ជាតិ
១១ខែនេះ កម្ពុជារកចំណូលបាន៤១៥លានដុល្លារ ពីការនាំអង្ករចេញ៦០ម៉ឺនតោន
× ភ្នំពេញ៖ ទោះបីជួបបញ្ហាកូវីដ-១៩ ក្តី តែកម្ពុជា នៅតែអាចនាំអង្ករចេញបាន៦០១, ០៤៥ តោន គិតត្រឹម១១ខែ ឆ្នាំ២០២០នេះ ដែលកើនឡើង១៧ភាគរយ បើធៀបនឹងរយៈពេលដូចគ្នា កាលពីឆ្នាំ២០១៩។ នេះបើតាមរបាយការណ៍ សហព័ន្ធស្រូវអង្ករកម្ពុជា។
សហព័ន្ធស្រូវអង្ករកម្ពុជា បានបញ្ជាក់ទៀតថា ការនាំចេញអង្ករ៦០ម៉ឺនតោននេះ ជួយឲ្យកម្ពុជារកចំណូលបាន៤១៥លានដុល្លារ ដែលកើនឡើងជិត១២ភាគរយ បើធៀបទៅរយៈពេលដូចគ្នាក្នុង ឆ្នាំ២០១៩ ដែលបាននាំចេញក្នុងទំហំទឹកប្រាក់ ៣៧២លានដុល្លារ។
សម្រាប់ការនាំចេញអង្ករ រយៈពេល១១ខែនេះ កម្ពុជាបាននាំចេញ អង្ករក្រអូប ៤៨១,២០០តោន ឬស្មើនឹង៨០ភាគរយ នៃបរិមាណនាំចេញសរុប ដែលក្នុងនោះ អង្ករក្រអូបប្រណិត ប្រភេទម្លិះអង្គរ ត្រូវបាននាំចេញចំនួន ៥៥ភាគរយ អង្ករសែនក្រអូបចំនួន ២៥ភាគរយ។នេះបើតាមសហព័ន្ធស្រូវអង្ករកម្ពុជា។
បើនិយាយដោយឡែកពីការនាំចេញអង្ករនៅក្នុងខែវិច្ឆិកាកន្លងមកវិញ កម្ពុជាសម្រេចបានបរិមាណ ៦៤ ,៧៤០ តោន គិតជាទឹកប្រាក់ចំនួន ៤៨,៦៥លានដុល្លារ។ ដ្បិតបរិមាណនាំចេញអង្ករនៅខែវិច្ឆិកា កើនឡើងជាង១៥ភាគរយក្តី ប៉ុន្តែចំណូលនៃការនាំចេញវិញ គឺមានការធ្លាក់ចុះ ១៣,២៦ភាគរយ ដោយសារតម្លៃលើទីផ្សារអង្ករក្រអូប មានការធ្លាក់ចុះជាបន្តបន្ទាប់។ ចំពោះទីផ្សារនាំចេញវិញ គឺកម្ពុជានាំទៅចិន ៦១ភាគរយ និងទីផ្សារទីក្រុងហុងកុង ២ភាគរយ ដែលគិតជាបរិមាណ៤០,៤៨៩តោន ក្នុងទំហំទឹកប្រាក់៤៩លានដុល្លារ។ នេះបើតាមសហព័ន្ធស្រូវអង្ករដដែល។
រដ្ឋាភិបាល បានដាក់គោលដៅនាំអង្ករចេញឲ្យបាន១លានតោន។ ប៉ុន្តែផែនការនេះ មិនទាន់បានជោគជ័យនៅឡើយទេ។ តែយ៉ាងណាប្រធានសហព័ន្ធស្រូវអង្ករកម្ពុជាលោក សុង សារ៉ន ធ្លាប់បានបញ្ជាក់ថា ការនាំចេញអង្ករ១លានតោននេះ គឺវាអាស្រ័យលើការបញ្ជាទិញពីប្រទេសចិន ខណៈបច្ចុប្បន្នប្រទេសមហាអំណាចមួយនេះ ជាទីផ្សារអង្ករធំលំដាប់ទី១របស់កម្ពុជា។ បើតាមលោក សុង សារ៉ន ពីមួយឆ្នាំទៅមួយឆ្នាំ ចិននាំអង្ករចូលពីកម្ពុជា មានកំណើនពី១០ទៅ១៥ភាគរយ ឬលើសពីនេះ។
ប្រធានសហព័ន្ធស្រូវអង្ករកម្ពុជារូបនេះ ជឿជាក់ថា កម្ពុជានឹងសម្រេចការនាំអង្ករចេញបាន១លានតោននៅក្នុងឆ្នាំ២០២១ ស្របតាមគោលដៅរបស់រដ្ឋាភិបាល ដែលបានកំណត់តាំង២០១៥មក តាមរយៈការចរចារទីផ្សារ នយោបាយ ពាណិជ្ជកម្ម សេដ្ឋកិច្ច រវាងប្រទេសចិននិងកម្ពុជា៕
Relate 94108
© រក្សាសិទ្ធិដោយ thmeythmey.com