អន្តរជាតិ
ប្រទេសបុតស្វាណានឹងបញ្ជូនដំរីត្រឡប់ទៅអង់ហ្គោឡាវិញដើម្បីបន្ថយចំនួនដ៏លើសលប់ក្នុងប្រទេសខ្លួន
រូបឯកសារ៖ ដំរីឈ្មោះអាហ្វ្រិកកំពុងធ្វើសកម្មភាពនានានៅតាមដងទន្លេ Boteti ប្រទេសបុតស្វាណា ឆ្នាំ២០១៦។
×![]()
ដោយ: សារព័ត៌មានថ្មីៗ
សត្វដំរីច្រើនជាង១៣០.០០០ក្បាលរស់នៅក្នុងប្រទេសបុតស្វាណាដែលជាចំនួនច្រើនជាងគេបំផុតក្នុងពិភពលោក។
ប៉ុន្តែដំរីរាប់ម៉ឺនក្បាលគឺជាដំរីដែលភៀសខ្លួនចេញពីសង្គ្រាមស៊ីវិលជាច្រើនទសវត្សរ៍ក្នុងប្រទេសអង់ហ្គោឡាដែលបានបញ្ចប់កាលពីឆ្នាំ២០០២។
អ្នកអភិរក្សដូចជាលោក Mike Chase នៃអង្គការដំរីគ្មានព្រំដែន (Elephants Without Borders)និយាយថា ចំនួនដំរីក្នុងប្រទេសបុតស្វាណាបានកើនឡើងច្រើនពេកបង្កឲ្យមានជម្លោះជាមួយកសិករនិងមានកង្វះអាហារនិងទឹក។
លោក Chase ថ្លែងថា៖«ដូច្នេះដើម្បីដោះស្រាយបញ្ហានេះ គឺត្រូវបញ្ជូនដំរីទាំងនេះទៅកាន់ទីដែលមានសុវត្ថិភាព ទីដែលពួកគេអាចរស់នៅបង្កើតកូនបង្កើតចៅ និងអាចតាំងទីលំនៅឡើងវិញក្នុងភាគអាគ្នេយ៍នៃប្រទេសអង់ហ្គោឡា ដែលមិនសូវមានសត្វដំរី»។
ដើម្បីធ្វើបែបនោះបាន ប្រទេសអង់ហ្គោឡាបានយល់ព្រមសម្អាតមីនពីសង្គ្រាម ហើយប្រទេសបុតស្វាណានឹងដករបងរារាំងការធ្វើចំណាកស្រុករបស់សត្វដំរី។
អ្នកជំនាញផ្នែកគ្រប់គ្រងសត្វព្រៃលោក Erik Verreynne និយាយថា ការធ្វើដំណើររបស់សត្វនៅទាបនៅឡើយ។
«យើងនៅតែទទួលបានការរាយការណ៍ពីការប្រមាញ់សត្វក្នុងប្រទេសអង់ហ្គោឡា។ យើងដឹងថាគ្រាប់មីននៅតែជាបញ្ហា ទោះបីជាពួកគេកំពុងព្យាយាមយកវាចេញ។ ខ្ញុំមិនដឹងទេ ប៉ុន្តែអ្វីដែលខ្ញុំដឹងនៅពេលនេះគឺថាវាសំខាន់ក្នុងការបើកច្រកព្រំដែនឲ្យដំរីធ្វើដំណើរ»។
ប្រទេសបុតស្វាណាជាផ្នែកមួយក្នុងតំបន់អភិរក្ស Kavango-Zambezi Trans-frontier ដែលមានប្រាំប្រទេសជាដៃគូក្នុងការអភិរក្សធនធានធម្មជាតិរួមគ្នា។
នាយកប្រតិបត្តិនៃក្រុមនោះគឺលោក Nyambe Nyambe និយាយថា គោលដៅក្នុងភាពជាដៃគូគឺដើម្បីឲ្យសត្វព្រៃធ្វើចលនាដោយសេរីក្នុងតំបន់។
«ការរស់រានរយៈពេលវែងរបស់សត្វដំរីពឹងលើការធានាឲ្យបានថាយើងរក្សាសន្តិសុខនិងភ្ជាប់ឡើងវិញនូវច្រកសម្រាប់សត្វព្រៃឆ្លងព្រំដែន។ នៅពេលដែលយើងនិយាយអំពីអ្វីដែលប្រទេសជាដៃគូកំពុងធ្វើដើម្បីគាំទ្រប្រទេសអង់ហ្គោឡាជាពិសេស គ្រប់គ្នាកំពុងរួមចំណែកក្នុងដំណើរការនេះ»។
ប្រធានាធិបតីប្រទេសបុតស្វាណាលោក Mokgweetsi Masisi បាននិយាយថា រដ្ឋាភិបាលរបស់លោកពិតជាមានឆន្ទៈយ៉ាងខ្លាំងក្នុងការសហការជាមួយប្រទេសជិតខាង ដើម្បីបើកច្រកព្រំដែនសម្រាប់ការចំណាកស្រុករបស់សត្វដំរីនិងគ្រប់គ្រងចំនួនសត្វដំរីបានប្រសើរជាងមុន៕
© រក្សាសិទ្ធិដោយ thmeythmey.com
