កីឡាអន្តរជាតិ
តារាល្បីៗ
អន្តរជាតិ
Ronaldo ស៊ុតចូលគ្រាប់ទី៧៥០ ក្នុងជំនួបដែលមានអាជ្ញាកណ្តាលស្ត្រីដំបូងក្នុងប្រវត្តិសាស្ត្រ
× Cristiano Ronaldo រកគ្រាប់បាល់ទី ៧៥០ ក្នុងអាជីពរបស់ខ្លួន នាជ័យជម្នះរបស់ Juventus លើក្រុម Dynamo Kyiv ដោយលទ្ធផល ៣-០ ក្នុងការប្រកួត Champions League ដែលមានអាជ្ញាកណ្តាលជាស្ត្រី។ លោកស្រី Stephanie Frappart បានបង្កើតប្រវត្តិសាស្ត្រដោយកាត់ក្តីការប្រកួតបុរសជាលើកដំបូងបំផុតរបស់ក្របខណ្ឌលីគកំពូលអឺរ៉ុប។
ខ្សែប្រយុទ្ធសញ្ជាតិព័រទុយហ្គាល់ វ័យ៣៥ឆ្នាំ ជាអ្នកស៊ុតបាល់គ្រាប់ទី២ឲ្យក្រុមយក្សអ៊ីតាលី បន្ទាប់ពី Federico Chiesa សម្រេចគ្រាប់ដំបូង។ ខ្សែប្រយុទ្ធ Alvaro Morata បន្ថែមគ្រាប់ទី៣ ដើម្បីជួយក្រុមឈ្នះ Dynamo Kyiv ៣-០ បើទោះ Juventus បានកៅអីទៅវគ្គ១៦ក្រុមហើយក្តី។ ក្រោយការប្រកួត៥លើក Juventus ស្ថិតក្នុងចំណាត់ថ្នាក់ទី២ ពូល G មាន១២ពិន្ទុ តាមពីក្រោយក្រុមកំពូលតារាង Barcelona ៣ពិន្ទុ តែនាំមុនក្រុមលេខ៣ និងលេខ៤ ចំនួន១១ពិន្ទុ។
គ្រាប់បាល់ទាំង៧៥០គ្រាប់របស់ Ronaldo ធ្វើបានពីការលេងឲ្យក្លិបបាល់ទាត់ចំនួន៤ និងជម្រើសជាតិព័រទុយហ្គាល់។ ក្លិបដែលរូបគេរកគ្រាប់បានច្រើនគឺ Real Madrid ចំនួន ៤៥០គ្រាប់ Manchester United ចំនួន១១៨គ្រាប់ ជម្រើសជាតិ ១០២គ្រាប់ Juventus ៧៥គ្រាប់ និង Sporting Lisbon ចំនួន ៥គ្រាប់។
ជំនួបដែលធ្វើឲ្យម្ចាស់ពាន Ballon D’or ៥សម័យ សម្រេចគ្រាប់ទី៧៥០ក្នុងអាជីព ក៏ជាការបង្ហាញខ្លួនលើកដំបូងរបស់អាជ្ញាកណ្តាលស្ត្រីក្នុងក្របខណ្ឌកំពូលអឺរ៉ុបនេះផងដែរ។
អ្នកស្រី Frappart វ័យ៣៦ឆ្នាំដែលកាត់ក្តីក្នុងជំនួប Juventus- Dynamo Kyiv នេះបានក្លាយជាអាជ្ញាកណ្តាលស្ត្រីដែលកាត់ក្តីលើទីលានបាល់ទាត់ Champions League បុរសដំបូងបំផុតក្នុងប្រវត្តិសាស្ត្រ។
មុនឈានទៅកាន់ក្របខណ្ឌកំពូលអឺរ៉ុប អ្នកស្រីអាជ្ញាកណ្តាលសញ្ជាតិបារាំង Frappart បានចូលរួមកាត់ក្តីក្នុងការប្រកួតក្របខណ្ឌលីគកំពូលបារាំង Ligue 1 ចាប់តាំងពីរដូវកាលមុន។ ក្រៅពីនោះ អ្នកស្រី ក៏ចូលរួមកាត់ក្តីក្នុងព្រឹត្តិការណ៍ World Cup ស្ត្រី និងទទួលបន្ទុកលើការប្រកួតរវាង Liverpool ជាមួយ Chelsea ក្នុងព្រឹត្តិការណ៍ផ្តាច់ព្រ័ត្រ UEFA Super Cup កាលពីឆ្នាំ២០១៩ផងដែរ៕
Tag:
Cristiano Ronaldo
Stephanie Frappart
Champions League
© រក្សាសិទ្ធិដោយ thmeythmey.com