សង្គមអន្តរជាតិ
អន្តរជាតិ
កំណែទម្រង់ក្រុមប្រឹក្សាសន្តិសុខ៖ មន្ត្រីអាមេរិក និងរុស្ស៊ីថា ហាមប៉ះសិទ្ធិវ៉េតូ
កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិនាពេលកន្លងមក។ រូបភាព Xinhua
×![]()
ដោយ: តន ចាន់រិទ្ធារ៉ា
មន្ត្រីអាមេរិក និងរុស្ស៊ី នៅថ្ងៃទី១៦ ខែវិច្ឆិកា បានប្រកាសពីជំហររបស់ប្រទេសរៀងៗខ្លួនក្នុងការកែទម្រង់ក្រុមប្រឹក្សាសន្តិសុខដែលជាស្ថាប័នមានអំណាចក្រោមអង្គការសហប្រជាជាតិ (UN) ។ ការបន្ថែមសមាជិកថ្មី មិនមែនជាបញ្ហារាំងស្ទះឡើយ ប៉ុន្តែរុស្ស៊ី និងអាមេរិក មិនគាំទ្រការពង្រីកសិទ្ធិវ៉េតូដល់ប្រទេសឯទៀតក្រៅពីសមាជិកអចិន្ត្រៃយ៍ទាំង៥ឡើយ។ ចំណែកប្រធានមហាសន្និបាត UN បានរិះគន់ក្រុមប្រឹក្សាថា គិតតែពីប្រយោជន៍ និងមិនដោះស្រាយបញ្ហាប្រឈមធំៗរបស់ពិភពលោក។
មហាសន្និបាតអង្គការសហប្រជាជាតិលើកទី៧៥ នៅថ្ងៃទី១៦ ខែវិច្ឆិកា បានបើកការជជែកដេញដោលមួយលើកំណែទម្រង់ក្រុមប្រឹក្សាសន្តិសុខដ៏មានឥទ្ធិពល។ សមាជិកទាំង១៩៣ប្រទេស បានពិភាក្សាពីសិទ្ធិវ៉េតូ និងអភ័យឯកសិទ្ធិរបស់សមាជិកអចិន្ត្រៃយ៍ទាំង៥ ចិន រុស្ស៊ី អង់គ្លេស បារាំង និងអាមេរិក ក៏ដូចជាការពង្រីកសមាជិកភាពដើម្បីតុល្យភាពតំបន់នានា។
ការពង្រីកក្រុមប្រឹក្សាសន្តិសុខ ត្រូវបានមើលឃើញថា ជាប្រធានបទដែលមានការគាំទ្រ ខណៈសមាជិកអចិន្ត្រៃយ៍បច្ចុប្បន្ន មិនតំណាងឲ្យតុល្យភាពតំបន់ឡើយ។ ប៉ុន្តែកំណែទម្រង់សិទ្ធិពិសេសវ៉េតូ មិនត្រូវបានអាមេរិក និងរុស្ស៊ី គាំទ្រទេ។ អាមេរិក និងរុស្ស៊ីដែលប្រើសិទ្ធិពិសេសមួយនេះដល់ទៅ១៥ដងតាំងពីឆ្នាំ២០១១ លើសំណុំរឿងស៊ីរីតែមួយ មិនចង់ឃើញអំណាចពិសេសរបស់ខ្លួនត្រូវបានកាត់បន្ថយឡើយ។
«អាមេរិក នៅតែបើកចំហជាគោលការណ៍លើការពង្រីកដោយសមស្របក្រុមប្រឹក្សាសន្តិសុខ។» អ្នកការទូតអាមេរិក Ngoyi Ngoyi ប្រាប់កិច្ចប្រជុំបែបនេះ មុនបន្តថា ប៉ុន្តែ ការកែទម្រង់ មិនត្រូវធ្វើឡើងតាមមធ្យោបាយដែលកាត់បន្ថយប្រសិទ្ធផលរបស់ក្រុមប្រឹក្សា ឬប្រសិទ្ធភាពរបស់វា និងមិនត្រូវផ្លាស់ ឬពង្រីកវ៉េតូឡើយ។
បើតាមទីភ្នាក់ងារព័ត៌មាន AFP តំណាងរុស្ស៊ីឯណោះវិញ គំនិតដែលនាំទៅរកការថមថយសិទ្ធិសមាជិកអចិន្ត្រៃយ៍ក្រុមប្រឹក្សា រាប់ទាំងសិទ្ធិវ៉េតូផង ជារឿងមិនទទួលយកបានឡើយ។ អនុប្រធានបេសកកម្មតំណាងរុស្ស៊ីប្រចាំ UN លោកស្រី Anna Evstigneeva បន្ថែមថា ការប្រើ ឬគំរាមប្រើវ៉េតូ បានទប់ស្កាត់ក្រុមប្រឹក្សាមិនឲ្យក្លាយជាស្ថាប័នមានមន្ទិល។
នាកិច្ចប្រជុំដដែល តំណាងចិន Zhang Jun ក៏រិះគន់វត្តមានប្រទេសអភិវឌ្ឍដែលមានតំណាងច្រើន។ លោកស្នើឲ្យបន្ថែមសមាជិកភាពរបស់ប្រទេសតូច និងមធ្យម ពិសេសតំណាងរបស់ទ្វីបអាហ្វ្រិក។
ក្រុមប្រឹក្សាសន្តិសុខ ជាស្ថាប័នទទួលបន្ទុកកិច្ចការសន្តិសុខ ដែលមានសិទ្ធិដាក់ទណ្ឌកម្មលើប្រទេសណាមួយ និងការប្រើកម្លាំងយោធា។ ក្រៅពីសមាជិកអចិន្ត្រៃយទាំង៥ ក្រុមប្រឹក្សាមានសមាជិក១០ប្រទេសទៀត ដែលបោះឆ្នោតជ្រើសរើសរៀងៗរាល់ពីរឆ្នាំមកដង។ អាល្លឺម៉ង់ ឥណ្ឌា ជប៉ុន និងប្រេស៊ីល ជាបេក្ខនាំមុខសម្រាប់តំណែងសមាជិកមិនអចិន្ត្រៃយ៍ ខណៈអាហ្វ្រិកដែលចង់បានពីរប្រទេសនោះ មិនទាន់មានបេក្ខភាពជាក់លាក់ឡើយ៕
Tag:
ក្រុមប្រឹក្សាសន្តិសុខ
អាមេរិក
រុស្ស៊ី
វ៉េតូ
© រក្សាសិទ្ធិដោយ thmeythmey.com
