mertens បានជួយបែលហ្ស៊ិកទទួលបាន៣ពិន្ទុបន្ថែម និងនាំក្រុមដែលមានលោក Roberto Martinez ជាគ្រូបង្វឹកស្ថិតនៅកំពូលតារាងពូល A2 ជាមួយពិន្ទុសរុប១២ពិន្ទុ។ ក្រុមរហ្សនាមបិសាចក្រហមទទួលបានកៅអីទៅកាន់វគ្គបន្តសម្រាប់ពានអឺរ៉ុបនេះ បើទោះនៅសល់មួយប្រកួតទៀតក្តី។
ទន្ទឹមនេះ បរាជ័យរបស់ក្រុមរបស់លោក Gareth Southgate ក្នុងជំនួបលើកទី៥នេះ មានន័យថាអង់គ្លេសដែលទទួលបានចំណាត់ថ្នាក់ទី៣ឆ្នាំមុន នឹងមិនអាចឈានទៅវគ្គបន្តឡើយ ដ្បិតពួកគេស្ថិតក្នុងចំណាត់ថ្នាក់លេខ៣ ពូល A2 ដោយរកបាន៧ពិន្ទុ។ បើទោះនៅសល់មួយប្រកួតទៀត ហើយតាមពីក្រោយក្រុមដាណឺម៉ាក៣ពិន្ទុក៏ដោយ ប៉ុន្តែក្រុមរហស្សនាមតោកំណាចចាញ់ប្រៀបដាណឺម៉ាកត្រង់រូបមន្ត (head to head) បន្ទាប់ពីចាញ់ ២-១ ក្នុងផ្ទះខ្លួនឯង។
ដាណឺម៉ាក ទទួលបានចំណាត់ថ្នាក់ទី២ ដោយរកបាន១០ពិន្ទុ តាមរយៈការយកឈ្នះអ៊ីស្លង់ ២-១។ ឆ្លងកាត់ការប្រកួត៥លើកសម្រាប់ពូល A2 បានរកឃើញពីរក្រុមឈានទៅវគ្គបន្តពានរង្វាន់ Nations League ដែលមានបែលហ្ស៊ិក និងដាណឺម៉ាក។ ការប្រកួតលើកចុងក្រោយ បែលហ្ស៊ិកស្វាគន៍ដាណឺម៉ាកដើម្បីដណ្តើមយកលេខ១ ឯប្រកួតបង្គ្រប់កិច្ចអង់គ្លេសទទួលភ្ញៀវអ៊ីស្លង់នៅរាត្រីថ្ងៃទី១៨ ខែវិច្ឆិកាដូចគ្នា។
ដោយឡែកក្រុមដែលអាចឈានទៅវគ្គបន្ត ក្រោយឆ្លងកាត់ការប្រកួត៥លើក មានតែបារាំងមួយប៉ុណ្ណោះ ខណៈម្ចាស់ជើងឯកព័រទុយហ្គាល់អស់សិទ្ធិទៅហើយ ខណៈ៣ក្រុមទៀតត្រូវប្រកួតប្រជែងគ្នាក្នុងការប្រកួតបន្តបន្ទាប់៕
Tag:
Nations League
© រក្សាសិទ្ធិដោយ thmeythmey.com
