COVID-19
ជាតិ
សុខភាព
បុរសខ្មែរ២នាក់ និងប៉ាគីស្ថានម្នាក់ ជាសះស្បើយពីCOVID-19 ខណៈគ្មានករណីឆ្លងថ្មី
× ភ្នំពេញ៖ បុរសខ្មែរ២នាក់ និងបុរសជនជាតិប៉ាគីស្ថាន១នាក់ បានជាសះស្បើយពីជំងឺកូវីដ-១៩ នៅថ្ងៃទី២០ វិច្ឆិកា ខណៈគ្មានករណីឆ្លងថ្មីនៃជំងឺកូវីដ-១៩ឡើយ ។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល ។
ក្រសួងសុខាភិបាល បានបញ្ជាក់ថា មនុស្សទាំង៣នាក់ ដែលបានសះស្បើយពីកូវីដ-១៩នោះ មានបុរសជនជាតិខ្មែរម្នាក់វ័យ២៩ឆ្នាំ មានអាសយដ្ឋាននៅភូមិរាំងដេក ឃុំគគីរឃុំ ស្រុកគៀនស្វាយ ខេត្តកណ្តាល និងបុរសខ្មែរម្នាក់ទៀត វ័យ៣៨ឆ្នាំ មានអាសយដ្ឋាន នៅភូមិទំនប់ ឃុំរកាក្រៅ ក្រុងដូនកែវ ខេត្តតាកែវ។ អ្នកទាំង២នាក់នេះ គឺបានធ្វើដំណើរមកពីប្រទេសជប៉ុន បន្តជើងហោះហើរនៅកូរ៉េខាងត្បូង មកដល់កម្ពុជា កាលពីថ្ងៃទី២៦តុលា ឆ្នាំ២០២០។
ដោយឡែក បុរសជនជាតិប៉ាគីស្ថាន ដែលបានជាសះស្បើយពីកូវីដ-១៩ ដែលមានវ័យ៣៥ឆ្នាំ មានអាសយដ្ឋាននៅសង្កាត់បឹងកក់១ ខណ្ឌទួលគោក រាជធានីភ្នំពេញ គឺបានធ្វើដំណើរមកពីប្រទេសឥណ្ឌា ដោយឆ្លងកាត់ប្រទេសអារ៉ាប់ប៊ីសាអូឌីត និងបន្តជើងហោះហើរនៅកូរ៉េខាងត្បូង ហើយមកដល់កម្ពុជា កាលពីថ្ងៃទី៥វិច្ឆិកា ឆ្នាំ២០២០។
បច្ចុប្បន្ន អ្នកទាំង៣រូបនោះត្រូវបានក្រសួងសុខាភិបាលអនុញ្ញាតឱ្យចាកចេញពីមន្ទីរពេទ្យ ក្រោយទទួលលទ្ធផលតេស្តអវិជ្ជមាននៃជំងឺកូវីដ-១៩ ចំនួន២ដង។
កម្ពុជា មានអ្នកជំងឺកូវីដ-១៩ ចំនួន៣០៤នាក់ ក្នុងនោះ មានអ្នកជាសះស្បើយ២៩៤នាក់ ខណៈអ្នកជំងឺកូវីដ ៩នាក់ទៀត កំពុងសម្រាកព្យាបាលនៅមន្ទីរពេទ្៕
© រក្សាសិទ្ធិដោយ thmeythmey.com