COVID-19
ជាតិ
តំណាងរាស្ត្រ និងមន្ត្រីរាជការជាង១០០នាក់នៅរដ្ឋសភា ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា
កិច្ចប្រជុំពេញអង្គនៃរដ្ឋសភានាពេលកន្លងមក
×![]()
ដោយ: ឡាយ សុភាវតី
ភ្នំពេញ៖ លោក ឡេង ប៉េងឡុង អគ្គលេខាធិការរដ្ឋសភា បានសរសេរលិខិត ជូនទៅរដ្ឋមន្រី្តក្រសួងសុខាភិបាល លោក ម៉ម ប៊ុនហេង ដើម្បីសុំឲ្យមានវិធានការពិនិត្យសុខភាពលើថ្នាក់ដឹកនាំរដ្ឋសភា តំណាងរាស្ត្រ និងមន្ត្រីរាជការសរុបជាង១០០នាក់ ដែលរកឃើញថាជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា។ 
ក្នុងលិខិតធ្វើឡើងនៅថ្ងៃទី៣០ ខែវិច្ឆិកា ឆ្នាំ២០២០ លោក ឡេង ប៉េងឡុង ជម្រាបលោក ម៉ម ប៊ុនហេងថា តំណាងរាស្ត្រម្នាក់ បានជួបប្រាស្រ័យផ្ទាល់ជាមួយមន្ត្រីជាន់ខ្ពស់នៃក្រសូងមហាផ្ទៃ ដែលមន្ត្រីជាន់ខ្ពស់នៃក្រសួងមហាផ្ទៃនោះ មានជំងឺកូវីដ-១៩។ លោក ឡេង ប៉េងឡុង ប្រាប់លោក ម៉ម ប៉ុនហេង ទៀតថា បន្ទាប់មក តំណាងរាស្ត្ររូបនោះ បានចូលរួមប្រជុំពេញអង្គនៃរដ្ឋសភា កាលពី២៥ ខែវិច្ឆិកា ឆ្នាំ២០២០។
លិខិត ដែលលោក ឡេង ប៉េងឡុង ផ្ញើជូនលោក ម៉ម ប៊ុនហេង បានឲ្យដឹងថា តំណាងរាស្ត្រនិងមន្ត្រីរាជការ មានជាង១០០នាក់ ដែលស្ថិតក្នុងអង្គប្រជុំនៃរដ្ឋសភាក្នុងថ្ងៃនោះ ហើយលើសពីនេះ នៅមានតំណាងរដ្ឋាភិបាលមួយចំនួនទៀត ក៏ចូលរួមក្នុងកិច្ចប្រជុំពេញអង្គនៃរដ្ឋសភាដែរ។
អគ្គលេខាធិការរដ្ឋសភា ស្នើទៅរដ្ឋមន្ត្រីសុខាភិបាល ឲ្យរៀបជួយរៀបចំធ្វើតេស្តរកមេរោគកូវីដ-១៩។
លោក ឡេង ប៉េងឡេង ប្រាប់សារព័ត៌មានថ្មីៗ តាមទូរស័ព្ទថា ក្នុងចំណោមថ្នាក់ដឹកនាំរដ្ឋសភា តំណាងរាស្ត្រ មន្ត្រីរាជការរបស់រដ្ឋសភា និង តំណាងរដ្ឋភិបាល ដែលបានទៅចូលរួមប្រជុំនៅរដ្ឋសភា ត្រូវបានបែងចែកជា២ក្រុម គឺក្រុមអ្នកដែលប្រឈមនឹងហានិភ័យខ្ពស់នៃការឆ្លងជំងឺកូវីដ-១៩ និងក្រុមអ្នកដែលប្រឈមនឹងហានិភ័យទាបនៃការឆ្លងជំងឺកូវីដ-១៩។ លោក បញ្ជាក់ថា ក្រុមអ្នកដែលប្រឈមនឹងហានិភ័យខ្ពស់ ត្រូវធ្វើតេស្តរកជំងឺកូវីដ-១៩ តែអ្នកដែលប្រឈមនឹងហានិភ័យទាប នឹងមិនធ្វើតេស្តឡើង ដោយគ្រាន់តែធ្វើចត្តាឡីស័ក។
អគ្គលេខាធិការនិងជាអ្នកនាំពាក្យរដ្ឋសភារូបនេះ មានប្រសាសន៍ថា៖«ឥឡូវ [ក្រសួងសុខាភិបាល] កំពុងរៀបចំ [ធ្វើតេស្ត] ហើយ»។
គិតត្រឹមថ្ងៃទី១ ខែធ្នូ ឆ្នាំ២០២០ មនុស្សជាង៤,៨ពាន់នាក់ហើយ ដែលពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា បានឆ្លងកាត់ការធ្វើតេស្តរកជំងឺកូវីដ-១៩។ ក្នុងចំណោមជាង៤,៨ពាន់នាក់នោះ ក្រសួងសុខាភិបាល រកឃើញមនុស្ស១៧នាក់ហើយ ដែលឆ្លងជំងឺកូវីដ-១៩ ក្នុងព្រឹត្តិការណ៍សហគមន៍២៨វិច្ឆិកា។ ក្រសួងសុខាភិបាល នៅតែបន្តធ្វើតេស្តរកមេរោគកូវីដ-១៩លើមនុស្សផ្សេងទៀត ដែលពាក់ព័ន្ធនឹងព្រឹត្តិការណ៍នេះ។
ព្រឹត្តិការណ៍សហគមន៍២៨វិច្ឆិកា សំដៅលើការរកឃើញករណីឆ្លងជំងឺកូវីដ-១៩ លើស្ត្រីម្នាក់ជាភរិយារបស់មន្ត្រីខ្ពស់នៃក្រសួងមហាផ្ទៃ កាលពីថ្ងៃទី២៨ ខែវិច្ឆិកា ឆ្នាំ២០២០ ហើយមន្ត្រីជាន់ខ្ពស់នៃក្រសួងមហាផ្ទៃជាស្វាមី និងសមាជិកមួយចំនួនក្នុងគ្រួសារពួកគាត់។ ក្រោយមក ក្រសួងសុខាភិបាល រកឃើញអ្នកផ្សេងទៀត ដែលពាក់ព័ន្ធនឹងព្រឹត្តិការណ៍២៨វិច្ឆិកា បានឆ្លងជំងឺកូវីដ-១៩។ ប្រមុខរដ្ឋភិបាល ចាត់ទុកព្រឹត្តិការណ៍នេះ ថាជាការឆ្លងជំងឺកូវីដ-១៩ ចូលសហគមន៍ជាលើកដំបូងនៅកម្ពុជា។
មកដល់ថ្ងៃទី១ ខែធ្នូនេះ កម្ពុជា រកឃើញអ្នកឆ្លងជំងឺកូវីដ-១៩ សរុប៣២៦នាក់ ដោយក្នុងនោះ បានជាសះស្បើយវិញ៣០៤នាក់៕
Tag:
កូវីដ-១៩
រដ្ឋសភា
© រក្សាសិទ្ធិដោយ thmeythmey.com
