សម្ដេច ហ៊ុន សែន ផ្ដល់ម៉ាស់២លាន និងសម្ភារវេជ្ជសាស្ត្រ១១មុខទៀត ដល់មីយ៉ាន់ម៉ា

ជាតិ

សម្ដេច ហ៊ុន សែន ផ្ដល់ម៉ាស់២លាន និងសម្ភារវេជ្ជសាស្ត្រ១១មុខទៀត ដល់មីយ៉ាន់ម៉ា

24, Nov 2020 , 12:29 pm

រូបភាព

លោកស្រី អ៊ុងសាន ស៊ូជី ទីប្រឹក្សារដ្ឋ និងជារដ្ឋមន្ត្រីក្រសួងការបរទេសមីយ៉ាន់ម៉ា ជួបជាមួយសម្ដេចនាយករដ្ឋមន្រ្តី ហ៊ុន សែន ក្នុងដំណើរទស្សនកិច្ចនៅកម្ពុជា កាលពីថ្ងៃទី២៩ មេសា ២០១៩

ដោយ: ធឿន បញ្ញាឬទិ្ធ

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ផ្តល់ម៉ាស២លាន និងសម្ភារវេជ្ជសាស្ត្រ ១១ទៀត ដល់រដ្ឋាភិបាលមីយ៉ាន់ម៉ា។ នេះបើតាមលិខិតសម្តេច ហ៊ុន សែន ដែលបានផ្ញើជូនលោកស្រី អ៊ុង សានស៊ូជី នៅថ្ងៃទី២៤ វិច្ឆិកា។

សម្ដេច ហ៊ុន សែន បានចាត់តាំងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល នាំយកអំណោយទាំងនេះ ទៅកាន់រដ្ឋធានីណៃពិដោរ នៅថ្ងៃទី២៦ ខែវិច្ឆិកា ឆ្នាំ២០២០ តាមយន្តហោះពិសេស។ «ក្នុងស្មារតីមិត្តភាព និងសាមគ្គីភាពដ៏យូរអង្វែង ក៏ដូចជាការរួមដៃគ្នាជាមួយ លោកជំទាវ (អ៊ុង សានស៊ូជី) ក្នុងកិច្ចខិតខំប្រឹងប្រែងបង្ការការរីករាលដាលជំងឺកូវីដ១៩ តាងនាមរាជរដ្ឋាភិបាលនៃព្រះរាជាណាចក្រកម្ពុជា ខ្ញុំសូមធ្វើការបរិច្ចាគនូវម៉ាសចំនួន ២ ០០០ ០០០ (ពីរលាន) និងសម្ភារវេជ្ជសាស្ត្រមួយចំនួនទៀត ដូចមានក្នុងបញ្ជីរាយនាម ជូនដល់រដ្ឋាភិបាល និងប្រជាជនមីយ៉ាន់ម៉ា»។ នេះជាការបញ្ជាក់របស់សម្ដេច ហ៊ុន សែន។

សម្ភារវេជ្ជសាស្ត្រ ដែលសម្ដេច ហ៊ុន សែន ផ្ដល់ជូនមីយ៉ាន់ម៉ានោះរួមមាន ម៉ាស ចំនួន២លាន, ម៉ាសក្រណាត់ចំនួន ១០ម៉ឺន, ម៉ាស N95 ចំនួន២ម៉ឺន, វែនតាសុវត្ថិភាព ចំនួន២ម៉ឺន, សំលៀកបំពាក់សុវត្ថិភាព សម្រាប់មន្ត្រីសុខាភិបាល (ជាឈុត) ចំនួន២ម៉ឺនឈុត, ម៉ាស៊ីនវាស់កំដៅ ចំនួន៥០០, របាំងមុខចំនួន២ម៉ឺន, ឧបករណ៍ជំនួយការដកដង្ហើម សម្រាប់ប្រយោធនកម្ម ចំនួន២០, ម៉ាស៊ីនតាមដានសញ្ញាជីវិត ចំនួន២០,ម្ស៉ៅថ្នាំបាញ់សម្លាប់មេរោគ២៥គីឡូក្រាមក្នុង១ធុង ចំនួ៥០០, ស្បែកជើង កវែងចំនួន១០០០ និងទឹកសាប៊ូលាងដៃ ចំនួន២០០០។

អមជាមួយការបរិច្ចាគសម្ភារទាំងនេះ សម្ដេច ហ៊ុន សែន បានលើកឡើងដូច្នេះថា៖«ជាមួយនឹងកិច្ចខិតខំប្រឹងប្រែងរួមនេះ ខ្ញុំមានជំនឿយ៉ាងមុតមាំថា យើងនឹងទទួលបាននូវជោគជ័យ ក្នុងការប្រយុទ្ធប្រឆាំងជំងឺកូវីដ១៩ ហើយយើងនឹងងើបឡើងវិញយ៉ាងរឹងមាំជាមួយគ្នា»។

មិនតែប៉ុណ្ណោះសម្ដេច ហ៊ុន សែន ក៏បានចាត់ទុកជ័យជម្នះយ៉ាងភ្លូកទឹកភ្លូកដីរបស់គណបក្សសម្ព័ន្ធជាតិ ដើម្បីលទ្ធិប្រជាធិបតេយ្យរបស់លោកស្រី ស៊ូជី នេះ ជាការឆ្លុះបញ្ចាំងពីភាពជាមេដឹកនាំ ដែលពោរពេញដោយសមត្ថភាព ក្នុងជ្រោងមីយ៉ាន់ម៉ាទៅកាន់ភាពរីកចម្រើន ក្នុងកិច្ចការផ្សះផ្សារ និងកសាងជាតិ។ «ខ្ញុំសូមអះអាងជាថ្មីនូវការប្ដេជ្ញាចិត្តធ្វើការយ៉ាងជិតស្និទជាមួយលោកជំទាវ ក្នុងក្របខណ្ឌទ្វេភាគី និងតំបន់ ដើម្បីនាំមកនូវប្រយោជន៍ជាក់ស្ដែងកាន់តែច្រើនថែមទៀត សម្រាប់ប្រទេសយើងទាំងពីរ និងវិបុលភាពធំធេងសម្រាប់សហគមន៍អាស៊ាន»។ នេះជាការលើកឡើងរបស់នាយករដ្ឋមន្ត្រីកម្ពុជា។

កាលពីថ្ងៃទី១៦ វិច្ឆិកា សម្តេចនាយករដ្ឋមន្ត្រី ហ៊ុន សែន ក៏បានផ្ដល់អំណោយជូនដល់ឡាវ នូវម៉ាសចំនួន២.១លានម៉ាស និងបរិក្ខារពេទ្យ១២មុខទៀត ដើម្បីប្រយុទ្ធប្រឆាំងទប់ស្កាត់ការរីករាលដាលជំងឺកូវីដ-១៩។

បច្ចុប្បន្ន កម្ពុជា មានអ្នកឆ្លងកូវីដ-១៩ ចំនួន៣០៦ករណី ក្នុងនោះ២៩៦បានជាសះស្បើយ ខណៈមីយ៉ាន់ម៉ា មានអ្នកជំងឺជាង៨០,៥០៥នាក់ និងជាសះស្បើយ៥៩,៨៨៨នាក់ និងស្លាប់១,៧៦៥នាក់។ ចំណែកឡាវ មានអ្នកជំងឺកូវីដ-១៩ ចំនួន៣៩នាក់ ជាសះស្បើយ២៤នាក់ ៕