លោក ពូទីន បញ្ជាចាប់ផ្ដើមចាក់វ៉ាក់សាំងកូវីដ-១៩ ដោយពេទ្យនិងគ្រូបង្រៀនជាអាទិភាព

COVID-19

សង្គមអន្តរជាតិ

អន្តរជាតិ

លោក ពូទីន បញ្ជាចាប់ផ្ដើមចាក់វ៉ាក់សាំងកូវីដ-១៩ ដោយពេទ្យនិងគ្រូបង្រៀនជាអាទិភាព

03, Dec 2020 , 3:43 pm

រូបភាព

លោក វ្ល៉ាឌីមៀ ពូទីន ប្រធានាធិបតីរុស្ស៊ី ។ រូបពី AFP

ដោយ:

ប្រធានាធិបតីរុស្ស៊ី វ្ល៉ាឌីមៀ ពូទីន បានបញ្ជាឲ្យបើកដំណើរការកម្មវិធីចាក់វ៉ាក់សាំងបង្ការជំងឺកូវីដ-១៩ ដោយស្ម័គ្រចិត្តទ្រង់ទ្រាយធំ ចាប់ពីសប្ដាហ៍ក្រោយទៅ នៅទូទាំងប្រទេសរុស្ស៊ី ។ បើតាមមេដឹកនាំរូបនេះ គ្រូបង្រៀន និងវេជ្ជបណ្ឌិត គួរជាក្រុមមនុស្សអាទិភាពដើម្បីទទួលការចាក់វ៉ាក់សាំងបង្ការជំងឺកូវីដ-១៩ ផលិតដោយរុស្ស៊ីផ្ទាល់។

ថ្នាំវ៉ាក់សាំងបង្ការកូវីដ-១៩ «Sputnik V» ជាវ៉ាក់សាំងមួយក្នុងចំណោមដែលផលិតដោយរុស្ស៊ីចំនួន២ ទទួលបានការអនុម័តក្នុងស្រុក ទោះបីជាការពិសោធ (Clinical Trails) ពុំទាន់បញ្ចប់ជោគជ័យនៅឡើយក្តី។ ចំណែក បេក្ខភាពវ៉ាក់សាំងទី ៣ របស់រុស្ស៊ី ក៏កំពុងស្ថិតក្នុងដំណើរការផងដែរក្នុងសប្ដាហ៍នេះ ។

យោងតាមនិយមន័យដែលផ្ដល់ឲ្យដោយអង្គការសុខភាពពិភពលោក (WHO) ការពិសោធន៍ខាងលើ សំដៅលើប្រភេទនៃកិច្ចការស្រាវជ្រាវ ដែលសិក្សាលើការធ្វើពិសោធន៍ និងការព្យាបាលថ្មី និងវាយតម្លៃលើប្រសិទ្ធភាពពួកវាលើសុខភាពមនុស្ស។

រដ្ឋាភិបាលរុស្ស៊ី ធ្លាប់អះអាងកាលពីខែមុនថា យោងតាមលទ្ធផលបឋម វ៉ាក់សាំង «Sputnik V» មានប្រសិទ្ធភាពបង្ការកូវីដ-១៩ រហូតដល់ ៩២ភាគរយ។ ក្នុងជំនួបតាមអនឡាញជាមួយរដ្ឋមន្ត្រីលោកនៅថ្ងៃទី ២ ខែវិច្ឆិកា លោកប្រធានាធិបតី វ្ល៉ាឌីមៀ ពូទីន អះអាងថា រុស្ស៊ី នឹងផលិតថ្នាំវ៉ាក់សាំងបង្ការកូវីដ-១៩នេះ ចំនួន២លានដូសក្នុងពេល២ឬ៣ថ្ងៃខាងមុខនេះ។

លោក ពូទីន បានដាក់ចេញបញ្ជាទៅដល់ឧបនាយករដ្ឋមន្ត្រីរុស្ស៊ី អ្នកស្រី Tatiana Golikova ឲ្យត្រៀមលក្ខណៈចាប់ផ្ដើមកម្មវិធីចាក់វ៉ាក់សាំងបង្ការជំងឺកូវីដ-១៩ ទ្រង់ទ្រាយធំ ចាប់ពីសប្ដាហ៍ក្រោយទៅ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។

ទន្ទឹមនេះ លោក ពូទីន ទទួលស្គាល់ថា លោកក៏មានការប្រុងប្រយ័ត្នចំពោះសុវត្ថិភាពនៃវ៉ាក់សាំងនេះផងដែរ ក៏ប៉ុន្តែលោកសង្កត់ធ្ងន់ថា ពលរដ្ឋរុស្ស៊ី ជាទូទៅ ត្រៀមខ្លួនរួចរាល់សម្រាប់ទទួលយកការចាក់វ៉ាក់សាំងផលិតក្នុងស្រុកនេះ។

អំឡុងបទបង្ហាញដាច់ដោយឡែកមួយទៅកាន់អង្គការសហប្រជាជាតិស្តីពីថ្នាំវ៉ាក់សាំង «Sputnik V» រដ្ឋមន្ត្រីសុខាភិបាលរុស្ស៊ី លោក Mikhail Murashko បានបញ្ជាក់ថា រុស្ស៊ីបានចាក់វ៉ាក់សាំបង្ការកូវីដ-១៩ឲ្យមនុស្សដែលប្រឈមហានិភ័យខ្ពស់ជាង១០ម៉ឺននាក់រួចរាល់ហើយ។ ចំណែក មនុស្សជាង៤៥០០០នាក់ផ្សេងទៀត ក៏កំពុងចូលរួមការសាកល្បងថ្នាំវ៉ាក់សាំង «Sputnik V» នេះនៅទូទាំងពិភពលោកផងដែរ។

គួរបញ្ជាក់ដែរថា រដ្ឋាភិបាលរុស្ស៊ី នាពេលថ្មីៗនេះ បានប្រកាសថា ពលរដ្ឋរុស្ស៊ី នឹងត្រូវផ្ដល់អាទិភាពចាក់វ៉ាក់សាំង ខណៈក្រុងមូស្គូ ក៏កំពុងពិភាក្សាកិច្ចព្រមព្រៀងផ្គត់ផ្គង់វ៉ាក់សាំងខ្លួនជាមួយប្រទេសដទៃផងដែរ។

គិតត្រឹមថ្ងៃទី ៣ ខែធ្នូ រុស្ស៊ីមានករណីកូវីដ-១៩សរុប ២,៣៥លានករណី ខណៈអ្នកស្លាប់មាន៤១ ០៥៣។ ដើម្បីបង្ការការឆ្លងរាលដាល ទីតាំងកម្សាន្ត ដូចជា រោងភាពយន្ត សារមន្ទីរ និងហាងលក់ស្រា ជាដើម នឹងត្រូវបិទទ្វារក្នុងទីក្រុងធំៗ ដូចជា St Petersburg និង មូស្គូអំឡុងថ្ងៃបុណ្យចូលឆ្នាំថ្មីរបស់រុស្ស៊ី ពីថ្ងៃទី ៣០ ធ្នូ និងថ្ងៃទី ១០ ខែមករា៕