ជាតិ
អាហារូបករណ៍ជំនាញកសិកម្ម៤០កន្លែង នៅវិទ្យាស្ថានបច្ចេកវិទ្យាកំពង់ស្ពឺ
×
ដោយ៖ ស៊ុល រ៉វី
ភ្នំពេញ៖ ក្រសួងអប់រំ យុវជន និងកីឡា បានផ្ដល់អាហារូបករណ៍ចំនួន ៤០កន្លែង ដល់និស្សិតដែលចាប់អារម្មណ៍ជំនាញកសិកម្ម សម្រាប់សិក្សានៅវិទ្យាស្ថានបច្ចេកវិទ្យាកំពង់ស្ពឺ។ បើតាមសេចក្ដីជូនដំណឹងរបស់ក្រសួងអប់រំ អាហារូបករណ៍នេះ ផ្ដោតសម្រាប់មុខជំនាញវិទ្យាសាស្ត្រដំណាំ និងវិទ្យាសាស្ត្រសត្វ។
អាហារូបករណ៍នេះ ផ្ដល់ដល់និស្សិតដែលមានសញ្ញាបត្របរិញ្ញាបត្ររង សម្រាប់សិក្សាថ្នាក់បន្តបរិញ្ញាបត្រ (២+២) ផ្ដោតលើជំនាញវិទ្យាសាស្ត្រដំណាំចំនួន ២០កន្លែង និងវិទ្យាសាស្ត្រសត្វចំនួន ២០កន្លែង។ និស្សិតដែលចាប់អារម្មណ៍នូវជំនាញខាងលើនេះ អាចទៅទទួលពាក្យនៅវិទ្យាស្ថានបច្ចេកវិទ្យាកំពង់ស្ពឺដោយផ្ទាល់ ឬអាចទៅទទួលពាក្យនៅនាយកដ្ឋានតម្រង់ទិសវិជ្ជាជីវៈ រាជធានីភ្នំពេញ។ កាលបរិច្ឆេទនៃការទទួលពាក្យចាប់ពីថ្ងៃផ្សាយដំណឹងនេះ រហូតដល់ថ្ងៃទី១៥ ខែធ្នូ ឆ្នាំ២០២០។
វិទ្យាស្ថានបច្ចេកវិទ្យាកំពង់ស្ពឺ ជាគ្រឹះស្ថានឧត្ដមសិក្សាសាធារណៈស្ថិតនៅក្រោមក្រសួងអប់រំ យុវជន និងកីឡា ដែលឈានមុខគេតាមបណ្ដាខេត្ត លើការច្នៃប្រតិដ្ឋ និងនវានិវត្តន៍ផ្នែកបច្ចេកវិទ្យា និងកសិកម្ម ដែលមានបង្រៀននូវ ៦ មុខជំនាញដូចជា វិទ្យាសាស្ត្រដំណាំ វិទ្យាសាស្ត្រជលផល វិទ្យាសាស្ត្រសត្វ កំព្យូទ័រធុរកិច្ច បច្ចេកវិទ្យាអាហារ និងជំនាញដំឡើងប្រព័ន្ធអគ្គិសនី។ វិទ្យាស្ថាននេះ មានទីតាំងស្ថិតនៅផ្លូវជាតិលេខ ៤៤ ភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ៕
Tag:
Thmey Thmey 25
វិទ្យាស្ថានបច្ចេកវិទ្យាកំពង់ស្ពឺ
អប់រំ
© រក្សាសិទ្ធិដោយ thmeythmey.com