កីឡាអន្តរជាតិ
អន្តរជាតិ
Arsenal ក្លាយជាក្លិបបាល់ទាត់ដំបូងគេចូលរួមដោះស្រាយបម្រែបម្រួលអាកាសធាតុជាមួយ UN
× Arsenal ក្លាយជាក្លិបកីឡាបាល់ទាត់ដំបូងគេដែលចូលរួមក្នុងសកម្មភាពកីឡារបស់អង្គការសហប្រជាជាតិក្នុងការដោះស្រាយការប្រែប្រួលអាកាសធាតុ (UN Sports for Climate Action Framework) នៅជុំវិញពិភពលោក។ ក្រុមកាំភ្លើងធំ ប្តេជ្ញាចិត្តក្នុងការដោះស្រាយបញ្ហាប្រឈមសកលមួយនេះ។ នេះបើតាមការចុះផ្សាយរបស់ Arsenal នៅលើវេបសាយផ្ទាល់ពួកគេ នៅថ្ងៃទី១៦ វិច្ឆិកា។
Arsenal ក្លិបក្នុងក្របខណ្ឌលីគកំពូលអង់គ្លេស Premier League នឹងចូលរួមជាមួយគណៈកម្មាធិអូឡាំពិកអន្តរជាតិ (IOC), សហព័ន្ធកីឡាបាល់ទាត់ពិភពលោក (FIFA) និងស្ថាប័នគ្រប់គ្រងកីឡាបាល់ទាត់អង់គ្លេស (FA) ដើម្បីសម្រេចឲ្យបានលើគំនិតផ្តួចផ្តើមរបស់ UN លើបញ្ហាបម្រែបម្រួលអាកាសធាតុនេះ។
ការចូលរួមនេះ មានគោលបំណងដើម្បីបង្រួបបង្រួមសហគមន៍កីឡានៅជុំវិញពិភពលោកក្នុងការប្តេជ្ញាចិត្តសម្រេចគោលដៅនៃកិច្ចព្រមព្រៀងទីក្រុងប៉ារីសដើម្បីកាត់បន្ថយឧស្ម័នពុលនៅឆ្នាំ ២០៥០។
Arsenal បានចុះហត្ថលេខាលើកិច្ចព្រមព្រៀងមួយដែលត្រូវអនុវត្តនលើកិច្ចខិតខំប្រឹងប្រែងជាប្រព័ន្ធដើម្បីលើកកម្ពស់ទំនួលខុសត្រូវផ្នែក «បរិស្ថាន» និង «កាត់បន្ថយផលប៉ះពាល់អាកាសធាតុទូទៅ»។
គោលនយោបាយបៃតងរបស់ក្លិបរហស្សនាមកាំភ្លើងធំ រួមបញ្ចូលទាំងការដំឡើងប្រព័ន្ធកែច្នៃទឹកនៅឯមជ្ឈមណ្ឌលបណ្តុះបណ្តាលរបស់ពួកគេនៅឯ London Colney ភូមិមួយនៅភាគខាងជើងក្រុងឡុងដ៍ និងដាំដើមឈើជាង ២៩០០០ដើម នៅទីនោះចាប់តាំងពីឆ្នាំ ១៩៩៩មក។
ហត្ថលេខីនៃគំនិតផ្តួចផ្តើមរបស់ UN ដែលរួមមាន FIFA, FA និង IOC ដែលគាំទ្រមហិច្ឆតារបស់ UN ត្រូវប្រកាន់ខ្ជាប់គោលការណ៍ ៥ ដូចជាប្រឹងប្រែងជាប្រព័ន្ធដើម្បីលើកកម្ពស់ការទទួលខុសត្រូវផ្នែកបរិស្ថាន កាត់បន្ថយផលប៉ះពាល់អាកាសធាតុទូទៅ អប់រំពីសកម្មភាពអាកាសធាតុ លើកកម្ពស់ការប្រើប្រាស់ប្រកបដោយនិរន្តរភាព និងទំនួលខុសត្រូវ និងតស៊ូមតិសម្រាប់សកម្មភាពអាកាសធាតុតាមរយៈការទំនាក់ទំនង៕
Tag:
Arsenal
UN Sports for Climate Action Framework
Climate Change
© រក្សាសិទ្ធិដោយ thmeythmey.com