UCL៖ Inter ត្រូវការឈ្នះ Gladbach ដាច់ខាតដើម្បីបន្តដង្ហើមប្រជែងកៅអីទៅវគ្គ១៦ក្រុម

កីឡាអន្តរជាតិ

អន្តរជាតិ

UCL៖ Inter ត្រូវការឈ្នះ Gladbach ដាច់ខាតដើម្បីបន្តដង្ហើមប្រជែងកៅអីទៅវគ្គ១៦ក្រុម

01, Dec 2020 , 11:29 pm

រូបភាព

ដោយ: ទេព ពិទូរ្យ

Inter Milan ត្រូវការ៣ពិន្ទុជាចាំបាច់ក្នុងជំនួបជាមួយ Borussia Monchengladbach ក្នុងការប្រកួត Champions League វគ្គសន្សំពិន្ទុពូល B។ ប្រសិនបើលទ្ធផលចាញ់ ឬស្មើនោះ Inter មិនត្រឹមតែមិនអាចឈានទៅវគ្គ១/៨ផ្តាច់ព្រ័ត្រឡើយ សូម្បីតតែឱកាសលេងនៅ Europa League ក៏ស្តួចស្តើងដែរ។

Inter នឹងត្រូវធ្វើដំណើរទៅកាន់ប្រទេសអាល្លឺម៉ង់ដើម្បីតតាំងជាងមួយ Monchengladbach ក្នុងការប្រកួតលើកទី៥ពូល B នៅម៉ោង ៣:០០នាទីទាបភ្លឺថ្ងៃទី១ ធ្នូនេះ [ម៉ោងនៅកម្ពុជា]។ នេះជាជំនួបសំខាន់សម្រាប់ក្រុមទាំងពីរ ខណៈក្រុមអ៊ីតាលីត្រូវការឈ្នះដើម្បីបន្តដំណើរទៅប្រជែងយកកៅអីទៅវគ្គបន្ត ហើយ Monchengladbach ត្រូវការ៣ពិន្ទុទៀតដើម្បីបានទៅវគ្គ១៨ក្រុមដោយស្វ័យប្រវត្តិតែម្តង។

Inter ក្រោមការដឹកនាំរបស់អ្នកចាត់ការទូទៅលោក Antonio Conte មិនទាន់ស្គាន់រសជាតិជ័យជម្នះឡើយសម្រាប់ការប្រកួត៤លើកក្នុងវគ្គសន្សំពិន្ទុក្របខណ្ឌអឺរ៉ុប ដោយក្នុងនោះចាញ់ពីរ និងស្មើពីរ មាន២ពិន្ទុប៉ុណ្ណោះ ស្ថិតនៅបាតតារាងពូល B។

ជំនួបលើទី៥នេះ ក្រុមលោក Conte ត្រូវការឈ្នះជាដាច់ខាតដើម្បីកើន៣ពិន្ទុបន្ថែម សម្រាប់ប្រជែងកៅអីទៅវគ្គបន្ត។ ផ្ទុយទៅវិញបើ Inter ចាញ់ ឬស្មើនោះពួកគេត្រូវអស់ឱកាសទៅវគ្គខ្វែងដោយស្វ័យប្រវត្តិតែម្តង។ ស្របពេលពូល B នេះមានការប្រជែងគ្នាប្រកៀកប្រកិត នោះកៅអី Europa League ដែលត្រូវផ្តល់ជូនក្រុមលេខ៣ក្នុងពូល ក៏ក្រុមអ៊ីតាលីមួយនេះពិបាននឹងប្រជែងយកដែរ បើទោះនៅសល់ប្រកួតលើកទី៦ទៀតក្តី។

សម្រាប់ Monchengladbach ដែលស្ថិតនៅកំពូលតារាងមាន៨ពិន្ទុពីការប្រកួត៤លើក ត្រូវការ៣ពិន្ទុទៀតប៉ុណ្ណោះនឹងឈានទៅវគ្គបន្ត។ ក្រុមនៃលីគកំពូលអាល្លឺម៉ង់នេះ បានបង្ហាញភាពខ្លាំងរបស់ខ្លួនដោយមិនទាន់ស្គាល់ចាញ់ឡើយដោយស្មើជាមួយ Real Madrid និង Inter ហើយឈ្នះ Shakhtar Donetsk ទាំងពីរជើងរួចហើយ។

Shakhtar Donetsk ក៏ត្រូវទទួល Real Madrid ក្នុងពូល B នេះដែរ ហើយពួកគេសុទ្ធតែត្រូវការឈ្នះជាចាំបាច់រៀងខ្លួន ក្នុងការប្រកួតលើកទី៥នេះ។ ក្រុមយក្សអេស្ប៉ាញស្ថិតនៅចំណាត់ថ្នាក់ទី២មាន៧ពិន្ទុ តាមពីក្រោយដោយក្រុមរបស់អ៊ុយក្រែន Shakhtar ដែលរកបាន៤ពិន្ទុ។

ជំនួបគូដទៃទៀតក្នុងក្របខណ្ឌ Champins league នៅរាត្រីថ្ងៃទី១ ធ្នូនេះរួមមាន៖

ពូល A

- Lokomotiv Moscow Vs Salzburg (ម៉ោង ១២:៥៥នាទី)

- Atletico Madrid Vs Bayern Munich (ម៉ោង ៣:០០នាទី)

ពូល C

- FC Porto Vs Man City (ម៉ោង ៣:០០នាទី)

- Marseille Vs Olympiacos (ម៉ោង ៣:០០នាទី)

ពូល D

- Atalanla Vs FC Midtjylland (ម៉ោង ៣:០០នាទី)

- Liverpool Vs Ajax (ម៉ោង ៣:០០នាទី)