ជាតិ
អង្គការ OEOO និងក្រុមស្ម័គ្រចិត្តចង់ឃើញពលរដ្ឋចូលរួមដោះស្រាយបញ្ហាសំរាម នៅគ្រប់កន្លែង
សកម្មភាពរើសសំរាមរបស់អង្គការ oeoo និង ស្ម័គ្រចិត្ត នៅតាមដងស្ទឹងសង្កែ ខេត្តបាត់ដំបង។ (រូបពីទំព័ហ្វេសប៊ុករបស់ Kon Pka)
×![]()
ដោយ: ឡាយ សុភាវតី
ភ្នំពេញ៖ អង្គការ One Earth - One Ocean(oeoo) ប្រចាំក្រុងបាត់ដំបង រួមជាមួយក្រុមស្ម័គ្រចិត្ត បានចំណាយពេលជិត៣ឆ្នាំ រើសសំរាមនៅស្ទឹងសង្កែ ដើម្បីជួយដល់ជីវចម្រុះក្នុងទឹកនិងសោភ័ណភាព។ គោលដៅរបស់ក្រុមរើសសំរាមនេះ គឺចង់បណ្ដុះផ្នត់គំនិតដល់សាធារណជន ពិសេសតាមមូលដ្ឋានឲ្យផ្ដើមគិតពីបញ្ហាសំរាមនិងរៀនគ្រប់គ្រងសំរាម។ 
តាមរយៈសកម្មភាពរបស់ អង្គការ OEOO និងអ្នកស្ម័គ្រចិត្តរើសសំរាម ពួកគេកត់សម្គាល់ឃើញថា ពលរដ្ឋរស់នៅតាមបណ្ដោយស្ទឹងសង្កែបាត់ដំបងមានការកែប្រែឥរិយាបថផ្ដើមចេះទុកដាក់សំរាម បន្ទាប់ពីឃើញក្រុមរបស់ខ្លួនតែងតែចុះប្រមូលសំរាម។ លើសពីនេះ ពួកគេអះអាងថា សកម្មភាពនេះ គឺកំពុងបណ្ដុះផ្នត់គំនិតដល់សាធារណជនទាំងអស់ ឲ្យចូលរួមគិតពីការបញ្ហាសំរាមនិងមានទាំងសកម្មភាពទៀតផង។
កញ្ញា ជូន ពៅ ដែលធ្លាប់ស្ម័គ្រចិត្តចូលរួមប្រមូលសំរាមជាមួយអង្គការ OEOO អះអាងថា ទោះបីជាកញ្ញាចូលរួមបានរយៈពេល៣ខែពិតមែន ប៉ុន្តែកញ្ញានៅតែបន្តចែករំលែកចំណេះដឹងពីការគ្រប់គ្រងសំរាមដល់អ្នកជុំវិញខ្លួនរហូតដល់សព្វថ្ងៃ។ ការចូលរួមនេះ កញ្ញាពៅ ធ្វើឡើងតាមទឹកចិត្តស្រលាញ់សង្គមនិងបរិស្ថានរបស់ខ្លួន ដោយគ្រាន់តែចង់ឲ្យបរិស្ថានស្អាត ហើយមិនចង់ឃើញបរិស្ថានរងផលប៉ះពាល់ដោយសារសំរាម។
«ការរើសសំរាមរយៈពេលបីខែ នៅស្ទឹងសង្កែបាត់ដំបងនេះ ធ្វើឲ្យខ្ញុំកាន់ដឹងកាន់តែច្បាស់ពីជែកសំរាម ថាប្រភេទណាអាចកែច្នៃបាន ប្រភេទណាអាចលក់បាន ប្រភេទណាមិនអាចកែច្នៃបាន។ ហើយខ្ញុំរឹតតែស្រលាញ់បរិស្ថាននិងចូលរួមចែករំលែកកាន់តែច្រើន ព្រោះពេលរើសសំរាមចេញអស់ពីកន្លែងមួយឃើញសោភ័ណ្ណភាពទីនោះកាន់ល្អប្រើសើរជាងមុខ»។ នេះបើតាមការបញ្ជាក់របស់កញ្ញា ជូន ពៅ ដោយបញ្ជាក់បន្ថែមថា កញ្ញាចង់ឲ្យគ្រប់គ្នាចូលរួមជួយដោះស្រាយបញ្ហាសំរាមឲ្យកាន់តែផុសផុលបន្ថែមទៀត ដើម្បីសង្គមបរិស្ថានរស់ទាំងអស់គ្នា។
ចំណែក កញ្ញា ឆាយ យ៉ារី ជានិស្សិតដែលបានចូលរួមរើសសំរាមជាមួយអង្គការ OEOO ក៏បានបញ្ជាក់ដែរថា កញ្ញាចូលរួមរើសសំរាមនេះ ដើម្បីបណ្ដុះផ្នត់គំនិតចូលរួមដោះស្រាយបញ្ហាសំរាម។ និស្សិតរូបនេះ បន្តថា ពលរដ្ឋភាពភាគច្រើនបានកែប្រែឥរិយាបថ ខណៈដែលឃើញក្រុមការងារចុះរើសសំរាមម្ដងៗ។
«ពលរដ្ឋខ្លះដែលរស់នៅតាមដងស្ទឹងគាត់ឃើញយើងដើររើសសំរាម ខ្លះគាត់ហាក់ដូចខ្មាសអៀនលែងចោលសំរាម ហើយពួកគាត់ចេះស្វែងរកវិធីទុកដាក់សំរាម ហើយគ្រួសារខ្លះចុះជួយប្រមូល ជជែកពីបញ្ហាសំរាមជាមួយគ្នាបានច្រើនលើរឿងសំរាមនេះ»។ នេះបើតាមការបញ្ជាក់របស់កញ្ញា យ៉ារី ដោយសង្ឃឹមថា ពលរដ្ឋតាមមូលដ្ឋាននិងយុវជនទាំងអស់នឹងចូលរួមដោះស្រាយបញ្ហាសំរាមទាំងអស់គ្នា។
មន្រី្តសម្របសម្រួលក្នុងអង្គការ OEOO កញ្ញា ស៊ាង បុប្ផាផល ដែលតែងតែចុះរើសសំរាម តាមដងស្ទឹងសង្កែជាប្រចាំចាប់ពីថ្ងៃច័ន្ទដល់សុក្រ បានបញ្ជាក់ថា គោលដៅរបស់អង្គការ គឺផ្ដោតបញ្ហាសំរាមក្នុងទឹក។ ចំពោះការប្រមូលសំរាមនៅតាមដងស្ទឹងសង្កែ នៅតែបន្តមានរហូត។
«ក្រុមការងារនិងអ្នកស្ម័គ្រចិត្តចូលរួមរើសសំរាមនៅក្នុងស្ទឹងនិងតាមបណ្ដោលស្ទឹងសង្កែស្ទើររាល់ថ្ងៃ ហើយយើងត្រូវការអ្នកស្ម័គ្រចូលរួមរហូត ឲ្យតែស្ម័គ្រចូលរួមមួយថ្ងៃក៏បាន លើសហ្នឹងក៏បាន។ ការប្រមូលសំរាមចេញពីប្រភពទឹកនេះ គឺដើម្បីកាត់បន្ថយបំពុលបរិស្ថានក្នុងទឹក និងសោភ័ណភាព ព្រោះសំរាមមិនមែនផ្ដល់ផលប៉ះពាល់នៅតែលើដីគោកនោះទេ ក្នុងទឹកក៏ផ្ដល់ផលប៉ះពាល់ដែរ គឺជីវៈចម្រុះក្នុងទឹក»។ នេះបើតាមការលើកឡើងរបស់កញ្ញា បុប្ផាផល ដោយបញ្ជាក់បន្ថែមថា ក្រៅពីគម្រោងប្រមូលសំរាមតាមស្ទឹងនេះ ក្រុមរបស់ខ្លួនក៏ទើបតែបញ្ចប់គម្រោងលើកកម្ពស់ការយល់ដឹងពីការគ្រប់គ្រងសំរាម-សំណល់រឹងដែរ។
កញ្ញា បុប្ផាផល បន្តថាគម្រោងនេះ គឺដើម្បីបញ្ជៀបការយល់ដឹងដល់ពីការគ្រប់គ្រងសំរាមតាមមូលដ្ឋាន ដែលបានសាកល្បងក្នុងសង្កាត់ព្រែកព្រះស្ដេច ក្រុងបាត់ដំបង។ ការចុះបញ្ជៀបចំណេះដឹងនេះ នឹងបន្តក្នុងសង្កាត់ចំនួន៦ទៀតក្នុងក្រុងបាត់ដំបង ប្រសិនបើក្រុមការងាររបស់កញ្ញា បុប្ផាផល វាយតម្លៃឃើញថាទទួលបានលទ្ធផល៣០ភាគរយឡើងទៅ។
«គម្រោងការសាកល្បងនេះ ទើបតែបញ្ចប់នៅថ្ងៃទី១៣វិច្ឆិកានេះ បានផ្ដោតលើពលរដ្ឋរស់នៅតាមមាត់ស្ទឹងប្រមាណ៧០គ្រួសារ។ ខ្ញុំនឹងបន្តតាមដាននិងពិនិត្យវាយតម្លៃគម្រោងនេះ រហូតត្រឹមពាក់កណ្ដាលខែធ្នូ ប្រសិនបើទទួលបានលទ្ធផលចាប់ពី៣០ភាគរយឡើង ខ្ញុំនឹងបន្តទៅសង្កាត់ចំនួន៦ទៀតក្នុងក្រុងបាត់ដំបងដែលនៅជាប់មាត់ស្ទឹង។ តាមការអង្កេតរបស់ខ្ញុំឃើញតាមពលរដ្ឋរស់តាមបណ្ដោយស្ទឹងមានការកែប្រែនិងចូលរួមទុកដាក់សំរាមច្រើនជាងមុខ មានពេលខ្លះពួកគាត់ជួយសហការប្រមូលសំរាមពួកខ្ញុំទៀតផង»។ នេះបើតាមការលើកឡើងរបស់កញ្ញា បុប្ផាផល ដោយបញ្ជាក់ថា កាលពីឆ្នាំមុន ក្រុមការងារចុះប្រមូលសំរាមបានប្រមាណ២៥០គីឡូក្រាមក្នុងមួយថ្ងៃ ហើយឥឡូវប្រមូលបានជាង១៥០គីឡូក្រាម។
ក្នុងសម្ដីរីករាយ កញ្ញា បុប្ផាផល បន្តទៀតថា ការងាររើសសំរាមនៅតំបន់ដងស្ទឹងសង្កែនេះ គឺតែមានការចូលរួមដោយស្ម័គ្រពីយុវជនតាមសាលារៀននិងអង្គការជាហូរហែរ។ កញ្ញារំពឹងថា ផ្នត់គំនិតនៃការចូលរួមដោះស្រាយបញ្ហាសំរាម គឺកើតមានគ្រប់ទីកន្លែង។ កញ្ញាពោលយ៉ាងដូច្នេះថា៖ «ខ្ញុំសង្ឈឹមថាការចូលរួមជជែកពីបញ្ហាសំរាម ការគ្រប់គ្រងសំរាម នឹងកើតមានគ្រប់កន្លែង ពិសេសគឺកើតមានទាំងសកម្មភាពផងដែរ។ ជាស្ដែងដូចសកម្មភាពចូលរួមរបស់អ្នកស្ម័គ្រជាក្រុមខ្ញុំកន្លងមក ជាកត្តាជុំរុញឲ្យមានអ្នកចូលរួមនិងបណ្ដុះគំនិតគិតពីបញ្ហាសំរាម បរិស្ថាន កាន់តែខ្លាំងឡើង»៕
Tag:
សំរាម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
