ជាតិ
កសិករដាំស្ពៃក្ដោបក្នុងផ្ទះសំណាញ់នៅប៉ៃលិន អាចប្រមូលផលម្ដង៧០០គីឡូក្រាម និងរកប្រាក់បានជាង ២លានរៀល
× កសិករដែលជាសមាជិកបណ្តុំអាជីវកម្មបន្លែសុវត្ថិភាពផ្ទះសំណាញ់នៅក្នុងខេត្តប៉ៃលិន តាមរយៈកម្មវិធីផ្សព្វផ្សាយបច្ចេកទេសថ្មីដែលធន់នឹងការប្រែប្រួលអាកាសធាតុ (អាស្ប៉ាយ) អាចប្រមូលទិន្នផលស្ពៃក្ដោប ១០០គីឡូក្នុងមួយថ្ងៃ និងចំនួន ៧០០គីឡូក្នុងមួយលើក។ ស្ពៃក្ដោបនេះ កសិករអាចលក់បានក្នុងតម្លៃ ៣ ៥០០រៀលក្នុងមួយគីឡូក្រាម។ នេះបើតាមហ្វេសប៊ុករបស់លោកវេង សាខុន រដ្ឋមន្ត្រីកសិកម្ម រុក្ខប្រម៉ាញ់ និងនេសាទ។
ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន មានកសិករចំនួន ៧នាក់ ជាសមាជិកនៃកម្មវិធី(អាស្ប៉ាយ) ដែលទទួលជោគជ័យក្នុងការដាំដុះបន្លែក្នុងផ្ទះសំណាញ់។ ភាពជោគជ័យរបស់កសិករទាំងនេះ ដោយសារមានការគាំទ្រផ្ទះសំណាញ់ និងការទទួលបានការបណ្តុះបណ្តាលបច្ចេកទេសដាំដុះបន្លែសុវត្ថិភាព និងការគាំទ្រពីកម្មវិធីផ្សព្វផ្សាយបច្ចេកទេសថ្មីដែលធន់នឹងការប្រែប្រួលអាកាសធាតុ នៃមន្ទីរកសិកម្មខេត្តប៉ៃលិន។
ដំណាំស្ពៃក្ដោបក្នុងផ្ទះសំណាញ់របស់កសិករនៅប៉ៃលិន រូបភាពពីលោក វេង សាខុន
កសិករទទួលបានការសម្របសម្រួលរកទីផ្សារ ដោយមានការចុះកិច្ចសន្យាជាមួយក្រុមហ៊ុន កសិ -សុវត្ថិភាព (Argo-Nature) តាមរយៈកម្មវិធី (អាស្ប៉ាយ) នៃមន្ទីរកសិកម្មខេត្ត បានប្រមូលផល និងផ្គត់ផ្គង់ស្ពៃក្តោបបានចំនួនជាង ១០០ គីឡូក្រាមក្នុងមួយថ្ងៃ ក្នុងតម្លៃថេរ ៣ ៥០០ រៀលក្នុងមួយគីឡូក្រាម។ តាមរយៈការប៉ាន់ប្រមាណនៃបរិមាណផលការដាំស្ពៃក្តោបក្នុងផ្ទះសំណាញ់ដែលប្រមូលបានមួយលើកៗ បានចំនួន ៧០០ គីឡូក្រាម គិតជាទឹកប្រាក់ជាង ២លានរៀល។ ក្នុងករណីមិនមានការរំខានពីទឹកភ្លៀងទិន្នផលស្ពៃក្ដោបអាចមានទទួលផលលើសពីនេះ។ នេះជាការលើកឡើងរបស់សមាជិកកសិករក្នុងគម្រោងអាស្ប៉ាយ។
កសិករដែលមានផ្ទះសំណាញ់ បានចូលរួមជាមួយកម្មវិធីអាស្ប៉ាយ មានក្ដីរំភើបនិងរីករាយដែលមានការយកចិត្តទុកដាក់ពីក្រសួងក្នុងការសម្រួលដល់ទីផ្សារកសិផលរបស់ពួកគាត់ ពិសេសជួយឲ្យកសិករមានបច្ចេកទេសនិងរបៀបថ្មីនៃការដាំដុះបន្លែមានសុវត្ថិភាព និងសមស្របជាមួយតម្រូវការទីផ្សារផងដែរ៕
Tag:
កសិកម្ម
ស្ពៃក្ដោប
ប៉ៃលិន
ផ្ទះសំណាញ់
© រក្សាសិទ្ធិដោយ thmeythmey.com