សង្គមអន្តរជាតិ
អន្តរជាតិ
អតីតនាយករដ្ឋមន្ត្រីប៉ាគីស្ថាន ទទួលមរណភាព នៅវ័យ ៧៦ឆ្នាំ លោក Zafarullah Khan Jamali អតីតនាយករដ្ឋមន្រ្តីប៉ាគីស្ថាន។ រូបភាព៖ Getty Image
× អ្នកនយោបាយជើងចាស់ និងជាអតីតនាយករដ្ឋមន្ត្រីប៉ាគីស្ថាន លោក Zafarullah Khan Jamali បានទទួលមរណភាព នៅថ្ងៃទី២ ខែធ្នូ នៅមន្ទីរពេទ្យមួយក្នុងទីក្រុងRawalpindi ដោយសារជំងឺប្រចាំកាយ។
លោក Zafarullah Khan Jamali គឺជានាយករដ្ឋមន្ត្រីប៉ាគីស្ថានមួយរូប ដែលបានកាន់តំណែងពីឆ្នាំ ២០០២ ដល់ឆ្នាំ ២០០៤ ក្រោមអាណត្តិប្រធានាធិបតី Pervez Musharraf ដែលកំពុងនិរទេសខ្លួននៅទីក្រុងឌូបៃ អេមីរ៉ាតអារ៉ាប់រួម។ លោក Jamali បានទទួលមរណភាពនៅវ័យ ៧៦ឆ្នាំ បន្ទាប់ពីមានជំងឺគាំងបេះដូងជាច្រើនថ្ងៃ។
លោក Jimali បានកើតនៅក្នុងឆ្នាំ ១៩៤៤ នៅខេត្តភាគខាងត្បូង Baluchistan។ បុរសរូបនេះ បានឈានជើងចូលនយោបាយ នៅក្នុងឆ្នាំ ១៩៦០ រហូតដល់ប៉ុន្មានខែមុននេះប៉ុណ្ណោះ ដែលលោកបានឈានជើងចេញ ដោយសារតែជំងឺរបស់លោក។ នេះបើតាមការចុះផ្សាយរបស់កាសែត Arab News។
បន្ទាប់ពីទទួលមរណភាព លោកនាយករដ្ឋមន្ត្រីប៉ាគីស្ថាន Imran Khan និងអ្នកនយោបាយផ្សេងទៀត ក៏បានចូលរួមរំលែកទុក្ខ និងសម្តែងការសោកស្តាយផងដែរ។
សូមបញ្ជាក់ថា លោក Jamali បានលាលែងពីនាយករដ្ឋមន្ត្រីនៅក្នុងឆ្នាំ ២០០៤ ដោយសារការខ្វែងគំនិតគ្នាជាមួយប្រធានាធិបតីលើបញ្ហានយោបាយមួយចំនួន។ បន្ទាប់ពីលោក Musharraf លាលែងចេញពីតំណែងប្រធានាធិបតីនៅក្នុងឆ្នាំ២០០៨ លោក Jamali មិនដែលនិយាយប្រឆាំង ឬរិះគន់លោកMusharraf ម្តងណាឡើយ៕
© រក្សាសិទ្ធិដោយ thmeythmey.com