COVID-19
អន្តរជាតិ
អង់គ្លេស ជាប្រទេសដំបូងគេអនុញ្ញាតឲ្យប្រើវ៉ាក់សាំងកូវីដ-១៩ របស់ក្រុមហ៊ុន Pfizer
ដប ដែលត្រូវបានសរសេរថា វ៉ាក់សាំងកូវីដ-១៩។ រូបភាព៖ Reuters
×![]()
ដោយ: ធៀន ភារិន្ទ
ចក្រភពអង់គ្លេស នៅថ្ងៃទី២ ខែធ្នូ បានក្លាយជាប្រទេសទីមួយលើពិភពលោក អនុម័តឲ្យប្រើប្រាស់វ៉ាក់សាំងប្រឆាំងកូវីដ-១៩ របស់ក្រុមហ៊ុនអាមេរិក Pfizer សម្រាប់ប្រើប្រាស់នៅក្នុងប្រទេស។ វ៉ាក់សាំងនេះ នឹងដាក់ឲ្យប្រើប្រាស់ចាប់ពីសប្តាហ៍ក្រោយទៅ។ 
តាមការបញ្ជាក់របស់រដ្ឋមន្ត្រីសុខាភិបាលអង់គ្លេសលោក Matt Hancock រដ្ឋាភិបាល បានទទួលយកការណែនាំរបស់និយ័តករផលិតផលសុខភាព និងថ្នាំពេទ្យ (MHRA) ដើម្បីអនុម័តឲ្យប្រើប្រាស់វ៉ាក់សាំង Pfizer ហើយ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
អង់គ្លេស បានបញ្ជាទិញវ៉ាក់សាំងពីក្រុមហ៊ុន Pfizer-BioNTech ៤០លានដូស ដើម្បីចាក់ពីរដងលើប្រជាជនខ្លួន ២០លាននាក់។ អាទិភាព នឹងត្រូវផ្ដល់ឲ្យមនុស្សចាស់ គ្រូពេទ្យព្យាបាលអ្នកជំងឺកូវីដ-១៩ និងអ្នកមានផ្ទុកជំងឺរ៉ាំរ៉ៃផ្សេងៗ។
ប្រសិនគ្មានការប្រែប្រួលទេ វ៉ាក់សាំង នឹងដាក់ឲ្យប្រើប្រាស់ ឬដាក់លក់ ចាប់ពីសប្តាហ៍ក្រោយទៅនៅចក្រភពអង់គ្លេស។ ការអនុម័តនេះ បានធ្វើឲ្យអង់គ្លេស ក្លាយជាប្រទេសដំបូងបំផុតនៅលើពិភពលោក ដែលអនុញ្ញាតឲ្យចាក់វ៉ាក់សាំងនៅក្នុងប្រទេស។
តាមលទ្ធផលបឋមនៃការពិសោធន៍កន្លងមក ក្រុមហ៊ុនថ្នាំពេទ្យ Pfizer ដែលសហការជាមួយក្រុមហ៊ុន BioNTech បានអះអាងថា វ៉ាក់សាំងរបស់ខ្លួនមានប្រសិទ្ធភាព ក្នុងការប្រឆាំងជាមួយកូវីដ-១៩ រហូតដល់ ៩៥ភាគរយឯណោះ។ កម្រិតប្រសិទ្ធភាពរបស់វ៉ាក់សាំងនេះ គឺលើសពីវ៉ាក់សាំងផ្សេងទៀត ដូចជា Moderna មានប្រសិទ្ធភាព ៩៤,៥ភាគរយ និងក្រុមហ៊ុន AstraZeneca ដែលមានប្រសិទ្ធភាពជាមធ្យមប្រមាណ ៧០ភាគរយ៕
Tag:
អង់គ្លេស
កូវីដ-១៩
© រក្សាសិទ្ធិដោយ thmeythmey.com
