ជាតិ
សង្គមជាតិ
ពិធីក្រុងពាលីក្នុងការបើកការដ្ឋានសាងសង់ស្តូបមិត្តភាពកម្ពុជា-វៀតណាម នៅខេត្តត្បូងឃ្មុំ កាលពីថ្ងៃទី២០ ខែវិច្ឆិកា ឆ្នាំ២០២០ (រូបពីទំព័រហ្វេសប៊ុក រណសិរ្សសាមគ្គី អភិវឌ្ឍន៍មាតុភូមិកម្ពុជា)
×![]()
ដោយ: សារព័ត៌មានថ្មីៗ
ស្តូបមិត្តភាពកម្ពុជា-វៀតណាម១បន្ថែមទៀត ចាប់ផ្តើមបើកការដ្ឋានសាងសង់ នៅលើទឹកដីខេត្តត្បូងឃ្មុំ។ ពិធីក្រុងពាលីនៃការបើកការដ្ឋានសាងសង់ស្តូបមិត្តភាពថ្មីនេះ ត្រូវបានរៀបចំឡើង កាលពីថ្ងៃទី២០ ខែវិច្ឆិកា ឆ្នាំ២០២០។ 
បើតាមការចុះផ្សាយរបស់សារព័ត៌មានវៀតណាមឈ្មោះ VOV (Voice of Vietnam) ស្តូបមិត្តភាពកម្ពុជា-វៀតណាម លើទឹកដីខេត្តត្បូងឃ្មុំនេះ គឺជាស្តូបទី២២ហើយ ដោយគ្រោងសាងសង់លើផ្ទៃដីទំហំប្រមាណ៤ហិកតា។
សារព័ត៌មានថ្មីៗ មិនអាចសុំព័ត៌មានបន្ថែមជុំវិញស្តូបមិត្តភាពកម្ពុជា-វៀតណាមនេះ ពីលោក ជាម ច័ន្ទសោភ័ណ អភិបាលខេត្តត្បូងឃ្មុំបានទេ ដោយសារតែលោក មិនលើកទូរស័ព្ទ។
អ្នកចូលរួមក្នុងពិធីបើកការដ្ឋានសាងសង់ស្តូបមិត្តភាពកម្ពុជា-វៀតណាម នៅខេត្តត្បូងឃ្មុំ មានដូចជា លោកវរសេនីយ៍ឯក ង្វៀន ថាញជិញ ប្រធានអនុព័ន្ធយោធាក្រសួងការពារជាតិវៀតណាមប្រចាំកម្ពុជា លោក ញ៉ែម វ៉ាលី អគ្គលេខាធិការនៃក្រុមប្រឹក្សាជាតិរណសិរ្សសាមគ្គីអភិវឌ្ឈន៍មាតុភូមិកម្ពុជា រួមទាំងអាជ្ញាធរខេត្ត បណ្តាស្ថាប័ន និង អង្គភាពពាក់ព័ន្ធផ្សេងទៀត។
ស្តូបមិត្តភាពកម្ពុជា-វៀតណាម ក្នុងខេត្តកំពង់ចាម ដែលត្រូវបានសាងសង់រួចនិងសម្ពោធជាផ្លូវការ កាលពីអំឡុងខែមករា ឆ្នាំ២០២០ (រូបពីក្រសួងព័ត៌មាន)
VOV សរសេរថា៖«ស្តូបមិត្តភាពកម្ពុជា-វៀតណាម បង្ហាញពីសាមគ្គីភាពនៃប្រទេសទាំង២ ហើយនឹងជួយឲ្យយុវជនជំនាន់ក្រោយ យល់កាន់តែច្បាស់ពីតម្លៃនៃសន្តិភាពនិងសេរីភាព ព្រមទាំងការជួយគាំទ្រគ្នាទៅវិញទៅមក ដែលមានជាប្រវត្តិសាស្ត្រនៃប្រជាជាតិទាំង២»។
VOV បានឲ្យដឹងថា ស្តូបមិត្តភាពកម្ពុជា-វៀតណាមចំនួន១៧ តាមបណ្តាខេត្តនានា ត្រូវបានសាងសង់និងសម្ពោធជាផ្លូវរួចហើយ ខណៈ៤ទៀត នៅខេត្តប៉ៃលិន ខេត្តព្រៃវែង ខេត្តកំពង់ស្ពឺ និង ខេត្តឧត្តរមានជ័យ ក៏ត្រូវបានបើកការដ្ឋានសាងសង់ដែរ។ VOV អះអាងថា តាមការគ្រោងទុក ស្តូបមិត្តភាពកម្ពុជា-វៀតណាម ក្នុងខេត្តទាំង៤នេះ នឹងត្រូវរៀបចំសម្ពោធនៅចុងឆ្នាំ២០២០នេះ។
ជាទូតទៅ គេ ចាត់ទុកស្តូបមិត្តភាពកម្ពុជា-វៀតណាម ថាជាកន្លែងដែលរម្លឹកដល់ពលីកម្មរបស់កងទ័ពកម្ពុជានិងកងទ័ពវៀតណាម ក្នុងការរួមគ្នារំដោះកម្ពុជា ពីរបបខ្មែរក្រហម៕
Tag:
ស្តូបមិត្តភាពកម្ពុជា-វៀតណាម
ត្បូងឃ្មុំ
© រក្សាសិទ្ធិដោយ thmeythmey.com
