ពីនេះ ពីនោះ
សុខភាព
ដឹងទេ? ពេលព្រឹកមិនបាច់ញ៊ាំស៊ុត ក៏អាហារទាំងនេះផ្ដល់ប្រូតេអ៊ីនខ្ពស់ដល់រាងកាយដែរ
× ភាគច្រើននៃពួកយើងសុទ្ធតែដឹងថាស៊ុតជាអាហារពេលព្រឹកដែលមានផ្ទុកសម្បូរទៅដោយប្រូតេអ៊ីន។ប៉ុន្តែតើអ្នកធ្លាប់ដឹងទេថាអាហារពេលព្រឹកមួយចំនួនផ្សេងទៀតក៏ជាប្រភពដ៏ប្រសើរនៃប្រូតេអ៊ីនដែរ? ថាតើអាហារអ្វីខ្លះដែលអ្នកគួរទទួលទាន ឬរួមបញ្ចូលក្នុងអាហារពេលព្រឹកដើម្បីទទួលបានប្រូតេអ៊ីនគុណភាពខ្ពស់? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារពេលព្រឹកដែលសម្បូរប្រូតេអ៊ីន ក្រៅពីស៊ុត ៖
១. យ៉ាអួរ Greek
គួបផ្សំជាមួយផ្លែឈើស្រស់ៗនោះអ្នកនឹងទទួលបានអាហារពេលព្រឹកដែលមានផ្ទុកប្រូតេអ៊ីនគុណភាពខ្ពស់ល្អបំផុតមួយ។ យ៉ាអួរ Greek មានផ្ទុកសម្បូរទៅដោយប្រូតេអ៊ីននិងជាប្រភេទនៃអាហារសុខភាពល្អជាងគេក្នុងចំណោមយ៉ាអួរប្រភេទផ្សេងទៀត។
២. សាច់គ្មានខ្លាញ់
ជាប្រភពដ៏ល្អបំផុតមួយនៃជាតិប្រូតេអ៊ីន។ អ្នកអាចទទួលបានប្រូតេអ៊ីនដល់ទៅ ៧ ក្រាមក្នុង ២៣ ក្រាមនៃសាច់គ្មានខ្លាញ់។
៣. ទឹកដោះគោ
មួយពែងនៃទឹកដោះគោស្រស់មានផ្ទុកប្រូតេអ៊ីនដល់ទៅ ៨ ក្រាមឯណោះ។ វាក៏ជាប្រភពដ៏ប្រសើរនៃជាតិកាល់ស្យូមផងដែរ។
៤. ទឹកសណ្ដែក
អ្នកក៏គួរទទួលទានទឹកសណ្ដែកជាអាហារពេលព្រឹកផងដែរដោយវាមានផ្ទុកប្រូតេអ៊ីន ៨ ក្រាមក្នុងមួយពែងដូចនឹងទឹកដោះគោ។
៥. បឺរសណ្ដែកដី
ការទទួលទានក្នុងកម្រិតមធ្យម ២ ស្លាបព្រាបាយអាចផ្ដល់ឱ្យរាងកាយនូវជាតិប្រូតេអ៊ីនដល់ទៅ ៨ ក្រាម។ ក្រៅពីប្រូតេអ៊ីន បឺរសណ្ដែកដីក៏មានផ្ទុកអាស៊ីតខ្លាញ់អូមេហ្កា ៣ ផងដែរ។
៦. គ្រាប់ធញ្ញជាតិ
អ្នកក៏គួររួមបញ្ចូលគ្រាប់ធញ្ញជាតិក្នុងអាហារពេលព្រឹកផងដែរ។ ប្រមាណ ២៣ ក្រាមនៃគ្រាប់ធញ្ញជាតិមានផ្ទុកប្រូតេអ៊ីនពី ៤ ទៅ ៦ ក្រាមឯណោះ៕
© រក្សាសិទ្ធិដោយ thmeythmey.com