លោក បៃឌិន និងអតីតប្រធានាធិបតី៣នាក់ សន្យាចាក់វ៉ាក់សាំងកូវីដ-១៩ នៅមុខកាមេរ៉ា

សង្គមអន្តរជាតិ

អន្តរជាតិ

លោក បៃឌិន និងអតីតប្រធានាធិបតី៣នាក់ សន្យាចាក់វ៉ាក់សាំងកូវីដ-១៩ នៅមុខកាមេរ៉ា

04, Dec 2020 , 2:18 pm

រូបភាព

ឆ្វេងទៅស្ដាំ៖ លោក បារ៉ាក់ អូបាម៉ា_លោក ចូ បៃឌិន និងលោក ប៊ីល គ្លីនតុន ។ រូបពី AFP

ដោយ:

ប្រធានាធិបតីជាប់ឆ្នោត ចូ បៃឌិន និងអតីតប្រធានាធិបតីអាមេរិកបីនាក់ទៀតមាន បារ៉ាក់ អូបាម៉ា, លោក ចច ដាប់ប៊លយូ ប៊ូស និងលោក ប៊ីល គ្លីនតុន ស្ម័គ្រចិត្តចាក់វ៉ាក់សាំងបង្ការជំងឺកូវីដ-១៩ នៅមុខកាម៉ារ៉ា ដើម្បីជួយបង្កើនទំនុកចិត្តក្នុងចំណោមសាធារណជន។

ក្នុងកិច្ចសម្ភាសជាមួយវិទ្យុអាមេរិកមួយនៅថ្ងៃទី៣ ខែធ្នូ លោក បារ៉ាក់ អូបាម៉ា បានបញ្ជាក់ថា លោកនឹងចាក់វ៉ាក់សាំងបង្ការជំងឺកូវីដ-១៩ ប្រសិនបើអ្នកជំនាញជំងឺឆ្លងជាន់ខ្ពស់អាមេរិក វេជ្ជបណ្ឌិត Anthony Fauci អនុញ្ញាត។

«ប្រសិនបើលោកវេជ្ជបណ្ឌិត Anthony Fauci ប្រាប់ខ្ញុំថា វ៉ាក់សាំងនេះ មានសុវត្ថិភាព ហើយអាចចាក់បង្ការកូវីដ-១៩បាននោះ […] ច្បាស់ណាស់ ខ្ញុំនឹងចាក់វា»។ លោក អូបាម៉ា និយាយបែបនេះ មុននឹងសន្យាថា លោកអាចចាក់វ៉ាក់សាំងនេះលើកញ្ចក់ទូរទស្សន៍ ឬថតវាទុក ដើម្បីបញ្ជាក់ថា លោកជឿជាក់លើវិទ្យាសាស្ត្រ។

ចំណែក លោក Freddy Ford អ្នកនាំពាក្យលោក ចច ដាប់ប៊លយូ ប៊ូស បានប្រាប់ទូរទស្សន៍អាមេរិក CNN ថា លោកអតីតប្រធានាធិបតី ក៏ចង់ជួយជំរុញការចាក់វ៉ាក់សាំងបង្ការកូវីដ-១៩។ ត្រង់ចំណុចនេះ លោកអះអាងដូច្នេះថា ជាបឋម វ៉ាក់សាំងនេះ ត្រូវតែបញ្ជាក់មានសុវត្ថិភាព ហើយចាត់ចែងសម្រាប់ក្រុមមនុស្សអាទិភាព។ ក្រោយមក លោក ប៊ូស នឹងតម្រង់ជួររង់ចាំដល់វេនលោក ហើយនឹងរីករាយធ្វើវានៅមុខកាម៉ារ៉ា។

ដូចគ្នានេះដែរ លោក Angel Urena លេខាធិការព័ត៌មានរបស់លោក ប៊ីល គ្លីនតុន ក៏បានប្រាប់ទូរទស្សន៍ CNN ថា លោកអតីតប្រធានាធិបតី ក៏នឹងស្ម័គ្រចិត្តចាក់វ៉ាក់សាំងបង្ការកូវីដ-១៩ នៅមុខកញ្ចក់ទូរទស្សន៍ផងដែរ។

មិនខុសគ្នានឹងអតីតប្រធានាធិបតីអាមេរិកទាំង៣ ប្រធានាធិបតីជាប់ឆ្នោត ចូ បៃឌិន បានប្រាប់ទូរទស្សន៍ CNN ក្នុងកិច្ចសម្ភាសមួយថា លោក នឹងស្ម័គ្រចិត្តចាក់វ៉ាក់សាំងបង្ការកូវីដ-១៩នៅមុខសាធារណជន បន្ទាប់ពីរដ្ឋាភិបាលអនុម័តប្រើប្រាស់វ៉ាក់សាំង ជាពិសេស ក្រោយលោកវេជ្ជបណ្ឌិត Fauci ប្រកាសថា វាមានសុវត្ថិភាព។ អនាគតប្រធានាធិបតីវ័យ៧៨រូបនេះ បញ្ជាក់ថា វាចាំបាច់ក្នុងការប្រាប់ទៅកាន់ពលដ្ឋអាមេរិកថា វ៉ាក់សាំងបង្ការកូវីដ-១៩ មានសុវត្ថិភាព។ លោកក៏បានសរសើរអតីតប្រធានាធិបតីទាំងបីសម្រាប់ការតាំងចិត្តរបស់ពួកគេ និងធ្វើជាគំរូសម្រាប់ពលរដ្ឋអាមេរិក។

សូមបញ្ជាក់ថា វ៉ាក់សាំងបង្ការកូវីដ-១៩ ដែលអភិវឌ្ឍដោយក្រុមហ៊ុនអាមេរិក Pfizer និងអាល្លឺម៉ង់ BioNTech និងវ៉ាក់សាំងក្រុមហ៊ុនអាមេរិក Moderna រំពឹងនឹងត្រូវអនុម័តឲ្យប្រើប្រាស់ដោយអាជ្ញាធរអាមេរិកក្នុងពេលឆាប់ៗខាងមុខ។ មន្ត្រីជាន់ខ្ពស់អាមេរិកម្នាក់ បានអះអាងនៅថ្ងៃទី ២ ខែធ្នូថា សហរដ្ឋអាមេរិក សង្ឃឹមថា នឹងចាក់វ៉ាក់សាំងបង្ការជំងឺកូវីដ-១៩ដល់មនុស្ស១០០លាននាក់ ត្រឹមចុងខែកុម្ភៈ ឆ្នាំ២០២១៕