អ្នកគាំទ្រ Arsenal នៅកេនយ៉ា សម្លាប់បុរសម្នាក់ដែលចំអកខ្លួនក្រោយចាញ់ Wolves

កីឡាអន្តរជាតិ

អន្តរជាតិ

អ្នកគាំទ្រ Arsenal នៅកេនយ៉ា សម្លាប់បុរសម្នាក់ដែលចំអកខ្លួនក្រោយចាញ់ Wolves

02, Dec 2020 , 10:59 pm

រូបភាព

ដោយ: ទេព ពិទូរ្យ

បុរសម្នាក់ត្រូវបានសម្លាប់នៅក្នុងប្រទេសកេនយ៉ា បន្ទាប់ពីចំអករឿងក្រុម Arsenal ចាញ់ Wolverhampton Wanderers ក្នុងលទ្ធផល ២-១ កាលពីសប្តាហ៍មុន។ អ្នកគាំទ្រក្រុមកាំភ្លើងធំពិតជាមិនសប្បាយចិត្តឡើយ ដ្បិតរងបរាជ័យ៣លើកក្នុងដីរដូវកាលនេះ និងស្ថិតនៅចំណាត់ថ្នាក់ទី១៤ក្នុងតារាង Premier League។

បើតាមការចុះផ្សាយរបស់ Goal ក្រុមអ្នកគាំទ្រ Arsenal បានសម្លាប់បុរសម្នាក់នោះនៅឯមជ្ឈមណ្ឌល Kinamba នៅតាមបណ្តោយផ្លូវ Naivasha-Kirima។ មូលហេតុ ដែលនាំឲ្យមានការវាយរហូតដល់ស្លាប់នេះ គឺដោយសារបុរសនោះបានចំអកទៅក្រុមអ្នកគាំទ្រកាំភ្លើងធំដោយក្រុមចាញ់ Wolves ក្នុងការប្រកួតលីគនៅថ្ងៃទី៣០ វិច្ឆិកា។

នេះជាបរាជ័យលើកទី៥ និងលើកទី៣នៅកីឡដ្ឋាន Emirate របស់ក្រុមដែលដឹកនាំដោយអ្នកចាត់ការទូទៅ Mikel Arteta នៅរដូវកាល ២០២០-២១នេះ ក្នុងចំណោមការប្រកួតទាំង១០លើក។ Arsenal រកបានតែ១៣ពិន្ទុប៉ុណ្ណោះ និងស្ថិតនៅចំណាត់ថ្នាក់ទី១៤បណ្តោះអាសន្ន។

ដោយសារមួម៉ៅនឹងលទ្ធផលចាញ់ និងស្ថិតក្នុងស្ថានភាពស្រវឹងផង អំពើហិង្សាក៏បានកើតឡើយតែម្តង។ Goal បន្តថា មានបុរសវ័យកណ្តាលម្នាក់ត្រូវបានគេវាយចំក្បាលនឹងដុំថ្មនៅពេលចាប់ផ្តើមនិយាយចំអកទៅកាន់អ្នកគាំទ្ររបស់ក្រុម Arsenal បន្ទាប់ពីការប្រកួតចាញ់។

«អ្នកគាំទ្រ Arsenal កំពុងមើលការប្រកួតផ្ទាល់ដែលផ្សាយតាមកញ្ចក់ទូរទស្សន៍ នៅពេលឃាតកម្មបានកើតឡើងនៅយប់ថ្ងៃទី៣០ វិច្ឆិកានោះ។ អ្នកស្លាប់មានឈាមហូរចេញពីក្បាលយ៉ាងច្រើននៅលើផ្លូវ ក្បែរកន្លែងមិត្តភក្តិរបស់ជនរងគ្រោះកំពុងផឹកស៊ី»។

ក្រោយកើតហេតុ ប៉ូលិសកេនយ៉ាបានបើកការស៊ើបអង្កេត និងចាប់ខ្លួនជនដៃដល់ដែលពាក់ព័ន្ធនឹងឃាតកម្មនេះ។

រឿងដ៏អកុសលនេះ មិនមែនទើបកើតឡើងជាលើកទី១ទេនៅក្នុងប្រទេសកេនយ៉ា នៃទ្វីបអាហ្វ្រិកនេះឡើយ។ កាលពីឆ្នាំ២០១៤ អ្នកគាំទ្រ Arsenal បានចាក់សម្លាប់អ្នកទ្រ Liverpool ម្នាក់ បន្ទាប់ក្រុមពួកគេបរាជ័យក្នុងលទ្ធផល ៥-១ នាការប្រកួតលីគកំពូលអង់គ្លេស៕