តំណាងរាស្ត្រខ្មែរម្នាក់ ដែលជាពីជំងឺកូវីដ-១៩ បានលាប់ឡើងវិញ

COVID-19

ជាតិ

តំណាងរាស្ត្រខ្មែរម្នាក់ ដែលជាពីជំងឺកូវីដ-១៩ បានលាប់ឡើងវិញ

30, Nov 2020 , 5:59 pm

រូបភាព

ដោយ: សារព័ត៌មានថ្មីៗ

សម្តេចនាយករដ្ឋមន្ត្រី ហ៊ុន សែន អះអាងថា តំណាងរាស្ត្រខ្មែរម្នាក់ បានរើជំងឺកូវីដ-១៩ឡើងវិញ ក្រោយបានជាសះស្បើយរយៈពេលខ្លីកន្លងមក។ ការអះអាងរបស់សម្តេច ធ្វើឡើងក្នុងពិធីបើកការដ្ឋានសាងសង់និងកែលម្អផ្លូវ៣៨ខ្សែនៅក្រុងសៀមរាប នាព្រឹកថ្ងៃទី៣០ ខែវិច្ឆិកា ឆ្នាំ២០២០។

ប្រមុខរដ្ឋាភិបាល បញ្ជាក់ថា៖«សូម្បីតែតំណាងរាស្ត្ររបស់យើងម្នាក់ ជាប់ [ពាក់ព័ន្ធ] នឹងព្រឹត្តិការណ៍៣វិច្ឆិកា ដែលព្យាបាលជានៅមន្ទីរពេទ្យ ឥឡូវហ្នឹង បានចាប់ផ្តើមរើឡើងវិញ ត្រូវយកគាត់ ទៅមន្ទីរពេទ្យឡើងវិញ»។

ព្រឹត្តិការណ៍៣វិច្ឆិកា សំដៅដល់ដំណើរទស្សនកិច្ចរបស់លោក Péter Szijjártó រដ្ឋមន្ត្រីការបរទេសហុងគ្រី និងគណៈប្រតិភូរបស់លោក នៅកម្ពុជា កាលពីថ្ងៃទី៣ ខែវិច្ឆិកា ឆ្នាំ២០២០ ហើយបន្ទាប់មក លោក ក៏ត្រូវបានរកឃើញថា មានជំងឺកូវីដ-១៩ នៅថ្ងៃទី១៤ ខែវិច្ឆិកា ពេលទៅដល់ប្រទេសថៃ។

តំណាងរាស្ត្រខ្មែររូបនេះ ជាបុគ្គលម្នាក់ ក្នុងចំណោមមន្ត្រីនិងថ្នាក់ដឹកនាំកម្ពុជាផ្សេងទៀត ដែលបានជួបពិភាក្សាជាមួយរដ្ឋមន្ត្រីការបរទេសហុងគ្រី។

មនុស្ស៣ទៅ៤ពាន់នាក់ ដែលសង្ស័យថា ពាក់ព័ន្ធនឹងព្រឹត្តិការណ៍៣វិច្ឆិកា បានឆ្លងកាត់ការធ្វើតេស្តរកមេរោគកូវីដ-១៩។ នៅថ្ងៃទី៩ ខែវិច្ឆិកា ក្រសួងសុខាភិបាល បានប្រកាសលទ្ធផលថា រកឃើញជនជាតិខ្មែរ៣នាក់ និងឯកអគ្គរដ្ឋទូតហុងគ្រីប្រចាំកម្ពុជា មានផ្ទុកជំងឺកូវីដ-១៩ ក្នុងព្រឹត្តិការណ៍៣វិច្ឆិកានេះ។ ជនជាតិខ្មែរទាំង៣នោះ គឺ តំណាងរាស្ត្រ មន្ត្រីជាន់ខ្ពស់ក្រសួងកសិកម្ម និង អង្គរក្ស។ ក្រោយឆ្លងកាត់ការព្យាបាលមួយសប្តាហ៍ គឺនៅថ្ងៃទី១៧ ខែវិច្ឆិកា ក្រសួងសុខាភិបាល បានប្រកាសថា តំណាងរាស្ត្ររូបនោះ បានជាសះស្បើយពីជំងឺកូវីដ-១៩។

សម្តេចនាយករដ្ឋមន្ត្រី ហ៊ុន សែន ពុំបានផ្តល់ព័ត៌មានលម្អិតឡើយថា តំណាងរាស្ត្ររូបនោះ លាប់ជំងឺកូវីដ-១៩ឡើងវិញ តាំងពីពេលណា។ សារព័ត៌មានថ្មីៗ មិនអាចសុំការឆ្លើយតបពីតំណាងរាស្ត្ររូបនោះដោយផ្ទាល់ទេ ដោយសារតែទូរស័ព្ទហៅមិនចូល ហើយអ្នកនាំពាក្យក្រសួងសុខាភិបាល ក៏មិនអាចទាក់ទងបានតាមប្រព័ន្ធទូរស័ព្ទ។

២សប្តាហ៍ក្រោយ គឺរហូតដល់ថ្ងៃទី១៨ ខែវិច្ឆិកា ប្រមុខរដ្ឋាភិបាល បានប្រកាសបិទបញ្ចប់ព្រឹត្តិការណ៍៣វិច្ឆិកា ដែលមានន័យថា រដ្ឋាភិបាល អាចគ្រប់គ្រងព្រឹត្តិការណ៍នេះបាន និងមានន័យថា ព្រឹត្តិការណ៍នេះ មិនបានចម្លងជំងឺកូវីដ-១៩ ដល់អ្នកផ្សេង ក្រៅតែពីមនុស្សទាំង៤នាក់នោះទេ។ ក្រោយឆ្លងផុតព្រឹត្តិការណ៍៣វិច្ឆិកា កម្ពុជា ក៏បន្តជួបព្រឹត្តិការណ៍សហគមន៍២៨វិច្ឆិកា។

ព្រឹត្តិការណ៍សហគមន៍២៨វិច្ឆិកា សំដៅលើការរកឃើញករណីឆ្លងជំងឺកូវីដ-១៩ លើស្ត្រីម្នាក់ជាភរិយារបស់មន្ត្រីខ្ពស់នៃក្រសួងមហាផ្ទៃ កាលពីថ្ងៃទី២៨ ខែវិច្ឆិកា ឆ្នាំ២០២០ ហើយមន្ត្រីជាន់ខ្ពស់នៃក្រសួងមហាផ្ទៃជាស្វាមី និងសមាជិកមួយចំនួនក្នុងគ្រួសារពួកគេ រួមទាំងអ្នកផ្សេងទៀត ត្រូវបានរកឃើញថា ឆ្លងជំងឺកូវីដ-១៩ដែរ។ ប្រមុខរដ្ឋភិបាល ចាត់ទុកព្រឹត្តិការណ៍សហគមន៍២៨វិច្ឆិកានេះ ថាជាការឆ្លងជំងឺកូវីដ-១៩ ចូលសហគមន៍ជាលើកដំបូងនៅកម្ពុជា។

ក្រសួងសុខាភិបាល កំពុងធ្វើតេស្តលើមនុស្សជាបន្តបន្ទាប់ ដែលសង្ស័យថា ពាក់ព័ន្ធនឹងព្រឹត្តិការណ៍សហគមន៍៨វិច្ឆិកា។ ក្រសួងសុខាភិបាល រកឃើញមនុស្សជាង១០នាក់ហើយ ដែលឆ្លងជំងឺកូវីដ-១៩ ក្នុងព្រឹត្តិការណ៍២៨វិច្ឆិកានេះ៕