ជាតិ
ក្រសួងការងារ ឲ្យកម្មករដែលគ្មានការងារ ទៅរៀនជំនាញ ដោយបាន២០ម៉ឺនរៀលក្នុង១ខែ
កម្មករធ្វើដំណើរតាមរយន្តរួមគ្នាទៅផ្ទះ ពេលចេញពីរោងចក្រ
×![]()
ដោយ: ឡាយ សុភាវតី
ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ ប្រកាសឲ្យកម្មករនិយោជិក ដែលត្រូវបានព្យួរការងារនិងបាត់បង់ការងារធ្វើ ដោយការរីករាលដាលកូវីដ-១៩ ចូលរៀនវគ្គបណ្ដុះបណ្ដាលបច្ចេកទេស និងវិជ្ជាជីវៈ រយៈពេល៤ខែ ដោយឥតគិតថ្លៃ ហើយទទួលបានប្រាក់ឧបត្ថម្ភថែមទៀត។ 
លោក អ៊ិត សំហេង រដ្ឋមន្រី្តក្រសួងការងារ បានចេញលិខិតជូនដំណឹង កាលពីថ្ងៃទី១៦ ខែវិច្ឆិកានេះថា មុខជំនាញបច្ចេកទេសនិងវិជ្ជាជីវៈដែលនឹងបើកវគ្គបណ្ដុះបណ្ដាល គឺជាមុខជំនាញមានទីផ្សារការងារនាពេលបច្ចុប្បន្ននិងអនាគត។ លើសពីនេះ លោកបញ្ជាក់ថា កម្មករនិយោជិតដែលចូលរៀន នឹងទទួលបានប្រាក់ឧបត្ថម២០ម៉ឺនរៀល ក្នុង១ខែ សម្រាប់ចំណាយលើការហូបចុកនិងស្នាក់នៅ។
មុខជំនាញដែលនឹងបើកវគ្គបណ្ដុះបណ្ដាល រួមមាន តបណ្ដាញអគ្គិសនី តបណ្ដាញទឹក ជួសជុលបរិក្ខារអគ្គិសនី ជួសជុល-ថែទាំរថយន្ត បច្ចេកទេសកែច្នៃគ្រឿងបន្លាស់ម៉ាស៊ីន ជំនាញធ្វើម្ហូប ឆុងកាហ្វេ ក្រឡុកស្រា និង ដុតនំប័ង ជាដើម។ កម្មករនិយោជិតដែលមានបំណងចង់រៀន ត្រូវមានសៀវភៅការងារ ប័ណ្ណសម្គាល់កម្មករនិយោជិត កាតសម្គាល់ខ្លួន និង អត្តសញ្ញាណប័ណ្ណសញ្ញាតិខ្មែរ ដើម្បីចុះឈ្មោះចូលរៀនតាមគ្រឹះស្ថានអប់រំបណ្ដុះបណ្ដាល៕
Tag:
កម្មករ
ជំនាញ
© រក្សាសិទ្ធិដោយ thmeythmey.com
