COVID-19
ជាតិ
រដ្ឋមន្ត្រីកសិកម្ម និងរដ្ឋមន្ត្រីការបរទេសកម្ពុជា អះអាងថា ខ្លួនគ្មានជំងឺកូវីដ-១៩ រដ្ឋមន្រ្តីកសិកម្ម រុក្ខាប្រមាញ់ និងនេសាទ លោក វេង សាខុន ចាប់ដៃលោក Peter Szijjarto រដ្ឋមន្ត្រីការបរទេស និង ពាណិជ្ជកម្មហុងគ្រី នៃការចុះហត្ថលេខាលើកិច្ចព្រមព្រៀង កាលពីថ្ងៃទី៣ វិច្ឆិកា ក្រោមវត្តមានសម្ដេចនាយករដ្ឋមន្រ្តី ហ៊ុន សែន (កណ្ដាល) និងលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ (ឈរជាប់សម្ដេច ហ៊ុន សែន) និងមន្ត្រីផ្សេងទៀតឈរអម។
× ភ្នំពេញ៖ ក្រៅពីសម្ដេច ហ៊ុន សែន និងភរិយា ក៏មានរដ្ឋមន្ត្រីក្រសួងកសិកម្ម និងរដ្ឋមន្ត្រីក្រសួងការបរទេសកម្ពុជា អះអាងថា ខ្លួនគ្មានជំងឺកូវីដ-១៩ ដែរ នៃការធ្វើតេស្តលើកចុងក្រោយ នៅថ្ងៃទី១៨ វិច្ឆិកានេះ។
លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានបង្ហោះសារយ៉ាងខ្លីនៅហ្វេសប៊ុក ដោយឡែកមួយថា ខ្លួនអវិជ្ជមានកូវីដ-១៩។« លទ្ធផលនៃការធ្វើតេស្តរកមេរោគកូវីដ១៩ លើកទី៤ របស់ខ្ញុំ និងក្រុមគ្រួសារខ្ញុំ គឺអវិជ្ជមានទាំងអស់គ្នា»។ នេះបើតាមលោក ប្រាក់ សុខុន។
រដ្ឋមន្ត្រីកសិកម្ម រុក្ខាប្រមាញ់ និងនេសាទ លោក វេង សាខុន ក៏គ្មានជំងឺកូវីដដែរ។ លោក វេង សាខុន បញ្ជាក់ដូច្នេះ«ពិតជាមានក្តីរំភើបរីករាយជាពន់ពេក នៅរសៀលថ្ងៃនេះ ក្រោយពីទទួលបានដំណឹងពីក្រសួងសុខាភិបាល ថា លទ្ធផលនៃការធ្វើតេស្តទៅលើសំណាកដែលបានផ្តល់ជាលើកទីបួន នាព្រឹកមិញនេះរបស់យើងខ្ញុំករុណា ខ្ញុំ គឺទទួលបានលទ្ធផល អវិជ្ជមានមេរោគកូវីដ-១៩ »។
គិតត្រឹមម៉ោង៣ រសៀលថ្ងៃទី១៨ វិច្ឆិកានេះ មានតែសម្ដេច ហ៊ុន សែន , លោក ប្រាក់ សុខុន និងលោក វេង សាខុន ដែលបង្ហោះពីលទ្ធផលតេស្តលើកទី៤ ខ្លួនលើហ្វេសប៊ុក ខណៈនៅមានអ្នកពាក់ព័ន្ធព្រឹត្តិការណ៍ ៣ វិច្ឆិកា ជាច្រើនរូបទៀត ដែលមិនទាន់បង្ហាញលទ្ធផល។ មន្ត្រីទាំងនោះ រួមមានលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក លឹម គានហោ រដ្ឋមន្ត្រីក្រសួងធនធានទឹក, ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល, លោកស្រីជា សិរី អគ្គនាយកបច្ចេកទេស ធនាគារជាតិនៃកម្ពុជា រួមទាំងមន្រី្តជាន់ខ្ពស់តាមស្ថាប័ននានា, ក្រុមអង្គរក្ស និងក្រុមអ្នកសារព័ត៌មានជាតិ-អន្តរជាតិ និងបុគ្គលិកតាមគ្រឹះស្ថានសិក្សា មាតាបិតាសិស្ស ។
ចំពោះការធ្វើតេស្ត៣លើកកន្លងមក គឺមានមនុស្ស៤នាក់ប៉ុណ្ណោះ វិជ្ជមានកូវីដ-១៩ រួមមានលោក សួស យ៉ារ៉ា តំណាងរាស្ត្រគណបក្សប្រជាជនកម្ពុជា, លោក ស ចិត្រា អគ្គលេខាធិការរងក្រសួងកសិកម្ម និងទូតហុងគ្រីប្រចាំកម្ពុជា និងវៀតណាម រួមទាំងអង្គរក្សម្នាក់។ ប៉ុន្តែលោក សួស យ៉ារ៉ា បានជាសះស្បើយពីកូវីដ-១៩ហើយ កាលពីថ្ងៃទី១៦ វិច្ឋិកា។
គិតត្រឹមថ្ងៃទី១៨វិច្ឆិកា ឆ្នាំ២០២០ កម្ពុជា រកឃើញអ្នកឆ្លងជំងឺកូវីដ-១៩ចំនួន៣០៤នាក់ ដោយក្នុងនោះ មាន៣០៤នាក់ បានជាសះស្បើយ និង១៣នាក់ទៀត កំពុងព្យាបាល៕
Tag:
ប្រាក់ សុខុន
COVID-19
© រក្សាសិទ្ធិដោយ thmeythmey.com