COVID-19
អន្តរជាតិ
ករណីឆ្លងកូវីដ-១៩ ប្រចាំថ្ងៃនៅកូរ៉េខាងត្បូងហក់ឡើងខ្ពស់បំផុត ក្នុងរយៈពេល ៨ខែចុងក្រោយ មន្រ្តីសុខាភិបាលកូរ៉េខាងត្បូង បាញ់ថ្នាំសម្លាប់មេរោគនៅទីសាធារណៈ នៅក្នុងខែឧសភា ឆ្នាំ២០២០។ រូបភាព៖ Reuters
× ករណីឆ្លងកូវីដ-១៩ ប្រចាំថ្ងៃនៅកូរ៉េខាងត្បូង បានហក់ឡើងដល់កម្រិតខ្ពស់បំផុត ក្នុងរយៈពេល ៨ ខែចុងក្រោយ។ នេះបើតាមការអះអាងរបស់អាជ្ញាធរកូរ៉េខាងត្បូង នៅថ្ងៃទី២៦ ខែវិច្ឆិកា។
ទីភ្នាក់ងារទប់ស្កាត់ និងគ្រប់គ្រងជំងឺឆ្លងកូរ៉េខាងត្បូង បានរាយការណ៍ថា ករណីឆ្លងកូវីដ-១៩ប្រចាំថ្ងៃនៅកូរ៉េខាងត្បូង បានហក់ឡើងដល់ ៥៨៣ ករណី ដោយក្នុងនោះករណីឆ្លងក្នុងស្រុកមានចំនួន ៥៥៣ ករណី។ តួលេខនេះ គឺជាចំនួនខ្ពស់បំផុត បើគិតចាប់តាំងពីខែមីនាកន្លងមក។ ករណីឆ្លងកូវីដ-១៩ សរុបរបស់កូរ៉េខាងត្បូង មានចំនួន ៣២៣១៨ករណី ខណៈអ្នកស្លាប់មានចំនួន ៥១៥នាក់។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ទាក់ទិននឹងករណីឆ្លងកើនឡើងបែបនេះ រដ្ឋមន្ត្រីសុខាភិបាលកូរ៉េខាងត្បូង លោក Park Neunghoo បានបញ្ជាក់ថា យ៉ាងដូច្នេះថា៖ « ពេលនេះ យើងស្ថិតក្នុងស្ថានភាព ដែលករណីផ្ទុះកូរ៉ូណាវីរុស អាចកើតឡើងនៅគ្រប់ទីកន្លែងយើងរស់នៅ»។ បើតាមលោករដ្ឋមន្ត្រី ដោយសារតែរលកឆ្លងកូវីដ-១៩ លើកទី៣ នៅកូរ៉េខាងត្បូង មានទំហំធំ ប្រជាជនទាំងអស់ ត្រូវតែគោរពតាមរយៈវិធានការរក្សាគម្លាតសុវត្ថិភាព។
ទីក្រុង និងខេត្ត ចំនួន១៧ ត្រូវបានរាយការណ៍ថា មានការកើនឡើងនៃករណីឆ្លង។ នៅក្នុងទីក្រុងសេអ៊ូល មានករណីឆ្លងកូវីដ-១៩ ចំនួន ២០៨ករណី ដែលជាតួលេខឆ្លងខ្ពស់បំផុតប្រចាំថ្ងៃ ស្របពេលក្រុងកំពង់ផែ Incheon មានចំនួន ១៧៧ករណី។ ដោយឡែក ខេត្ត South Gyeongsang មានចំនួន ៤៥ករណី និងក្រុងប៊ូសាន មានករណីឆ្លងចំនួន ១៩ករណីផងដែរ។
ជុំវិញករណីឆ្លងហក់ឡើងបែបនេះ ក្រសួងការពារជាតិកូរ៉េខាងត្បូង នៅក្នុងថ្ងៃទី២៦ ខែវិច្ឆិកា បានសម្រេច មិនអនុញ្ញាតឲ្យកងទ័ពកូរ៉េខាងត្បូង ឈប់សម្រាកលំហែកាយឡើយ បន្ទាប់ពីមានករណីឆ្លងកូវីដ-១៩ នៅក្នុងបន្ទាយទាហានមួយកន្លែង នៅក្រុងជាប់ព្រំដែនកូរ៉េខាងជើង Yeoncheon។ ទាហានចំនួន ៦៦នាក់ និងមន្ត្រី ៤នាក់ ត្រូវតេស្តរកឃើញថា វិជ្ជមានកូរ៉ូណាវីរុស។
មិនតែប៉ុណ្ណោះ នៅក្នុងបន្ទាយទ័ព ទាហានទាំងអស់ ត្រូវរក្សាគម្លាតសុវត្ថិភាព រហូតដល់ថ្ងៃទី៧ ខែធ្នូ ខាងមុខ។ វិធានការនេះ ដាក់ចេញឲ្យអនុវត្តចាប់ពីថ្ងៃទី២៧ ខែវិច្ឆិកា តទៅ។ ក្រៅពីនេះ ការជួបជុំជាឯកជនរបស់មន្ត្រី ឬទាហាន មិនអនុញ្ញាតឲ្យមានជាដាច់ខាត។ រាល់អ្នកល្មើសនឹងបទបញ្ជា នឹងទទួលការស្តីបន្ទោសយ៉ាងធ្ងន់ធ្ងរ៕
Tag:
កូរ៉េខាងត្បូង
កូវីដ-១៩
© រក្សាសិទ្ធិដោយ thmeythmey.com