ជាតិ
×![]()
ដោយ: ឡាយ សុភាវតី
ភ្នំពេញ៖ តុលាការកំពូលសម្រេចបន្តឃុំខ្លួនលោក រ៉ុង ឈុន ក្នុងពន្ធនាគារ ដោយមិនយល់ព្រមតាមសំណើសុំឲ្យនៅក្រៅឃុំឡើយ។ 
លោក អែម ប៊ុនណារិទ្ធ សហការីរបស់ លោក រ៉ុង ឈុន បានថ្លែងប្រាប់សារព័ត៌មានថ្មីៗថា ការប្រកាសសាលក្រមនៅថ្ងៃទី២៥ វិច្ឆិកានេះ គឺពាក់ព័ន្ធបណ្ដឹងជំទាស់ការឃាត់ខ្លួនលោក រ៉ុង ឈុន ទាំងយប់ និងការស្នើសុំនៅក្រៅឃុំ។ «តុលាការកំពូលសម្រេចប្រកាសតម្កល់ការសម្រេចរបស់សាលាឧទ្ធរណ៍ទុកជាបានការ មានន័យថាគេនៅតែរក្សានៅដដែល គឺបន្តឃុំខ្លួនលោក រ៉ុន ឈុន ដដែល»។ នេះបើតាមលើកឡើងរបស់លោក ប៊ុនណារិទ្ធ ដោយបញ្ជាក់បន្ថែមថា លោកបានដំណឹងពីមេធាវីថា នៅថ្ងៃទី២ខែធ្នូ តុលាការនឹងបើកជំនុំជម្រះ លើករណីបទចោទញុះញង់។
សូមជម្រាបថា លោក រ៉ុង ឈុន ត្រូវបានសមត្ថកិច្ចឃាត់ខ្លួនកាលពីយប់ថ្ងៃទី៣១កក្កដា ឆ្នាំ២០២០ ក្រោយបានចេញសេចក្តីថ្លែងការណ៍មួយពាក់ព័ន្ធបញ្ហាព្រំដែន នៅខេត្តត្បូងឃ្មុំ ។ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១សីហា ក៏បានចេញដីកាឃុំខ្លួនលោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជា ដាក់ពន្ធនាគារបណ្តោះអាសន្ន ។
លោក រ៉ុង ឈុន ជាប់ចោទពីបទ «ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៥ នៃក្រមព្រហ្មទណ្ឌ ដែលកំណត់ការផ្តន្ទាទោសដាក់ពន្ធនាគារពី៦ខែទៅ២ឆ្នាំនិងពិន័យជាប្រាក់ពី១លានរៀលទៅ៤លានរៀល»៕
Tag:
រ៉ុង ឈុន
© រក្សាសិទ្ធិដោយ thmeythmey.com
