កីឡាជាតិ
ជាតិ
ពហុកីឡដ្ឋានជាតិមរតកតេជោសម្រេចបាន៨៥ភាគរយ និងគ្រោងបញ្ចប់នៅខែឧសភា ទិដ្ឋភាពពហុកីឡដ្ឋានជាតិមរតកតេជោ ថតចេញពីវិមានឈ្នះឈ្នះ
× ពហុកីឡដ្ឋានជាតិមរតកតេជោ ស្ថាបនារួចរាល់បានជាង៨០ភាគរយ និងគ្រោងបញ្ចប់ជាស្ថាពរនៅអំឡុងខែឧសភា ឆ្នាំ២០២១។ នេះបើតាមការវាយតម្លៃរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា។
ទោះបីប្រទេសកម្ពុជារងឥទ្ធិពលពីការរាតត្បាតនៃជំងឺកូវីដ-១៩ ក៏ដោយ ប៉ុន្តែដំណើរការសាងសង់ពហុកីឡដ្ឋានជាតិមរតកតេជោនៅតែបន្តសកម្មភាពធម្មតា។ បើតាមការវាយតម្លៃរបស់លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា គិតត្រឹមពាក់កណ្តាលខែវិច្ឆិកា ឆ្នាំ២០២០ ការស្ថាបនាទីលានបាល់ទាត់លំដាប់អន្តរជាតិមួយនេះ សម្រចបានប្រមាណ៨៥ភាគរយហើយ។
តែយ៉ាងណា ការបញ្ចប់ការសាងសង់សមិទ្ធផលទីពីរក្នុងពហុកីឡដ្ឋានជាតិមរតកតេជោនេះ នឹងអូសបន្លាយរហូតដល់ខែឧសភា ឆ្នាំ២០២១។ នេះបើតាមការលើកឡើងរបស់លោក វ៉ាត់ ចំរើន។ ខណៈដំបូងឡើយពហុកីឡដ្ឋាននេះ គ្រោងបញ្ចប់នៅចុងឆ្នាំ២០២០ ហើយត្រូវបានវាយតម្លៃលើកទីពីរថា នឹងបញ្ចប់នៅអំឡុងខែមីនា ឆ្នាំ២០២១។
លោក វ៉ាត់ ចំរើន ធ្លាប់អះអាងកន្លងមកថា ការពន្យាពេលក្នុងការបញ្ចប់ការសាងសង់ជាបន្តបន្ទាប់នេះ ដោយសារមានការរាំងស្ទះក្នុងការដឹកឧបករណ៍ និងសម្ភារផ្គត់ផ្គង់ឲ្យការសាងសង់ពីក្រៅប្រទេស បន្ទាប់ពីប្រទេសមួយចំនួនបានបិទព្រំដែនទឹក និងជើងហោះហើរ ដោយសារការរាតត្បាតនៃជំងឺកូវីដ-១៩។
បច្ចុប្បន្នពហុកីឡដ្ឋាននេះ បានបញ្ចប់ការសាងសង់គ្រោង១០០ភាគរយហើយ នៅឡើយតែបំពាក់គ្រឿងបរិក្ខាមួយចំនួនរួមមានកៅអី អំពូលភ្លើង ដំបូល អគារក្នុងកីឡដ្ឋាន និងការធ្វើទីលានខាងក្នុង។ នេះបើតាមការបញ្ជាក់បន្ថែមរបស់លោក វ៉ាត់ ចំរើន។
កីឡដ្ឋានលំដាប់អន្តរជាតិដែលជាបច្ចេកវិទ្យាចុងក្រោយរបស់ចិន សាងសង់លើផ្ទៃដីជាង១៦ហិកតា ដោយគ្រោងចំណាយថវិកា១៥៨លានដុល្លារ ដែលជាជំនួយឥតសំណងរបស់រដ្ឋាភិបាលចិន។ កីឡដ្ឋាននេះ អាចផ្ទុកអ្នកទស្សនាបានប្រមាណ៦ម៉ឺននាក់ និងអាចជម្លៀងទស្សនិកជនត្រឹមរយៈពេល៧នាទីក្នុងករណីមានហេតុការណ៍មិនប្រក្រតីកើតឡើង។
សមិទ្ធផលទីពីរនៃពហុកីឡដ្ឋានជាតិមរតកតេជោនេះ បានបើកការដ្ឋានសាងសង់នៅថ្ងៃទី៤ មេសា ឆ្នាំ២០១៧ ក្រោមវត្តមានសម្តេចនាយករដ្ឋមន្ត្រី ហ៊ុន សែន ក្នុងអំឡុងពេលសម្ពោធដាក់ឲ្យប្រើប្រាស់សមិទ្ធផលដំណាក់កាលទី១ មានដូចជាមជ្ឈមណ្ឌលអាងហែលទឹក មជ្ឈមណ្ឌលកីឡាក្នុងសាល, ទីលានបាល់បោះ, និងអគារស្នាក់នៅរបស់អត្តពលិក។ កីឡដ្ឋាននេះសាងសង់ឡើង ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣២នៅឆ្នាំ២០២៣៕
Tag:
វ៉ាត់ ចំរើន
ពហុកីឡដ្ឋានជាតិមរតកតេជោ
© រក្សាសិទ្ធិដោយ thmeythmey.com