ព្រះមហាក្សត្រ ចូលរួមអំពាវនាវឲ្យផ្អាកការជួបជុំ

COVID-19

ជាតិ

ព្រះមហាក្សត្រ ចូលរួមអំពាវនាវឲ្យផ្អាកការជួបជុំ

03, Dec 2020 , 11:29 pm

រូបភាព

ដោយ: សារព័ត៌មានថ្មីៗ

ព្រះករុណ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ទ្រង់បានចេញព្រះរាជសារអបអរសាទរទិវាជនមានពិការភាពកម្ពុជាលើកទី២២ និងទិវាជនមានពិការភាពអន្តរជាតិលើកទី៣៨ នៅថ្ងៃទី៣ ខែធ្នូ ឆ្នាំ២០២០នេះ។ ក្រៅពីមានបន្ទួលពាក់ព័ន្ធនឹងជនពិការ ព្រះអង្គ ក៏មានបន្ទូលអំពីស្ថានភាពជំងឺកូវីដ-១៩ដែរ។

កម្ពុជា តែងរៀបចំពិធីប្រារព្ធទិវាជនមានពិការភាពជារៀងរាល់ឆ្នាំ។ តែដោយសារតែបារម្ភនឹងការឆ្លងជំងឺកូវីដ-១៩ ពិធីរម្លឹកទិវាជនមានពិការភាព មិនត្រូវបានប្រារព្ធឡើងនៅកម្ពុជាឡើយ សម្រាប់ឆ្នាំ២០២០នេះ។

ព្រះករុណាជាម្ចាស់ជីវិតលើត្បួង អំពាវនាវថា៖«ដោយសារវិបត្តិជំងឺកូវីដ-១៩ កំពុងរីករាលជាសាកល ខ្ញុំព្រះករុណា ខ្ញុំ សូមអំពាវនាវដល់បងប្អូនជនរួមជាតិ ពិសេសជនមានពិការភាពទាំងអស់ ផ្អាកការជួបជុំតាមការណែនាំរបស់ប្រមុខរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន ដែលមានភាពប៉ិនប្រសប់ឈ្លាសវៃក្នុងការបង្ការនិងការទប់ស្កាត់នៃមេរោគកូវីដ-១៩នេះ»។

សម្តេចនាយករដ្ឋមន្ត្រី ហ៊ុន សែន បានអំពាវនាវឲ្យប្រជាជនផ្អាករៀបចំពិធីអាពាហ៍ពិពាហ៍និងគ្រប់ការជួបជុំដែលមានមនុស្សចាប់ពី២០ឡើងទៅ ក្នុងរយៈពេលកន្លះខែសិន ដោយគិតចាប់តាំងពីថ្ងៃទី១ ខែធ្នូទៅ រហូតដល់ពាក់កណ្តាលខែធ្នូ ឆ្នាំ២០២០។ ការអំពាវនាវរបស់ប្រមុខរដ្ឋាភិបាល ធ្វើឡើងបន្ទាប់ពីកម្ពុជាជួបព្រឹត្តិការណ៍សហគមន៍២៨វិច្ឆិកា ដែលមានន័យថា ជំងឺកូវីដ-១៩ ចាប់ផ្តើមឆ្លងចូលសហគមន៍ក្នុងប្រទេសកម្ពុជា នៅថ្ងៃទី២៨ ខែវិច្ឆិកា។

មានព្រះរាជឱង្ការពីស្ថានភាពជំងឺកូវីដ-១៩រួចហើយ ព្រះរាជា ក៏បន្តមានព្រះរាជឱង្ការពីជនពិការ។ ព្រះអង្គ ទតឃើញថា សុខុមាលភាពរបស់ជនពិការ ត្រូវបានយកចិត្តទុកដាក់ ហើយក្លាយជាកម្មវត្ថុអាទិភាពក្នុងការធ្វើអន្តរាគមន៍និងសង្គ្រោះបន្ទាន់ពីគ្រោះហានិភ័យប្រកបដោយសុវត្ថិភាព។ ជាមួយគ្នានេះ ព្រះអង្គ បានសម្តែងព្រះហឫទ័យគាំទ្ររដ្ឋាភិបាលកម្ពុជា ដែលឆន្ទៈខ្ពស់ក្នុងការលើកកម្ពស់សុខុមាលភាពជនងាយរងគ្រោះ ពិសេសជនពិការ។

សម្តេចនាយករដ្ឋមន្ត្រី ហ៊ុន សែន ប្រធានកិត្តិយសនៃក្រុមប្រឹក្សាសកម្មភាពជនពិការ ក៏បានចេញសារលិខិតអបអរសាទរទិវាជនមានពិការដែរ។ ក្នុងសារលិខិតនោះ ប្រមុខរដ្ឋាភិបាល ជំរុញឲ្យស្ថាប័នរដ្ឋនិងឯកជន បន្តលើកទឹកចិត្តដល់ជនពិការ និងទទួលយកពួកគេ ចូលបម្រើការងារ ដោយគ្មានការរើសអើង៕