ប្រាសាទព្រៃដើមស្រុក ប្រាសាទបុរាណក្នុងខេត្តព្រៃវែងដែលរក្សាទម្រង់រូបរាងដល់បច្ចុប្បន្ន

ជាតិ

២៥ខេត្ត/រាជធានី

ប្រាសាទព្រៃដើមស្រុក ប្រាសាទបុរាណក្នុងខេត្តព្រៃវែងដែលរក្សាទម្រង់រូបរាងដល់បច្ចុប្បន្ន

22, Nov 2020 , 12:44 pm

រូបភាព

ប្រាសាទព្រៃដើមស្រុក.(រូបភាពពីមន្ទីរទេសចរណ៍ខេត្តព្រៃវែង)

ដោយ: សារព័ត៌មានថ្មីៗ

ប្រាសាទព្រៃដើមស្រុក ឬប្រាសាទព្រះធាតុរាជ គឺជាប្រាសាទបុរាណតែមួយគត់ នៅក្នុងខេត្តព្រៃវែង ដែលនៅមានរូបរាង មកទល់បច្ចុប្បន្ន។ ប្រាសាទនេះ មានទីតាំងស្ថិតនៅភូមិបឹងជ័រ ឃុំព្រៃទឹង ស្រុកស៊ីធរកណ្ដាល។ ប្រាសាទបុរាណមួយនេះ ធ្វើពីដីឥដ្ឋ និងថ្មភក់ មានសភាពទ្រុឌទ្រោម និងមានឬសដើមជ្រៃ ព័ទ្ធតួប្រាសាទ។ ក្រៅពីសម្បត្តិវប្បធម៌មួយនេះ ខេត្តព្រៃវែង ក៏មានសំណង់បុរាណផ្សេងទៀតផងដែរ ដែលនៅសេសសល់។

ខេត្តព្រៃវែង នៅមានប្រាសាទបុរាណតែមួយគត់ ដែលនៅមានរូបរាង មកដល់ពេលបច្ចុប្បន្ន នោះគឺប្រាសាទព្រៃដើមស្រុក ឬប្រាសាទព្រះធាតុរាជ។ នេះបើតាម បញ្ជីស្ថានីយបុរាណប្រទេសកម្ពុជា របស់ក្រសួងវប្បធម៌ និងវិចិត្រសិល្បៈ ដែលបានចេញផ្សាយកាលពីឆ្នាំ២០១០ ។

ប្រាសាទព្រៃដើមស្រុក មានទីតាំងស្ថិតនៅភូមិបឹងជ័រ ឃុំព្រៃទឹង ស្រុកស៊ីធរកណ្ដាល ប្រមាណ ៣៨គីឡូម៉ែត្រ ពីទីរួមខេត្តព្រៃវែង។ នេះបើតាមប្រាសាទបុរាណមួយនេះ កសាងឡើងអំពីឥដ្ឋបួនជ្រុងកម្ពស់ ៧ម៉ែត្រ មានសណ្ឋានជាស្តូប ទំហំ៥ម៉ែត្រ កសាងឡើងប្រហែល ក្នុងសតវត្សទី១៧ ក្នុងរជ្ជកាល ព្រះបាទជ័យជេដ្ឋាទី៤។ នេះបើតាមលោក ទឹម ទេពវង្សា ប្រធានមន្ទីរទេសចរណ៍ខេត្តព្រៃវែង ប្រាប់សារពត៌មាន Thmey Thmey 25 ដោយលោកយោងតាមការដំណាលរៀងមក ពីចាស់ព្រឹទ្ធាចារ្យនៅតំបន់នោះ។

តាមប្រធានមន្ទីរទេសចរណ៍ខេត្តព្រៃវែង ប្រាសាទនេះ មានអ្នកស្គាល់តិចតួចណាស់ សូម្បីតែប្រជាជននៅក្នុងខេត្តនេះផ្ទាល់ ក៏មិនបានដឹងថាទីតាំងនេះ មានប្រាសាទបុរាណនេះនោះដែរ ព្រោះតែមិនទាន់មានការរៀបចំ ជារមណីយដ្ឋានទេសចរណ៍ប្រវត្តិសាស្ត្រ។ លោក ទឹម ទេពវង្សា បានបន្តបញ្ជាក់ទៀតថា៖ «កន្លងមក មន្ទីរទេសចរណ៍ខេត្ត បានចុះទៅមើលនៅទីតាំងភូមិសាស្ត្រផ្ទាល់ ដើម្បីនឹងរៀបចំនៅតំបន់នេះ ឲ្យក្លាយជាតំបន់ទេសចរណ៍។ មួយវិញទៀតតំបន់ប្រាសាទនេះ ជាទីតាំងអំណោយផល ដោយពទ្ធ័ជំវិញដោយព្រៃព្រឹក្សាយ៉ាងស្រស់ស្អាត និងសម្បូរទៅដោយដើមត្នោត ដែលអាចឲ្យកសិករយើងផលិតជាស្ករត្នោត យ៉ាងអំណោយផលផងដែរ»។

តាមបញ្ជីស្ថានីយបុរាណប្រទេសកម្ពុជា របស់ក្រសួងវប្បធម៌ និងវិចិត្រសិល្បៈ ក្រៅពីប្រាសាទបុរាណដែលនៅមានរូបរាងចំនួន១នេះ មានសំណង់គ្រឹះប្រាសាទចំនួន៩ បានបាត់បង់រូបរាងទៅហើយ។ ទោះយ៉ាងនេះក្តី ក៏នៅមានទួលបុរាណចំនួន ១,៣៥៤ និងស្រះជាទីតាំងយកថ្ម ចំនួន៣ ដែលនៅមានរូបរាង ក្នុងខេត្តព្រៃវែង៕