COVID-19
អន្តរជាតិ
វៀតណាម បិទការហោះហើរចូលស្រុកទាំងអស់ ក្រោយមានកូវីដ-១៩ ចំនួនពីរករណីទៀត ក្រុមគ្រូពេទ្យវៀតណាមយកសំណាកពីប្រជាជន។ រូបភាព៖ Vietnam Express
× វៀតណាម នៅថ្ងៃទី១ ខែធ្នូ បានរាយការណ៍ពីករណីឆ្លងជំងឺកូវីដ-១៩ ចំនួនពីរបន្ថែមទៀត ដែលករណីទាំងពីរនេះ មានទាក់ទងនឹងអ្នកជំងឺដែលជាគ្រូភាសាអង់គ្លេស។ ដើម្បីទប់ស្កាត់ករណីឆ្លង អាជ្ញាធរបានអំពាវនាវឲ្យប្រជាជនប្រុងប្រយ័ត្នជាងមុន ចាត់វិធានការការពារមួយចំនួន និងផ្អាកការហោះហើរចូលមកក្នុងស្រុកទាំងអស់។
តាមការបញ្ជាក់របស់រដ្ឋមន្ត្រីសុខាភិបាលវៀតណាម លោក Nguyen Thanh Long នៅក្នុងកិច្ចប្រជុំប្រយុទ្ធប្រឆាំងកូវីដ-១៩ អាជ្ញាធរសុខាភិបាល បានរកឃើញពីរករណីបន្ថែមទៀត ដែលត្រូវជាក្មួយ និងជាសិស្សរបស់គ្រូបង្រៀនភាសាអង់គ្លេសនៅក្នុងទីក្រុងហូជីមិញ។ ករណីទាំងពីរនេះ ត្រូវបានរកឃើញ ក្នុងអំឡុងពេលដាក់ចត្តាឡីស័ក។ នេះបើតាមការចុះផ្សាយរបស់សារព័ត៌មាន Vietnam Express។
កន្លងទៅ អាជ្ញាធរសុខាភិបាលវៀតណាម បានរកឃើញអ្នកពាក់ព័ន្ធជាមួយគ្រូបង្រៀនភាសាអង់គ្លេសចំនួន ១៣៧នាក់ និងបានឲ្យអ្នកទាំងនោះដាក់ចត្តាឡីស័ក។ មិនតែប៉ុណ្ណោះ វៀតណាមបានអំពាវនាវឲ្យប្រជាជនរបស់ខ្លួន នៅក្នុងទីក្រុងហូជីមិញប្រុងប្រយ័ត្ន រក្សាអនាម័យ និងរក្សាគម្លាតសុវត្ថិភាពផងដែរ។
នៅក្នុងកិច្ចប្រជុំគណៈរដ្ឋមន្ត្រីវៀតណាម លោកនាយករដ្ឋមន្ត្រី ង្វៀន សួនហ្វ៊ុក បានបញ្ជាឲ្យផ្អាកជើងហោះហើរចូលមកក្នុងស្រុកទាំងអស់ ដើម្បីទប់ស្កាត់ករណីឆ្លងមកពីក្រៅប្រទេសផង ទុកពេលដោះស្រាយករណីឆ្លងនៅក្នុងប្រទេសផង និងអាចគ្រប់គ្រងមនុស្ស ដែលស្ថិតក្នុងចត្តាឡីស័កផង។ យ៉ាងណាក៏ដោយ ប្រជាជនវៀតណាម ធ្វើដំណើរមកក្នុងប្រទេសវិញ មិនត្រូវបានហាមឃាត់ឡើយ ដោយរដ្ឋាភិបាលប្រកាន់ជំហរជួយសង្គ្រោះជនចាស់ជរា អ្នកជំងឺ និងអ្នកជួបបញ្ហាហិរញ្ញវត្ថុជាដើម។
ក្នុងកិច្ចប្រជុំដដែលនេះ ប្រមុខរដ្ឋាភិបាលវៀតណាម ក៏បានប្រាប់ឲ្យទីភ្នាក់ងារពាក់ព័ន្ធទាំងអស់ អនុវត្តវិធានការតឹងរ៉ឹជាងនេះលើដំណើរការនៃការដាក់ចត្តាឡីស័កផងដែរ។ ករណីឆ្លងជាសហគមន៍នៅក្នុងទីក្រុងហូជីមិញ ដែលអវត្តមានជិត ៣ខែកន្លងមកនេះ បានកើតមានឡើងវិញ បន្ទាប់ពីបុគ្គលិកបម្រើការលើយន្តហោះមិនបានដាក់ចត្តាឡីស័កឲ្យបានត្រឹមត្រូវ ដែលបណ្តាលឲ្យឆ្លងទៅគ្រូភាសាអង់គ្លេស ដែលជាមិត្តភក្តិរបស់ខ្លួនតែម្ដង។
គិតត្រឹមថ្ងៃទី១ ខែវិច្ឆិកា វៀតណាមមានករណីឆ្លងកូវីដ-១៩ សរុបចំនួន ១៣៥១ករណី និងអ្នកស្លាប់មានចំនួន ៣៥នាក់។ ចំណែកអ្នកជាសះស្បើយចំនួន ១១៩៥នាក់៕
© រក្សាសិទ្ធិដោយ thmeythmey.com