Inter Milan បានរកឃើញជ័យជម្នះរបស់ខ្លួនលើកដំបូងក្នុងការប្រកួត UEFA Champions League វគ្គសន្សំពិន្ទុពូល B ក្រោយយកឈ្នះ Borussia Moenchengladbach ក្នុងលទ្ធផល ៣-២ នៅរាត្រីថ្ងៃទី១ ខែធ្នូ។ Real Madrid នៅតែបរាជ័យក្រោមថ្វីជើង Shakhtar Donetsk ជាលើកទី២។ ទាំង៤ក្រុមអាចធ្លាក់ និងឡើងទៅវគ្គបន្តរៀងៗខ្លួនក្នុងជំនួបកាត់សេចក្តីមួយលើកចុងក្រោយ។
លទ្ធផលឈ្នះ ៣-២ បានធ្វើឲ្យក្រុមរបស់លោក Antonio Conte មានដង្ហើមដើម្បីបន្តទៅប្រជែងកៅអីទៅកាន់វគ្គ១៦ក្រុមចុងក្រោយ។ ៣គ្រាប់របស់ក្រុមអ៊ីតាលីសម្រេចបានដោយ Matteo Darmian និង Romelu Lukaku ២គ្រាប់ ឯពីរគ្រាប់របស់ Moenchengladbach ធ្វើបានដោយ Alassane Plea ។
ឆ្លងកាត់ការប្រកួត៥លើក Inter ចាញ់២ ស្មើ២ និងឈ្នះ១លើក រកបាន៥ពិន្ទុ នៅបាតតារាងពូល B ដោយដេញតាមក្រុមកំពូលតារាងចំនួន៣ពិន្ទុ និងលេខ២ លេខ៣ ចំនួន២ពិន្ទុ។ ដោយសារក្រុមទាំង៤ក្នុងពូលនេះមានពិន្ទុប្រដេញគ្នាដូច្នេះពួកគេត្រូវប្រជែងគ្នាការប្រកួតនៅមួយលើកចុងក្រោយដើម្បីកាត់សេចក្តីថាក្រុមណានៅឬទៅវគ្គបន្ត។
មូលហេតុដែល Inter នៅមានឱកាសច្រើនក្នុងការប្រជែងកៅអីទៅវគ្គខ្វែង ក៏ព្រោះ Real Madrid បានរងបរាជ័យក្រោមថ្វីជើង Shakhtar ជាលើកទី២ ក្នុងលទ្ធផល ២-០។ ក្រុមយក្សអេស្ប៉ាញ បានចាញ់ក្រុមអ៊ុយក្រែនម្តងរួចមកហើយនៅទឹកដីខ្លួនក្នុងលទ្ធផល ៣-២។
បរាជ័យនេះ ជារឿងដ៏សោកស្តាយសម្រាប់ក្រុមលោក Zinedine Zidane ព្រោះជ័យជម្នះដើម្បី៣ពិន្ទុនៅជំនួបទី៥នេះ នឹងជួយពួកគេនឹងឡើងដោយស្វ័យប្រវត្តិតែម្តង។ ការប្រកួតកាត់សេចក្តីចុងក្រោយពូល B នេះ Inter Milan ត្រូវទទួល Shakhtar ខណៈ Real Madrid ស្វាគមន៍ Moenchengladbach នៅសប្តាហ៍ក្រោយ។ ក្រុមដែលបញ្ចប់ទៅក្នុងចំណាត់ថ្នាក់ទី១ និងទី២ បានកៅអីទៅវគ្គ១៦ក្រុម ឯលេខ៣សល់កៅអីលេងនៅ Europa League បន្តទៀត។
ដោយឡែក Liverpool បានកៅអីទៅវគ្គបន្តជាមួយក្រុមអង់គ្លេស Chelsea និង Manchester City។ ក្រោយឈ្នះ Ajax ១-០ ក្រុមហង្សក្រហមកើនដល់១២ពិន្ទុនាំមុខដាច់ក្នុងពូល D។ Atalanta នៅលេខ២មាន៨ពិន្ទុ ក្រោយស្មើ FC Midtjylland ១-១ ខណៈ Ajax នៅលេខ៣មាន៧ពិន្ទុ ឯMidtjylland នៅបាតតារាងមាន១ពិន្ទុអស់ឱកាសប្រជែងកៅអីទាំងអស់។
លទ្ធផលការប្រកួតដទៃទៀត៖
ពូល A
- Lokomotiv Moscow ១-៣ Salzburg
- Atletico Madrid ១-១ Bayern Munich
ពូល C
- FC Porto ០-០ Man City
- Marseille ២-១ Olympiacos