ជាតិ
សង្គមជាតិ
សាកលវិទ្យាល័យមួយនៅភ្នំពេញ នឹងអនុវត្តគោលការណ៍កាត់បន្ថយបា្លស្ទិកដើម្បីការពារបរិស្ថាន
រូបភាពពីUNDP Cambodia
×![]()
ភ្នំពេញ៖ សាកលវិទ្យាល័យជាតិគ្រប់គ្រង(NUM) នឹងអនុវត្តគោលការណ៍កាត់បន្ថយប្លាស្ទិកនៅក្នុងសាលា ចាប់ពីខែមករា ឆ្នាំ២០២១។ គោលការណ៍កាត់បន្ថយប្លាស្ទិកនេះ គឺអនុវត្តឡើងដើម្បីឲ្យនិស្សិត និងសាស្ត្រាចារ្យ ចូលរួមការពារ និងស្រឡាញ់បរិស្ថាន។ 
លោក ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រង បានបញ្ជាក់ប្រាប់អ្នកសារព័ត៌មានថ្មីៗថា គម្រោង«បរិស្ថានដែលគ្មានប្លាស្ទិក» នៅក្នុងសាលានេះ មានការគាំទ្រពីអង្គការសហប្រជាជាតិប្រចាំកម្ពុជា(UNDP Cambodia)។
បើតាមលោក ហោ ប៉េង គម្រោងកាត់បន្ថយប្លាស្ទិកនៅក្នុងសាលានេះ នឹងបណ្តុះស្មារតីរបស់និស្សិត សាស្ត្រាចារ្យ និងបុគ្គលិកសាលាឲ្យស្រឡាញ់ និងគិតគូរការពារបរិស្ថាន។ «ពិតណាស់ យើងមានគោលដៅអប់រំយុវជនយើងឲ្យមានការចូលរួមនិងទទួលខុសត្រូវចំពោះបរិដ្ឋានស្អាតជានិច្ច ស្រឡាញ់រុក្ខជាតិ ។ ប្រសិនជាសាកលវិទ្យាល័យរបស់គាត់ស្អាត ពួកគាត់មានមោទនភាព គាត់ស្រឡាញ់សាលា និងមានប្រលឹងជាមួយសាលា»។ នេះជាការលើកឡើងរបស់លោក ហោ ប៉េង។
ដើម្បីអាចឲ្យនិស្សិតទាំងអស់ អនុវត្តតាមគោលការណ៍កាត់បន្ថយប្លាស្ទិក នៅក្នុងសាលាមានប្រសិទ្ធភាព លោក ហោ ប៉េង បានបញ្ជាក់ថា សាលានឹងចាត់ចែងឲ្យមានក្រុមនិស្សិតស្ម័គ្រចិត្ត ដើម្បីចុះណែនាំដល់និស្សិត ឲ្យយល់ដឹងពីបញ្ហាសំរាមប្លាស្ទិក និងការកាត់បន្ថយប្រើប្រាស់ប្លាស្ទិក។ លើសពីនេះ សាកលវិទ្យាល័យនឹងបំពាក់ម៉ាស៊ីនទឹកក្តៅ និងត្រ ជាក់ សម្រាប់ដាក់នៅទីតាំងក្នុងសាលាដើម្បីឲ្យនិស្សិត គ្រូ និងបុគ្គលិកសាលាពិសារដោយឥតគិតថ្លៃ និងចែកជូនដបទឹកសម្រាប់ឲ្យនិស្សិត និងសាស្ត្រាចារ្យដែលនៅជាន់ទី១ នៃអគារសិក្សា F ។
សកលវិទ្យាធិការសាកលវិទ្យាល័យជាតិគ្រប់គ្រង បាននិយាយថា និស្សិត និងសាស្ត្រាចារ្យណាដែលមិនបានអនុវត្តតាមគោលការណ៍នោះត្រឹមត្រូវទេ សាលាក៏មិនផាកវិន័យអ្វីនោះដែរ។ លោកបញ្ជាក់ថាសាលាគឺគ្រាន់តែណែនាំពួកគេប៉ុណ្ណោះ។ «យើងមិនមានវិធានការដាក់ពិន័យអីទេ។ យើងគ្រាន់តែសូមឲ្យសាស្ត្រារ្យជួយបន្តនែនាំក្នងថ្នាក់រៀនឲ្យបានជាប់លាប់និងគ្រូត្រូវជាគម្រូមុនគេ»។ នេះជាការលើកឡើងរបស់លោក ហោ ប៉េង។
បើតាមលោក ហោ ប៉េង ប្រសិននិស្សិតគ្រប់រូប គោរពទៅតាមគោលការណ៍កាត់បន្ថយបា្លស្ទិកនេះបានល្អប្រសើរ លោក ហោ ប៉េង ក៏ចង់ជំរុញឲ្យសកលវិទ្យាល័យដទៃទៀតអនុវត្តតាមផងដែរ។
គោលការណ៍កាត់បន្ថយការប្រើប្រាស់ប្លាស្ទិក ក៏កំពុងអនុវត្តឡើងនៅតាមសាលារៀនមួយចំនួនផងដែរ។ សាលារៀនទាំងនោះមានដូចជា វិទ្យាល័យកំពង់ក្តី ក្នុងខេត្តសៀមរាប វិទ្យាល័យក្បាលទឹក ភូមិក្រសាំងដុះឡើង ឃុំក្បាលទឹក ស្រុកទឹកផុស ខេត្តកំពង់ឆ្នាំង និងវិទ្យាល័យឫស្សីកែវ ក្នុងរាជធានីភ្នំពេញ។
ក្នុងមួយឆ្នាំ កម្ពុជាបានបង្កើតសំរាមប្រមាណជិត៤លានតោន ដោយសំណល់សរីរាង្គមាន៦៥ភាគរយ សំណល់ថង់ប្លាស្ទិក មាន២០ភាគរយ និងនៅសេសសល់ជាសំណល់រឹង រួមទាំងសំណល់ផ្សេងៗ។ ក្នុងចំណោមសំណល់ទាំងនោះ មានសំរាមត្រឹម៥១ភាគរយប៉ុណ្ណោះ ដែលចាក់ចោលនៅទីលានចាក់សំរាម ហើយចំណែកឯ សំរាម៤៩ភាគរយទៀត ត្រូវបានបោះបង់ចោលនៅតាមទីសាធារណៈនានា និងតាមប្រភពទឹក។ នេះបើតាមការបញ្ជាក់ពីលោក នេត្រ ភក្ត្រា អ្នកនាំពាក្យក្រសួងបរិស្ថាន៕
Tag:
បា្លស្ទិក
អប់រំ
សាលារៀន
© រក្សាសិទ្ធិដោយ thmeythmey.com
