អន្តរជាតិ
សេដ្ឋីហុងកុង Jimmy Lai ត្រូវប៉ូលិសឃុំខ្លួនជាថ្មីពាក់ព័ន្ធការក្លែងបន្លំកិច្ចសន្យារជួលអគារ លោក Jimmy Lai សេដ្ឋីហុងកុង។ រូបភាព៖ AP
× សេដ្ឋីក្នុងវិស័យប្រព័ន្ធផ្សព្វផ្សាយហុងកុង លោក Jimmy Lai នៅថ្ងៃទី៤ ខែវិច្ឆិកា ត្រូវបានតុលាការហុងកុងចោទពីបទក្លែងបន្លំ ហើយត្រូវបានឃុំខ្លួនបណ្តោះអាសន្ន ដោយរង់ចាំការកាត់ទោសរហូតដល់ខែមេសា ឆ្នាំ២០២១។ ការចោទប្រកាន់នេះ ធ្វើឡើងបន្ទាប់ពីតុលាការហុងកុង ទើបតែកាត់ទោសសកម្មជនប្រជាធិបតេយ្យហុងកុងចំនួន ៣រូបឲ្យជាប់ពន្ធនាគារពី ៧ខែ ដល់ជាង ១៣ខែ។
លោក Jimmy Lai សេដ្ឋីហុងកុងវ័យ ៧៣ឆ្នាំ ជាស្ថាបនិកក្រុមហ៊ុន Next Digital។ បុរសរូបនេះ ជាមួយនឹងបុគ្គលិកប្រតិបត្តិជាន់ខ្ពស់ពីររូបទៀត ត្រូវបានប៉ូលិសហុងកុងចាប់ខ្លួននៅយប់ថ្ងៃទី២ ខែធ្នូ។ នៅថ្ងៃទី៣ ខែធ្នូ តុលាការបានចោទ អ្នកទាំងបីរូប ពីបទល្មើសទាក់ទិននឹងការប្រើប្រាស់ដោយខុសច្បាប់ទីស្នាក់ការកណ្តាលរបស់ក្រុមហ៊ុនដោយចេតនា ដែលមិនបានចែងក្នុងកិច្ចសន្យាជួល។
តាមការចុះផ្សាយរបស់កាសែត Apple Daily ដែលផ្នែកមួយរបស់ក្រុមហ៊ុន Next Digital និងជាកាសែតរិះខ្លាំងលើរដ្ឋាភិបាលហុងកុង ចៅក្រមដែលដឹកនាំសវនាការលើលោក Lai នេះ ជាចៅក្រមម្នាក់ ដែលលោកស្រីការី ឡាំ ប្រធានប្រតិបត្តិក្រុងហុងកុង តែងតាំងឲ្យកាន់រឿងក្តីច្បាប់សន្តិសុខជាតិហុងកុង។
ក្នុងអង្គជំនុំជម្រះនេះ បុគ្គលពីររូប ត្រូវបានតុលាការអនុញ្ញាតឲ្យនៅក្រៅឃុំបណ្តោះអាសន្នសិន ខណៈសេដ្ឋីហុងកុង ត្រូវតុលាការបដិសេធឲ្យនៅក្រៅឃុំ ដោយសំអាងថា លោកអាចនឹងគេចខ្លួនពីការកាត់ទោស។
ការចោទប្រកាន់នេះ ត្រូវបានមើលឃើញថា មានលក្ខណៈនយោបាយ ដោយសារតែកន្លងមក Apple Daily ដែលកាសែតរបស់លោក Lai បានរិះគន់ខ្លាំងៗលើរដ្ឋាភិបាលហុងកុង។ ការចោទប្រកាន់នេះ ធ្វើឡើងតែមួយថ្ងៃប៉ុណ្ណោះ បន្ទាប់ពីតុលាការទើបតែកាត់ទោស សកម្មជនគាំទ្រប្រជាធិបតេយ្យចំនួន ៣រូបពី ៧ខែ ដល់ជាង ១៣ខែ។ ក្នុងនោះមានដូចជា លោក Joshua Wong, កញ្ញា, កញ្ញាAgnes Chow និងលោក Ivan Lam។
កន្លងទៅ លោក Lai ក៏ត្រូវបានប៉ូលិសហុងកុងចាប់ខ្លួនផងដែរពីបទគប់គិតជាមួយកម្លាំងបរទេស ដែលជាបទល្មើសមួយនៅក្នុងច្បាប់សន្តិសុខជាតិហុងកុង។ ចំណែក ការិយាល័យកាសែត Apple Daily នៅជាយទីក្រុងហុងកុង ក៏ត្រូវបានប៉ូលិសចូលឆែកឆេរផងដែរ។ ប៉ុន្តែប៉ុន្មានថ្ងៃក្រោយមក សេដ្ឋីហុងកុងរូបនេះ ត្រូវបានតុលាការអនុញ្ញាតឲ្យនៅក្រៅឃុំវិញ ដោយបង់ថ្លៃចេញក្រៅឃុំប្រមាណជាង៣,៨ម៉ឺនដុល្លារ ហើយបូកទាំងប្រាក់ធានាជាង ២,៥ម៉ឺនដុល្លារបន្ថែមទៀត៕
© រក្សាសិទ្ធិដោយ thmeythmey.com