អង្គការ WWF៖ រយៈពេល១១ខែ មានសត្វផ្សោតចំនួន ៧ក្បាលបានស្លាប់

ជាតិ

អង្គការ WWF៖ រយៈពេល១១ខែ មានសត្វផ្សោតចំនួន ៧ក្បាលបានស្លាប់

25, Nov 2020 , 8:59 am

រូបភាព

ដោយ:

រយៈពេល ១១ខែ ក្នុងឆ្នាំ២០២០នេះ មានសត្វផ្សោតសរុបចំនួន ៧ ក្បាលបានស្លាប់ ក្នុងនោះមានកូនផ្សោតចំនួន ៥ក្បាល និងផ្សោតពេញវ័យចំនួន ២ក្បាល។ នេះបើតាមរបាយការណ៍របស់អង្គការ WWF ប្រចាំកម្ពុជា ដែលសារព័ត៌មានThmeyThmey25 ទទួលបាននៅថ្ងៃទី ២៣ ខែវិច្ឆិកា ឆ្នាំ២០២០។

លោក ទេព អស្នារិទ្ធ ប្រធានកិច្ចការសាធារណៈ និងគ្រប់គ្រងព័ត៌មាន នៃអង្គការ WWF ប្រចាំកម្ពុជា បានប្រាប់សារព័ត៌មានThmeyThmey25 ថា ទីជម្រកធម្មជាតិរបស់សត្វផ្សោតស្ថិតនៅតាមបណ្តោយដងទន្លេមេគង្គ ក្នុងខេត្តក្រចេះ និងស្ទឹងត្រែង និងល្បាក់ខោនត្រង់ចំណុចព្រំប្រទល់កម្ពុជា-ឡាវ ដែលមានចម្ងាយសរុប ១៨០ គីឡូម៉ែត្រ។ «សាកសពផ្សោតត្រូវបានគេប្រទះឃើញភាគច្រើននៅក្នុងតំបន់ទីជម្រករបស់វានៅក្នុងខេត្តក្រចេះ ហើយកូនផ្សោតដែលគេប្រទះស្លាប់នៅក្នុងខេត្តត្បូងឃ្មុំ កាលពីថ្ងៃទី១៤ វិច្ឆិកា កន្លងមកជាកូនផ្សោតទីមួយដែលស្លាប់ក្រៅដែនជម្រករបស់វា»។ នេះជាការបញ្ជាក់របស់លោក ទេព អស្នារិទ្ធ។

កូនផ្សោតអាយុ ៧ថ្ងៃដែលស្លាប់នៅក្នុងខេត្តក្រចេះកាលពីថ្ងៃទី ១៤ វិច្ឆិកា (រូបភាព៖ WWF)

ការជាប់នឹងមងនេសាទ និងការនេសាទដោយប្រើឧបករណ៍ច្បាប់ហាមឃាត់សុទ្ធសឹងជា មូលហេតុចំបងៗដែលបណ្តាលឲ្យសត្វផ្សោតពេញវ័យស្លាប់។ ដោយឡែក មូលហេតុនៃការសា្លប់ របស់កូនសត្វផ្សោត នៅមិនទាន់ត្រូវបានអ្នកវិទ្យាសាស្ត្រអាចកំណត់ឲ្យបានច្បាស់លាស់នៅឡើយ ដែលជាកត្តាធ្វើឲ្យអ្នកវិទ្យាសាស្ត្រ មានការព្រួយបារម្ភយ៉ាងខ្លាំងសម្រាប់ការរស់រាន របស់សត្វផ្សោតទៅថ្ងៃអនាគត។

ការចុះថយនៃចំនួនសត្វផ្សោត ជាការព្រួយបារម្ភជាសាកលដែលទាមទារឲ្យអនុវត្តជាបន្ទាន់នូវវិធានការរួមគ្នា ដើម្បីការពារសត្វផ្សោតទន្លេមេគង្គឲ្យរួចផុតពីការបាត់បង់ ស្របពេលដែលលទ្ធផលនៃការធ្វើជំរឿនចុងក្រោយបង្អស់ បានបង្ហាញថា មានសត្វផ្សោតតែចំនួន ៨៩ ក្បាលប៉ុណ្ណោះ ដែលកំពុងរស់នៅក្នុងទន្លេមេគង្គនៃកម្ពុជា៕