COVID-19
អន្តរជាតិ
ក្រុមហ៊ុន AstraZeneca ថា វ៉ាក់សាំងកូវីដ-១៩ មានប្រសិទ្ធភាពជាមធ្យម៧០ភាគរយ
វ៉ាក់សាំងដែលអភិវឌ្ឍរួមគ្នាដោយក្រុមហ៊ុន AstraZeneca និងសាកលវិទ្យាល័យ Oxford។ រូបភាព AFP
×![]()
ដោយ: ធៀន ភារិន្ទ
ក្រុមហ៊ុន AstraZeneca នៅថ្ងៃទី២៣ ខែវិច្ឆិកា បានអះអាងថា វ៉ាក់សាំងប្រឆាំងកូវីដ-១៩ របស់ខ្លួន មានប្រសិទ្ធិភាពមធ្យមចំនួន៧០ភាគរយ។ នេះជាលទ្ធផលធ្វើតេស្តបឋមរបស់ក្រុមហ៊ុនអង់គ្លេស ដែលសហការជាមួយសាកលវិទ្យាល័យ Oxford ។ 
គិតត្រឹមថ្ងៃទី២៣ ខែវិច្ឆិកា ក្រុមហ៊ុនចំនួន ២ហើយ បានអះអាងថា ក្រុមហ៊ុនរបស់ខ្លួនមានប្រសិទ្ធភាពរហូតដល់៩០ភាគរយ និងលើស ៩០ភាគរយ។ ក្នុងនោះមានដូចជា ក្រុមហ៊ុន Pfizer និងក្រុមហ៊ុន BioNTech ដែលអះអាងថា វ៉ាក់សាំងខ្លួនមានប្រសិទ្ធភាព ៩៥ភាគរយ ខណៈក្រុមហ៊ុន Moderna មានប្រសិទ្ធភាពចំនួន ៩៤,៥ ភាគរយ។
ក្រុមហ៊ុនចុងក្រោយ AstraZeneca ដែលសហការជាមួយសកលវិទ្យាល័យ Oxford បានប្រកាសថាវ៉ាក់សាំងខ្លួន មានប្រសិទ្ធភាពពី៦០ភាគរយរហូតដល់ ៩០ភាគរយ។ យ៉ាងណាក៏ដោយ នេះគ្រាន់តែជាលទ្ធផលវិភាគបឋមប៉ុណ្ណោះ។
តាមការបញ្ជាក់របស់សកលវិទ្យាល័យ Oxford ដែលជាដៃគូអភិវឌ្ឍ វ៉ាក់សាំងនេះ មានប្រសិទ្ធភាព៩០ ភាគរយឯណោះ បន្ទាប់ពីអ្នកចូលរួម ត្រូវបានចាក់វ៉ាក់សាំងពាក់កណ្តាលដូស និង១ខែក្រោយមក ចាក់ពេញមួយដូសថែមទៀត។ ចំណែកបេក្ខជនផ្សេងទៀត បានបង្ហាញលទ្ធផលត្រឹមតែ ៦២ភាគរយប៉ុណ្ណោះ បន្ទាប់ពីចាក់វ៉ាក់សាំង មួយដូស និង១ខែក្រោយមកចាក់មួយដូសទៀត។ លទ្ធផលនេះ យកចេញពីការធ្វើតេស្តដំណាក់កាលចុងក្រោយនៅអង់គ្លេស និងប្រេស៊ីល។
លទ្ធផលវិភាគបញ្ចូលគ្នា បានបង្ហាញឲ្យឃើញថា វ៉ាក់សាំងនេះ មានប្រសិទ្ធភាពកម្រិតមធ្យមចំនួន ៧០ភាគរយ។ ក្នុងការវិភាគនេះ អ្នកជំនាញបានធ្វើតេស្តវ៉ាក់សាំងលើករណីកូវីដ-១៩ ចំនួន ១៣១ករណី។
«ប្រសិទ្ធភាព និងសុវត្ថិភាពនៃវ៉ាក់សាំងនេះ បញ្ជាក់ថា មានឥទ្ធិពលខ្ពស់ ក្នុងការប្រយុទ្ធប្រឆាំងកូវីដ-១៩»។ ប្រធានប្រតិបត្តិក្រុមហ៊ុន AstraZeneca លោក Pascal Soriot បានលើកឡើងបែបនេះ ដោយបន្ថែមថា វ៉ាក់សាំងនេះប្រភេទនេះ នឹងជួយស្តារស្ថានភាពអាសន្ននៃសុខភាពសាធារណៈផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
នាយករដ្ឋមន្ត្រីអង់គ្លេស លោក បូរីស ចនសុន ក៏បានសាទរដំណឹងនេះដែរ ដោយបញ្ជាក់ថា វាជាដំណឹងដ៏ល្អមួយ ដែលបានបង្ហាញពីប្រសិទ្ធភាពរបស់វ៉ាក់សាំង នៅក្នុងដំណាក់កាលសាកល្បង។ បើតាមលោ កចនសុន បើទោះបីជាវ៉ាក់សាំងមួយនេះ ត្រូវការការត្រួតពិនិត្យប្រសិទ្ធិភាពបន្ថែមទៀតក្តី វានៅតែជាលទ្ធផលដ៏អស្ចារ្យមួយ៕
Tag:
កូវីដ-១៩
© រក្សាសិទ្ធិដោយ thmeythmey.com
