សង្គមអន្តរជាតិ
អន្តរជាតិ
ថៃ ត្រៀមប៉ូលិស ៦ពាន់នាក់សម្រាប់ទប់នឹងបាតុកម្មនៅមុខការិយាល័យទ្រព្យសម្បត្តិមហាក្សត្រ
បាតុករនិស្សិត និងយុវជនថៃនៅវិមានប្រជាធិបតេយ្យ។រូបភាព៖AFP
×![]()
ថៃនឹងដាក់ពង្រាយប៉ូលិសចំនួន៦ពាន់នាក់ នៅថ្ងៃទី២៥ ខែវិច្ឆិកា ដើម្បីត្រៀមទប់នឹងបាតុកម្មរបស់និស្សិត និងយុវជនដែលទាមទារឲ្យមហាក្សត្រ មហា វជិរាលង្ករណ៍ បោះបង់ការកាន់កាប់ទ្រព្យសម្បត្តិផ្ទាល់ខ្លួនមួយចំនួន។ ចំណែកបាតុករគាំទ្ររបបរាជានិយម ក៏ត្រៀមធ្វើបាតុកម្មការពារមហាក្សត្រផងដែរ។
ប៉ូលិសថៃ អះអាងនៅថ្ងៃទី២៤ វិច្ឆិកា ថា បាតុករទាំង២ក្រុម ត្រូវរក្សាគម្លាតយ៉ាងហោចណាស់១៥០ម៉ែត្រពីការិយាល័យទ្រព្យសម្បត្តិព្រះមហាក្សត្រ។ ក្រុមបាតុករនិស្សិតដែលទាមទារកំណែទម្រង់ និងអ្នកគាំទ្ររបបរាជានិយម គ្រោងធ្វើបាតុកម្មនៅជិតគ្នា ប៉ុន្តែប៉ូលិសថៃសង្កត់ធ្ងន់ថា បាតុករទាំង២ក្រុមនឹងត្រូវដាក់ឲ្យធ្វើបាតុកម្មដោយឡែកពីគ្នា។ នេះបើយោងតាមទីភ្នាក់ងារព័ត៌មាន Reuters។
ក្រៅពីទាមទារឲ្យលោកនាយករដ្ឋមន្ត្រី ប្រាយុទ្ធ ចន្ទអូចា ចុះចេញពីតំណែង មានរដ្ឋធម្មនុញ្ញថ្មី ក៏ដូចជាកាត់បន្ថយអំណាចមហាក្សត្រ បាតុករវ័យក្មេង ក៏ទាមទារឲ្យមហាក្សត្រឈប់កាន់កាប់ទ្រព្យសម្បត្តិផ្ទាល់ខ្លួនរបស់ព្រះអង្គដែលមានតម្លៃរាប់សិបពាន់លានដុល្លារដែរ។
ក្រុមបាតុករដែលមានឈ្មោះ Free Youth បង្ហោះសំណេរក្នុងបណ្តាញសង្គម Twitter ថា ពួកគេធ្វើបាតុកម្មនៅថ្ងៃទី២៥ វិច្ឆិកាដើម្បីទាមទារមកវិញទ្រព្យសម្បត្តិដែលជាកម្មសិទ្ធិរបស់ប្រជាជន។ ការប៉ាន់ស្មានរបស់ Reuters បង្ហាញថា មហាក្សត្រ មហា វជិរាលង្ករណ៍ កាន់កាប់ទ្រព្យសម្បត្តិដែលមានតម្លៃពី៣០ ទៅ៤០ពាន់លានដុល្លារ។ មិនតែប៉ុណ្ណោះ រដ្ឋាភិបាលថៃ ក៏ចំណាយប្រាក់១ពាន់លានដុល្លារសម្រាប់រាល់ចំណាយរបស់ព្រះអង្គ។
ក្រុមបាតុករដែលការពារមហាក្សត្រវិញ បានចេញសេចក្តីថ្លែងការណ៍មួយ ថា នឹងធ្វើបាតុកម្មសងសឹកនៅថ្ងៃទី២៥ និង២៦វិច្ឆិកា ដើម្បីរំខានក្រុមបាតុករប្រឆាំងរដ្ឋាភិបាល។ ក្រុមបាតុករការពារព្រះមហាក្សត្រសង្កត់ធ្ងន់ថា ពួកគេនឹងមិនអត់អោនដល់បាតុករប្រឆាំងរដ្ឋាភិបាលរូបណាដែលប្រមាថព្រះមហាក្សត្រឡើយ។
ទាក់ទងនឹងបាតុកម្មនេះ លោក ប្រាយុទ្ធ ធ្លាប់អះអាងថា នឹងប្រើគ្រប់ច្បាប់ និងមាត្រាដើម្បីតបតទៅនឹងបាតុករដែលបំពានច្បាប់។ យ៉ាងណាក្តីលោក ប្រាយុទ្ធ ធានាថា លោកនឹងបង្ការការប៉ះទង្គិចគ្នារវាងក្រុមបាតុករ និងអនុវត្តច្បាប់ដូចៗគ្នាទៅលើបាតុករទាំង២ក្រុម។ លោកក៏ធានាថា រដ្ឋាភិបាលនឹងមិនប្រើច្បាប់អាជ្ញាសឹក ដើម្បីទប់ស្កាត់បាតុកម្មនេះ ឬបាតុកម្មនាពេលខាងមុខឡើយ។ បន្ថែមពីនេះ លោកអះអាងជាថ្មីថា នឹងមិនមានរដ្ឋប្រហារយោធាអ្វីឡើយ។
ក្នុងបាតុកម្មកាលពីសប្តាហ៍មុន បាតុករចំនួន៥៥នាក់រងរបួស និងមួយចំនួនទៀតត្រូវបញ្ជូនទៅមន្ទីរពេទ្យក្រោយរងការប៉ះទង្គិចជាមួយប៉ូលិសគ្រាដែលយុវជន និងនិស្សិតផ្តុំគ្នាធ្វើបាតុកម្មក្រោយសភាថៃ បដិសេធសេចក្តីព្រាងវិសោធនកម្មរដ្ឋធម្មនុញ្ញដែលស្នើដោយសង្គមស៊ីវិល។ ប៉ូលិសថៃ អះអាងថា ខ្លួនបានស៊ើបអង្កេតចំនួន១០៧សំណុំរឿងដែលជាប់ពាក់ព័ន្ធនឹងបាតុកម្ម និងបញ្ជូន២៤សំណុំរឿងទៅអយ្យការ ចំណែកសំណុំរឿងដែលនៅសេសសល់នឹងត្រូវធ្វើការស៊ើបអង្កេតបន្ត៕
Tag:
ថៃ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
